((التعصب الريـــاضي ))...موضوع للنقــاش...

ابلهـ عطيات · 06-03-2007, 03:45 PM

السلام عليكم ..كلكم ..يامخنبقين و مخنبقــات ..؛) ؛)
اول شي ..
ان شالله كل اسبــوع راح انزل موضوع جديد نتناقش فيــه ..و تسدحون ارائكم ووجهات نظركم..

هالاسبوع اخترت لكم موضوع التعصب الرياضي..
و اي شخص او شخصه عنده موضوع حاب اننا نخليه موضوع للنقاش ..ابد يرسل لي على الخاص ..وانا انزل الموضوع هنــا..

نرجع لموضوعنا ..التعصب الرياضي ..الي خلاني انزل الموضوع ..انه امس كنت انا وصديقاتي فاتحين هالسالفه ..
و بصراحه انصدمت من بعض الاشياء الي ممكن تحدث ..يمكن ما ادري عن شي ..لان بيتنا موب رياضي ..وماعندنا اهتمامات كوره الا شي بسيط ...

بصــراحه فيه عدة نقاط بالموضوع ....
يعني يمكن الموضوع هذا يخص العيال بشكل اكبــر...لكن للاسف الي يتضرر منه بشكل اكبر هم العوائل و النســاء ...
يعني وحده تقول ...انه زوجها حاط بالصاله بوستر كبير ..و فيه جداول المباريات ..و معلمها اي وقت بالجدول هذا تحــــــلم تطلع او تروح او يوديها مكــان ..و يغصبها تجلس معه ...و يالله عـاد تتحمل صراخه و البلاوي حقته .لو انهزم فريقه ..عاد لو فاز ...يوعدها يوديها للي تبي ..

وحده ثانيه .زوجها يوديها تزور صديقاتها ..يوقول لها لو انهزم الهلال ترا على طول بجي اخذك وماراح تجلسين معاهم ..
ولو فــاز راح اخليك تجلسين و تفلين حجاج و تنبسطين ..
ياعمــري الانسانه الي كذا ...بس حاطه يدها على قلبها ...فــاز فريق زوجها ولا لا..

اوكــي احنا مو ضدالتشجيع ..لكن لما ياثر على حياة الاخرين ...ويتجاوز حدود الشخص المشجع ..
هنــا نقول لا لا لا !!!

نروح نقطه ثانيه..
بعض الناس عنده تعصب فضيع ..مكن يفقد عقله في حال انهزم فريقه ..وممكن تجيه جلطه او بلاوي في القلب ..لهذا السبب ...

انــا مادري بصراحه ..هل الانسان يقدر يتحكم في تعصبه الرياضي ...ولا انه شي خارج عن ارادته

افتونــا يا عيال ...

غير الناس الي يخرب يومــه كامل لو يخســر فريقه ...والي يدفع الضريبه هم زوجته و اهله ...
طيب وش ذنبهم هم ..اوكيه ..الواحد يضيق صدره ...بس موب تقل ميت له احد ؟؟!!!

نجي ..للهبال و الهياط الي يصير بشوارعنا لما يفوز المنتخب ..او فريق معين ببطوله ...
يالله بس ...
الحريم الي يكون طالعين مع سواق ذاك اليــوم ...الله يعينهم على وجع القلب و المفاجآت الي راح تصير لهــم ..

ممكن تقولون خلاص اعرفوا اذا كان يوم بطوله لاتطلعون ..
طيب زي حالاتي مادري عن شي ..و مادري انه فيه مباراه ذاك اليوم وش اسوي
يعنــي وصلت الوقاحه انهم يفتوحون الباب على الناس الي راكبه ..
ويبخون على السيارات اخضر و ارزق ومدري ايش ...

يعني ليش مفهوم الفرحه عندنا بالشكل هــذا ..ليش نخلي الضرر يوصل للاخرين ...
نسد الشوارع و نوقف الاشارات ..و هاتك يارقص وتخريب ..
.

.احــم ..
انا قلت الي عندي ...عاد انتظركم انتم تدلون بوجهــات نظركم ...ورايكم بالقضيه وملابساتها ..
واهم شي الاسباب ..

