برابيس راح لمكه وترك الدجه والدشاره مؤقتا بس انتكس :(

برابيس · 07-02-2007, 05:19 AM

اهلين شباب و صبايا >>> ترا جدته قايلتله ان فيه عرق لبناني وان واحد من اجداده تصير اليسا من صلبه بس الزمن غدار

في سنتن من السنين ويوم من الايام واسبوع من الاسابيع وشهر من الشهور >>>نظام الوقت عنده غير خلق
الله

قاعدين بالشقه انا وخوي العمر ابو راس ((ابو راس=هالانسان ما ادري انا ناشب له ولا هو ناشب لي من اول متوسط وخشته وراي وراي وين ما اروح ويوم جا وقت الجامعه وانا بالتقديم والراديتر طاق الامبير فيه مليون من المعامله الحلوه اللي يعرفها شعبنا الكريم الله يحفظه ولا يحرمني منه الا تطق كرشتي بشي حسبته عمود عاد قلت افضي اللي بنفسي بهالعمود واصكه ببلكة الاوراق اللي معي شوي الا العمود قام يصارخ وحنا الشوف شجر مب ذاك الزود وادقق ولا هو يتافل علي ومدري وش يقول قلب كنه افغاني زارفين تميسه ولا دافعين فلوسه ...اثره طلع خوينا ابو راس الله يسلمه ويحفظه لي)) >>>>ابد من يقول انك ما طلعت برا الموضوع

الزبده كنا بالشقه وطفشانين والاخلاق لك عليها كنا طالعين من اختبار الرياضيات النهائي حق الجامعه وجايبين الفطر والاضحى والكريسماس >>>>ابي اوريكم ان ثقافتي اجنبي مب بس سعودي

طقت بالمخلوق اللي داخل جمجتي فكره ((يقولون ان اسمه العقل واذكر ان ابوي يقول لي انت مفهي مب منك الا من شركة الاتصالات الله يقطع رزقهم ما حاطين لك برج ارسال عشان كذا مقطوع عندك الفهم وعاد انا مشت علي وكل ما قالي واحد ليش انت مفهي قلتله نفس القصه يتحمد ربه ويمشي ما أدري ليه الين كبرت ووصلت لم الثانوي وسوداني الاحياء قعد سنه يفهمني الى ما اقتنعت ان ما فيه ابراج ارسال للمخ قام يقولي بدون ابراج ارسال ولا قلق انت رح تروش بمويه بارده وحط اصبعك باقرب فتحة كهرب220 فولط وابد مالك الا اللي يرجعلك العقل وفهمه يصك مليون على ميه "الثور يبي يفتك مني باثره بالحصه ومن زود المصاله كل ما قالي شي ردت عليه آآآي واذا ناداني قمت اصارخ من الخوف واقوله استاذ وين انت ما اشوف الا ثوبك يتحرك")) ....

الموهم....كما قلت سابقا يا أحبائي....طقت بالمخلوق اللي داخل جمجمتي فكرة...طبعا صدعت بعد هالفكره واكلت لي 3 حبات بندول عشان استوعبها و3 ثانيات عشان يروح الصداع...واقول لابو راس وشرايك نسافر رد علي وين قلت ما ادري شفلك مكان ندز له ونونس عمرنا شوي بدال هالعزى اللي حنا فيه قال قدام وشرايك شرقيه قلت لا يا اخوي ودنا نطلع برا لأحد دول الخليج خنروح لم جده يمدحونها ويقوم ابو راس موصله معه ويرقعني ببيالة الشاهي على راسي ((طبعا ما تأثرت لان الراس فاضي ارتدت البياله على راسه وفلقته)) قال يالخبل جده عند البحر الاحمر والبحر الاحمر جنب افريقيا معناته ان جده اكيد من افريقيا والدليل ((قلبها حصة توحيد)) كثرة الحبشيات فيها<<<<ما قد طرالهم مادة اسمها جغرافيا بالمدرسة

قلت خلاص ولا تزعل جده من افريقيا وانا اضحك عليه في داخل نفسي
لاني داري انها وحده من دول الخليج ((ركزو على في داخل نفسي)) >>>>يبيلك تسطير انت وياه

عاد تحمس معي ابو راس وقال قدام ومنها نشطف مكه ناخذ عمره يقولون ما بينها وبين جده الا حدود
الساعه >>>>قايلكم الله يحفظه لي حبيب هالانسان ويذكرني بديني مب بس الدشره معك معك والدين ما اعرف اهلك((ترا توني مخترع هالمثل احس انه يضبط مع الموضوع))

