خنبووووق

السلام عليكم




في عصرية ليلة من ليالي شبوط مدري شباط فبراير (هو أسمه شباط صح ولا لا ؟ )

المهم ... في تلك الليلة الباردة ... الباردة إيش ياعمي ؟ إلاّ جالسين في فريزر ...

نعنبوها ليلة ياااوك وش ذاك البرد

بعد مافـتّـينا كورة الين قلنا بس.... كان واحدن من العيال ,
جايبن معه خوين له كبير شوي جسما وعمرا يقال له ..... أبومرضي ...


أبو مرضي ذا -ماشاء الله عليه- على كلامه يقول أنه يفطر على نمورة ...ويتعشى تماسيح ...
ويحلي بعقارب....وأفضل وجبة عنده ويموت فيها... هي شوربة الأسد

بعد ما لعبنا الماتش جلسنا نسولف تعرفون قهوة المغربية ذي لابد منها
المهم أزعجنا أبو مرضي بمغامراته في أدغال الصمان ومجاهل الثمامة


كيف لحق الورل وطلع الضب من فمه وبيديه العاريتين يعني بلبوووووص لا والورل يقول له
الله يرحم أم أمك فكنّي والله ما أتعوّدها بس فكني


وكيف عضته أم جنيب وماتت هي متسممة


وكيف لقى القراصنة في الثمامة وقدر يخلص الاميرة منهم ويسلمهم للهيئة


...وكيف... وكيف ..


الصراحة عاد الرجّال شوقنا لطـلعة خفافية على طريقة سريع سريع كذا
يمّ أدغال أو أمازون الرياض ((الثمامة))

.
.
.
.
بس المشكلة إنّـا مانعرف من الثمامة إلا المحل اللي يطعسون في راعين الجيوب والدساتن
واللي غـرّز فيه راعي الهـمـر -الله لايفضحنا - ودّك أنهم مصورين الهمر وهو مغرز
ومرسلينه لشركة جنرال موتورز علشان ينتحر اللي مصنـّـع ذا الموتر

.
.
.
كلمنا أبو مرضي وقلناله نبي نروح الثمامة الليلة وش رأيك تجي معنا
قال ههه ... الثمامة ياحبيبي ذي لعبتي
وبعدين انتم بصراحة شكلكم كذا وراعين تبون تقعدون قريب من الخط ولا المحطة وأنا ما نيب فاضي لكم ... تبون الثمامة الثمامة ... أنا أبصير الكبتن ولا تعارضونّي أبد

قلنا تمام ... خلاص
.
.
.

المهم عزمنا حنا الاربعة وتحت قيادة أبو مرضي وجهزنا قهوتنا وعلومنا السنعة ودزّينا للثمامة ...

ودليلـتـنا طبعا هو الكوماندو أبومرضي الرجّال الصراحة كان مجهز نفسه بالبوصلة والسكين الكبير
ذاك حق رامبو ومشخطن وجهه ... الرجال مرررة ... مافيها ...

بيصيد لنا هالليلة أقل شي أقل شي ديناصور ولا نبي نلقى كنز علي بابا والـ79 حرامي

.
.

تعمقنا داخل أدغال السافانا والاستبس المدارية وبدينا نحس بالظلام الداااااامس ..

الواحد مايشوف إلا المنطقة اللي يغطيها نور السيارة ولا سنون سعد اللي كان مركب تقويم أسنان
الله يهديه بس ...ماعمرنا شفنا تقويم يركبه الدكتور بدرير وفاروع


وساد صمت وترقب لايقطعه إلاّ


شريط رابح وهو ...يلعـلع...تنـكـس ... تـنـكس ...أبورايـش خـذ عقالك
تـعـرفون ليلة شاعرية زي كذا ما يـبـيـله إلا فن رومناسي وأغنية رومانسية
والشريط ... يخلص ويقلب ...يخلص ويقلب ..ولا أحد منّا يـــمه... لأن المثل العربي القديم يقول الخوووف مليييييح ...والمشوار لازال طويل

ولاّ.. خرفشة منذر وهو يخرفـش داســن راسه وسط كـيـس الليز والبطاطس وهاتك يالعب بـهالليز


وبعدين ...


.

.

.

.






أخيرا نزلنا في منطقة - ياوجه الله - مقفرة وخالية من الاحياء .. خلـو نادي (...) من البطولات
ومدينا بساطنا وقمنا نسولف ونتـقـهوى ...
.
.
.

وتعرفون الشباب في أجواء زي كذا ما تزين السوالف ولا تـزبط إلا عـن ...
.
.
.

أكيد
.
.
.
الجن والعفاريت وقصصهم التي لاتـنـتهي ..

اللي من نمونة ذاك اللي صايدن له ضب
وشوي يكلمه الضب ويقوله يبو الشباب خذ بي دورة بالموتر وردنّـي لجحـري
ولاّ ترى أحولّك إلى ... ضبـّة... (قصدي أنثى ضب ) ...
.
.
.