موافق عليها · 06-03-2007, 03:57 PM

ابله مشكوره على الموضوع <<< مع انك امس كنتي ضدي ((( يعني فيكك تعصب لابن جلدتك )))

شوفي التعصب الرياضي اتوقع انك قسمتيه على قسمين الاول اللي يضر الاخرين من حلوه وهذا طبعا شي غلط يعني يقول اذا فاز فريقي ابسويلكم كذا واذا مافاز منب مسوي اعتقد انه غلط ياشي تسويه بنفس ولا لا تسويه ومثل ماعندك مشاعر ان فريقك انهزم حتى الاخرين لديهم مشاعر اذا جرحتهم او رفعت صوتك عليهم

اما من الناحيه النفسيه للشخص يعني يتعكر مزاجه او اذا فاز فريقه تشوفينه في حاله هستيريه هذا اتوقع انه شي غصب عن الواحد يعني من زود الفرحه او الحزن على الفريق اجل شلون يحبه اذا كان مايهتم لا امره يعني بس يشوف المباراه من دون احاسيس

وشكرا

<<<< تراه بكاس العالم ماقال لاهله كل ما فازت هولندا العشى علي

كيف التلوين معي

ابلهـ عطيات · 06-03-2007, 04:17 PM

موافــق ..

اجل شين قصمنجي ؟؟؟من اليوم و طالع بوريك التعصب صدز

اقتباس

من الناحيه النفسيه للشخص يعني يتعكر مزاجه او اذا فاز فريقه تشوفينه في حاله هستيريه هذا اتوقع انه شي غصب عن الواحد يعني من زود الفرحه او الحزن على الفريق اجل شلون يحبه اذا كان مايهتم لا امره يعني بس يشوف المباراه من دون احاسيس

ماقلنا شي يحــبــه ....بس لازم يسوي كنترول على نفســه ....خصوصا الرجال خابرينهم يتصرفون بالعقل اكثر من العاطفه ..
ولا ؟؟

المهــم ترا هــذا موضوعكم انتم ..منكـــم و اليكم...
اي واحد عنده تعليق على رد معيــن ..يجي يسدح ما في جعبته

Crazy in love · 06-03-2007, 04:32 PM

أولاً : عطايط ليت منك ثلاث بس

راح أرد ع هالموضوع وأقولك كل شيء بصراحة

اقتباس

انــا مادري بصراحه ..هل الانسان يقدر يتحكم في تعصبه الرياضي ...ولا انه شي خارج عن ارادته

افتونــا يا عيال ...

بالنسبة لي لاصار الموضوع فيه مباراة مانشستر فأعتبريني سكران إن صح التعبير ..

طبعاً هالشيء وربي مو بإرادتي لكن جرت العادهـ ع هالشيء ..

يعني تشوفين عض أظافر عرفطة ثوب الخ .. من الأشياء اللا شعورية ..

اقتباس

غير الناس الي يخرب يومــه كامل لو يخســر فريقه

ما يخرب يخرب بس المزاج يتعكر والنفس تضيق خلقها وشيء ما ينوصف يعني ..

اقتباس

نجي ..للهبال و الهياط الي يصير بشوارعنا لما يفوز المنتخب ..او فريق معين ببطوله ...

لا عاد انتي جيتي لتصرفات المتخلفين فمقدر أقول الله يشفيهم

تشكرات عطيات

منحاشه من بيتهم · 07-03-2007, 05:54 AM

عط عط .. تلسمين على الموضووع ..

انا اكرهه مالي اللي يعصب بسبب الكوره .. ويدخلها في حياته مثل ذاء اللي يجي ياخذ زوجتة اذا انهزم

الهلال... صراحة متخلفين

انا الحمد الله مافيه احد عندنا متعصب .. عادي يعني صح تضيق صدورهم شوي بس عادي

وقت الهزيمة بعدين كانه شئ ماصار .. ولايدخلون .. الكورة بحياتهم

حلو بس أخلاق · 07-03-2007, 02:41 PM

حجز مكان

ولي عودة مع الزمان

إن شاء الرحمن

وموضوع فنان

يا أبله عطيات خان <<< لزوم السجع هع

روتــــــــــانا · 08-03-2007, 05:08 PM

تشكرات ياعطيات هانم على هيك نقاش

اذكر فيه اشاعه على التعصب ان رجال طلق حرمته علشانها نصراويه وهو هلالي وبالاصح

كانت تحب فهد الهريفي وتقووول لرجالها سو نفس شعره

المهم التعصب من ناحيتي فيه ناس يتعصبوون في النقاش وهذا حوار عادي جدا ً ..