والله ويدق كل واحد منا على اهله يستأذن منهم انه يروح لم جده ......((طبعا مب لله كنا مطفرين ونبي فلوس ودارين ان اهلنا مب موافقين على طول عشان كذا ما جبنا طاري جده الا بعد ما جبنا طاري مكه واننا رايحين للعمره))

الزوبده كلن اهله وافقوا بعد معاناة ومحاولة جميع اساليب الاقناع وتحمل جميع انواع الاذلال والطق اللي جانا ((اذكر من الموقف اني يوم دخلت على ابوي وهو يتغدى "طبعا بعد عزل تام لجميع انواع الاسلحه الممكن محاولة القتل فيها من على طاولة الطعام ويدخل من انوعها:صحون-سكاكين-اشواك-سكاكين البايخه حقت الفاكهة اللي بدون اسنان-الملاحة-كتشب-شطه...الخ" قلتله يبه ابي اروح جده...قال مدقر خذ الريال ذا وروح رجلية لم البقالة اللي بالملز "وانا ساكن بالربوة"جب خبز وارجع وطلعت من الغرفه وهو ينخم يوم رجعت بعد ساعه الا خلص تنخيم ويصك وحده ثقيله ولونها بنفسجي بوجهي فكت راسي نصين...لو يدرون عنها الامم المتحده كان حطوها من بين الاسلحه المحرمه دوليا...بعدها فقدت الوعي وما صحيت الا بالمستشفى وانا راسي مسمكرينه بفيبر قلاس وراشين مكان النخامه بيج على اساس انه جلد يقولون عشان النخامه حرقت ذاك المكان ومستحيل يرجع مثل اول قاموا رشوه عشان علشان ما تتحطم نفسيتي بعد ما خرب جمالي الرباني وهم دارين ان ما عندي فلوس عمليات تجميل وخرابيط))يوم ابوي رحمني بسبب عملية التشويه اللي تمت على ايده ورضا لي ....ومسكنا الخط

*خط جده*

كما قلت سابقا مسكنا الخط الساعه 8 الليل بعد ما صلينا العشاء عشان كفرات السياره ما تتصلخ ببرودة الخط الزايده الساعه 12 الظهر ونموت على نية خراب ودجه بجده >>>>اللهم احسن خاتمتنا

طبعا صادفنا بالخط قرى وهجر بس تشوفها تقول يا زين منفوحه اقلها فيها مقهى انترنت وبوفيه كبدتها بريال>>>اكبر همه

يوم صار باقي حدود 500 كيلو والله وتخرب الاخلاق وندز 200 طبعا بالليل ما لك امل على ذاك الخط تلقط رادار او اي مخلوق على الاقل بخط الشرقيه تلقاه مسفط تحت الكوبري ولا عالجنب ومتخفي وحالته صعبة ومشغل السفتي(عاد السفتي الجديد ما بقى لون ما حطوه وتشوف عشرطعشر الف مليون لمبه ورا تقول داخلين عرس شايب ضاربين له خيمه بالبراحه اللي جمب البيت ومتحسفين يا خذون له قاعه لا يموت بنص العرس من الفرحه وتروح الفلوس على غير سنع لو مخلينها لعزاه احسن)) يعني يحلفلك اني انا هنا وباقي الدلوخ اللي من ضمنهم انا ناخذ مخالفات ما بقى الا يوقفك ويقولك ترا انا رادار لا تسرع ويصيح لك شوي ويحلف عليك انك ما تسرع

قابلنا تفتيش وانصكينا بمخالفه...تحملنا وقلنا انا لله وانا اليه راجعون ...قابلنا ثاني بعده على طول صكونا بمخالفه...والاخلاق قفلت على خفيف...قابلنا الثالث وتزق مع الضابط قال ترا الرادار يشتكي منك ما عندنا شغل الا انت ... قلت آسف والله طال عمرك ...قال ايه اهجد والا بتتسطر ترا ورانا غيرك بنصكهم مخالفات مب بس انت الدفتر مب مصنوع لأهل ام ابوك...عاد انا يوم قالي هالكلام قفلت الاخلاق واقوم اقوله وشلون تبينا نمشي بالله...30 ولا 60 يا حياة امك...طارت بوهته الضابط ويقوم ويتلني برا السياره ويقول لا قزم ودب وتهايط بعد...وشرايك تسطرني بكف مب احسن؟!!....قلت لا ما توصل الامور كذا لازم فيه قدر من الاحترام بين الشرطه والشعب ((وانا المواصير التحتيه عندي تفجرت وقامت تقطر سائل اصفر اللون كريه الرائحه كنه ابط صعيدي ما تروش من ايام الفراعنه...والرجفة طاقه 9 على مقياس رختر ))...قام وسطرني بكف وانا اصيح وما خلاني الا وانا راكع ويصكني بوحده كنه الدوخي ضيعني للمرايه ويحطني مره ثانيه وشاتني وحده خفيفه دخلتني السياره وقال لاعاد تعيدها فاهم...قلت خلاص وان عدتها هذا رقم ابوي وعلمه عني خله يلعن جدفي >>>((شايفه مدرس مصري عند ابوك هو))والله وبعدها ما عدا الطبلون ال140 ومن زود القراده ولا تفتيش مر علينا بعد الثالث يعني انواع الحظ الخايس من بدايتها

وصلنا السيل الكبير وندور المسجد الكبير اللي يعتمرون منه الناس وما يمدي نوقف الا هالهنود يأشرون لك كلن يقولك تعال هنا كنك داخل حراج الكمبيوتر بالرياض من تدخل تجمعوا حولك يحسبونك توزع الفلوس ببلاش تشوفهم مليون واحد ((لا تدققون)) ومن تصرخ الجوازات طاروا كنهم فص ملح وذاب... والله ويمين ويسار لين طحنا على المسجد ونروح الحمامات نبي نحرم...شفنا حمامات الله لا يوريك اللي ناسي موس مشعر واللي معلق صروال سنه والثالث معلق لي فنيله لو ياخذون شوي من مكان الاباط فيها ويحللونه ان يطلعون باقوى سلاح كيماوي على وجه الارض>>>انتو ركزوا على ((وجه الارض))يا حليلي مثقف بس محد مكتشف الموهبه

احرمنا وخلصنا بعد انواع من القرف والطراش >>>اللي يسمعنا يقول حنا اللي فاتحين كلوركس وتايد للتنظيف وحنا كل واحد فاتح معمل للفطريات...بحصة الاحياء السوداني فصلنا هو الوحيد اللي ما يتعب ويجيب فيه عينات للفطريات وحاله بس يجيب مكبر وما عليه الا انه ينادي واحد ويفتح اباطه ((بعد ما يلبس فلتر اكسجين)) ويبشر باللي يبي فطريات حتى معمل المدرسه ما عندهم منها...يقولون عاد انه سجل نوع جديد باسمه لقاه بالصدفه وهو يشرح بحصة من الحصص بأبطي

يوم طلعنا ونقصد المسجد نبي نروكع لنا ركعتين ونطلع .... صلينا وطلعنا وحنا نمشي كل واحد ماسك قشه لا يطيح وتطلع الفضايح وكل واحد ما يبي الثاني وراه لا يقعد يقزقز ((عزوبيه وخرمانين وأيسو ان رقيه وسبيكه يعطونهم وجه وش تتوقعون بعد؟!؟)) لأن واحد من الربع قد طاح عفشه ولا سلم الى اليوم ما بقى احد بالرياض ما درى عن الموضوع

يوم ركبنا السياره وارتاح كلن على شرفه ويطلع لنا ذاك الهندي كنه حق دهن عود اللي بطاش ماطاش نشب لنا الا تشترون دفتر اذكار من عندي وين ما نروح نلقاه يشطف يروح ويرجع علينا ويقوم ابو راس برمياته المشهوره يرقعه ببطل ببسي من القديمات اللي مستلمينهم محلات الغاز الحين كل ما خلصت كرتون عبولك اياه بخمس طعش ...ولا شفناه عقب ذيك الساعه

كملنا خطنا وجانا مفرق المسلمين وغير المسلمين>>>((كأن ذاك المفرق قبل ما تدخل السيل ولا لأ؟!؟))طبعا بعد تفكير وتعب ذهني شنيع عرفنا المخرج الصح ولله الحمد

*يوم وصلنا مكه*

وصلنا مكه بعد ما مسكنا الخط>>>قل قسم

ونبدا بمشلكة المواقف وين نلقا موقف بهالزحمة وبين هالخلق وجمب الحرم ...3 مشاكل يبيلها حل >>>اخس يا كونان ما تلعب

وندور وندور وندور وندور وندور ونرجع على نفس المكان عجزنا نلقى المواقف اللي جنب الحرم ونقوم نسألك واحد من هالتكاسي ويقولنا تدخل يمين وتديور ثم اول لفه يسار ((عاد من الفهاوه حنا ما ستوعبنا ان هالطريق يرجعنا على نفس المكان يعني طلعنا من المولد بلا فول))ونرجع لنفس مكانا وانزل عليه يوم شفته ثاني مره ابلعن جدفه ((لاتدققون داري انه تكسي بس كان مسفط ياخذ فطور))>>>مشكلتك انك ذهين يا اخي