مشكلة التعصب هو في الشوارع والزحمه والمضاربات الخ ..

مثل مباراة للهلال دخل مشجع نصراوي واظنه مب بوعيه وراح فيها

وتكسير السيارات بعد المباريات وتوقيف بعض العوائل اذا كانوا مع سواق

فبعضه مب تعصب الا جنون

اقتباس

انــا مادري بصراحه ..هل الانسان يقدر يتحكم في تعصبه الرياضي ...ولا انه شي خارج عن ارادته

افتونــا يا عيال ...

انا اقووول يقدر يتحكم باعصابه .. لانه لو فكر فيها ماتسوى شي كلها كوره

هذا رأيي بصراحه

مخنبق · 08-03-2007, 09:58 PM

يامرحبا بالجميع حياكم مشكورين عالمرور >> هههه مسوي الموضوع موضوعه ,,

التعصب خارج ارادة الشخص ,, ومن داخلنا نعرف انه تصرف سيء لكن من حب الانديه ماقتل ,,

التعصب شيء طبيعي لكن اذا كان فيه مضرة بالاخرين فهذا شي خاطيء ,,

على فكره التعصب له اكثر من وجه واكثر من نوع ,,

فيه تعصب بالكلام .. وفيه بالفعل .. فيه تعصب يضر الاخرين وفي تعصب مايضر ,, فيه وفيه ...الخ

اقتباس

نروح نقطه ثانيه..
بعض الناس عنده تعصب فضيع ..مكن يفقد عقله في حال انهزم فريقه ..وممكن تجيه جلطه او بلاوي في القلب ..لهذا السبب ...

هههههه اي صحيح .. وانا شرط علي اني ماانام اذا انهزم فريقي وانواع الامراض .. اخخخخ بس ,,,
والله التعصب مالهوش حل ,,

اقتباس

نجي ..للهبال و الهياط الي يصير بشوارعنا لما يفوز المنتخب ..او فريق معين ببطوله ...
يالله بس ...

لا احبذ هذا النوع .. ودواهم مييير من يبنشر كفراتهم .. ويكسر قزازهم عشان ياخذون درس وماعاد
يهايطون مره ثانيه .. انا من مناصري الهياط لكن بالكلام فقط .. لانه احيانا الكلام ابلغ من الافعال ,,

وااااوك بس جاني شد عضلي وانا اكتب ,, مشكوووره بنيتي ابله عطيات ,,

ابلهـ عطيات · 09-03-2007, 12:35 AM

تشكــــرات لكل الي مروا ..و سدحووا ارائهــم ..

وننتظر البقيه ...

بس نقطة التحكم بالاعصاب ..و هل هو شي خارج عن الاراده ..حيرتونا ....
احد يقول ما نقدر نتحكم ..
و احد يقول انها بالاخير تظل كوره ...

مع اني اميل لنقطه ...انه التشجيع من الامور الي يقدر الانسان يسيطر عليها...ويحافظ على اعصابه نوعا ما...

روتــــــــــانا · 09-03-2007, 12:42 AM

عدت ..

بصراحه هي كوره يعني مايحتاج عصبيه وزحمه وزي ماقلتي يقدر الانسان يسيطر عليها ..

انا بصراحه اخذها متعه يعني اشجع كم فريق واتابع كم فريق .. والهدف من كل ذا تمتعين بالمباراة واللمسات السحريه

ابلهـ عطيات · 09-03-2007, 12:45 AM

^
^
^
انت شخص منتــاز ...
ليت كل المشجعين مثلك ...

وفعلا هي لعبه ..يعني هدفها ترويح عن النفس ..موب مهاوشات و مضارب ..و نفسيات زفت وامراض ...

صدق عالم ...حتى الفرح ما نعرف نعبر عنه بطرق مناسبه

((التعصب الريـــاضي ))...موضوع للنقــاش...

تكية الملحق