مثل ما قلت نزلت عليه ابلعن جدفه(عاد انا هياطي بزياده نازل ابلعن جدف خال لو زبد علي طلعلي من وراه قبيلة جن ساكنه فيه))قمت قلتله تستهبل انت وخنافرك اللي كنها صروال جدتي
قمط الخال مني وقال لااحاول>>>قايلكم مية مره لاتدققون

قلت ايه لا عاد تحاول مره ثانيه ولا ابلعن جدفك فاهم يا عبدالرب>>>ما امداني اقول عبدالرب الا قام يزبد وطلعو القبيلة كلها ولعنو ابو خامسي طقوني طق سنه بساعه لين ساووني بالارض صرت انا والاسفلت واحد ما بينا فرق الا اللون ...لان الازفلت صار لونه اخف من لوني بعد الطق...يقول ليش تشبهني بعد الرب انا ضروسي احلى وابيض وفيها كبوس زينون

ويقوم خويي ويهديه ويقوله معليك من هالقزم تراه هياط على غير سنع و انت اقوى منه...اصلا انا لو ساكن هنا كان خليته وانت صرت صديقي>>>يهدي بزر مب خال كبر الجحش

والله ويهدا الخال وتخمد خنافره...ويقوم يوصفلنا ونروح عالوصف والله ويطلع الوصف نفسه بس حنا كن مفهين وسمعنا اليمين يسار...قمنا ندور نص ساعه لين لقينا موقف يكفي السياره وصفطنا ونزلنا ننوي ترك الدجه والدشاره ومعرفة ربنا ودينا ونعتمر...وما امدانا نخلص النيه الا ابو راس قام يقول شف شف القطعه اللي هناك عاد انا قمت وصفقته بكف قام راسه يلف خمس مرات وطاح ...رجعت وركبته وانا اقوله الله يقلعك يا سربوت ابليس ما امدانا نخلص النية وانت تقزقز ببنات خلق الله استح على وجهك >>>طبعا مب لله انا قمت اقزقز بالحرمه ويوم شفتها ولاهي ذيك الشيفه اللي تقول لصباح يا قمر 14 براطمها بنفسجيه كنها طفاحات مسابح وبالنص شي ابيض يقطر ما ادري وشو وجسمها تقل همر اسود مطيح شكلها وحده من هالصعيديات اللي تجيك على اساس حج ولا عمره ومن تخلص عمرتها ربضت بالديره وطقتلها خيمه جمب الحرم من اي انواع القماش اللي عندهاوعاشت فيها وسوت لك ازمه غذائيه بالبلد ولا طرت على مصلحة المياه قالو حافظ على الماء ...وهم لو يرحلون 5 من هالصعيديات كان شافوا وشلون نسبة المياه غير المهدره بترتفع والبلديه تصير كل 5 سنين تزفلت الطريق بدال كل سنه

دخلنا الحرم واخذنا الطواف وحنا نرجف ونتشهد لا يجينا واحد من قروبات هالفلبينين ولا الاندنوسيين وناكلها تبن((والله لو تجيب مدرعه ما اخترقتهم ولو انك قد اعتمرت او حجيت قبل بتشوف هالشي))يدفونا ونسفط على خششنا وتجيك بعدها قروب صعيديات رجل الوحده فيهم عن مكينة زفلتة شوارع ويصير هذا هو قبرك

خلصنا الطواف وخلص الهم معاه...وما تعبنا بالسعي ولله الحمد...كل واحد فينا راح وصكها موس عند اقرب حلاق... وطلعت بلاوي وفلقات وطعوس تشكلت على مر السنين

وغير كل منا ملابسه تحت في المواقف وشدينا الرحال الى البيك ((طبعا البيك صار من شروط العمرة بهالوقت ...يقولك عمرة بلا بيك كأنك ما طبيت الحرم))وتغدينا وطفحنا وطلعنا حرة هالخط والمصايب في هالدجاج

وتوته توته خلصت الحدوته يا شطار

نشوفكم صدفه

ma 7olik · 07-02-2007, 06:02 AM

اكتشفت بذكائي وفطنتي ان موضوعك مسدوحن في منتدن آخر
لذلك فهو منقول
لذلك فإنه يتوجب عليا ان اجدعوهو على ام السعف والليف
مع احتراماتي لك

اختك ما حولك

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري

الذين يشاهدون محتوى الموضوع الآن : 1 ( الأعضاء 0 والزوار 1)

برابيس راح لمكه وترك الدجه والدشاره مؤقتا بس انتكس :(

طفاية الملحق