المهم خوينا منذر قام بطنه يلعـب .. ويطّـلع أصوات تـقـل... صوت ... تم الاتصال بالشبكة .. في الدايل أب على كلامه أنه بسبة اللّـيز والبطاطس اللي سـفـّهم طول الطريق

بس الله العالم أنها بسبة سوالف أبومرضي المرعبة عن الجن والعفاريت والزومبيز

أبو مرضي يوم شاف منذر يتـلوى وكـل شوي ناقـزبعيد عنّـا
عشان .. عشان ... نقول ... عشان ( يريـّـح )

وهو ماغير يتـفـلت عـلينا ...أزين... أبرك فكّـنا من ذا الورع .. ذبحنا هو وبساكيته ..
ولا هوب كفو يسمع سوالف الرجاجيل إقلعوه منّا خلوه يطس لبيتهم ...

تبرعت أنا وقلت خلاص أبرجعه وبعّود لكم ... العيال قالوا تمام

.
.
.
.

ركبنا أنا ومنذر الموتر وحرّكنا ... تبون الصدق ... جـتـنا أم الركب ... وخفنا من المشوار ...
واللي خرشني أكثر أنّي بعدين أبعّـود بلحالي .... ألا يامعود لهم ..

قلت يامنذر ياخوي ترى المسألة ماتستاهل والدعوة سواليف وسعة صدر شف النجوم وش زينها
شف القمرة ... هي وين هـي؟ ... إيه شفها ...شف الدب القـطبي مدري النجم القـطبي
إلا وش رايك بس نعّود ونسمر مع العيال ..

منذر قال معصي ... تبي أبو مرضي يهوش علينا ثمّـن ياكلنا لا والله ياحبيبي

وأحاول فيه وأحاول فيه وهو رأسه يابسة كنها خبز الشاورما حق المعلم أركدش التركي

قلت طيب أسمع وش رأيك نخليهم كلهم يعودون معنا ؟؟؟

قال وشلون ؟؟

قلت له شف إنا نبي نلف بالموتر ونبعد شوي ونطفي نوره .... زيييين !! قال زين
ثمـن نبي نعوّد لهم ... وأبي أروح لهم بلحالي وأقولهم إني وديتك للمزفـلت
وركـبت مع شباب من أخوياك ورحت معهم
وبعد شوي ....

قال منذر إيواااااااااااااااااه وبعد شوي .... وش يصير ؟

قلت أبد ... تترك الموتر... وتجينا من ورا ذاك الطعس ...
كأنك هايش يبي يهاجمنا وياكلنا ... بس حاول إنك تبعد عن أبو مرضي لايمسكّ ويجلد بك الارض

والنتيجة هي وحدة من ثنتين يــا ....

إن الشباب يبون يخافون ونسري

ولاّ

أن الجو بيـزبط لك ونكمل السهرة

هاااااااااه وش قلت ؟؟؟؟

قال تمام !!!


والله ونسوي اللي أتـفـقنا عليه

واروح لمهم ... أسلم وأجلس معهم بس مقابل للطعس اللي بيظهر منه الوحش عشان أكون أول واحد يهجّ عشان أخوفهم زيادة ... تخطيط ... ولا يوردانيسكو

وأحتري ... واحتري ...

وفي تلك الاثناء – مايمديكم صح – منذر كان عند الموتر ووده يروح يم الطعس اللي متفـقـين عليه ...
بس شاف أن الطعس بعيد شوي وهو خاف من المشوار لعند الطعس ويمكن يطلع له جني ولا سكني
وبرضو خاف إنهم يشوفـونه العيال فتـنكـفـش الخطة , ثمّـن يمسكنا أبو مرضي يلعن خامس خامسنا

قال ياواد يامنذر بدل ما اروح من ورا الطعس خلني إنطلق منّـا من عند الموتر

.
.
.
المهم ويلبس تكميله سودا مغبرة لقاها في الموتر ويجـينا وهو يركض على أربع تقـل ... تقـل ... جـعّـري
وتعرفون الشخص لما يركض بالظلام وهومايشوف دربه يصير يركض ركضة غبية مال أمها داعي
.
.
.

خوينا سعد أبو تقـويم شاف ذاك الجسم الغريب اللي يركض بطريقة غريبة ومن بعيد
فـ إنهبل الولد .. و.. و.. جن جنونه الكروي على قولة معلق الاوربت ناصر الاحمد
وقام يصيح ياجماعة وشو ذا اللي ناصينا من عند الموتر... و... العطّـة يا بطّـة

الدحمي خوينا الرابع ... ياهو ارنب ... قحص ... وحط رجله غرب ...

أنا لازلت مكاني أناظر شمال يم ذاك الطعس المشئوم والـتـفـت شرق على صياح سعد تقـويم
إلا ذا اللي ناصينا ومافيه ....الوحش ...ماكـلنا...ماكـلنا

قلت : منـ.. منـ.. منـذر .. أنا خـ.. خـ..خابره بيجي منّا ... مهوب منّـا ...
يعـ.. يعـ.. يعـني ذا مهوب منذر... أجل وشوووووو ؟؟؟
وانقز في كرش بطـلنا وسبعنا أبو مرضي

أبو مرضي الضعـيّـف جاه العقربقر وجمد مكانه من الخوف لاهو اللي قام يركض مع الراكضين
ولا هو اللي يصيح مع الصايحين... بلّـم ... تبليمة يحبها قلبك من الخوف

يبو مرضي.. يبو مرضي... ياوحشنا ...يا بطلنا ... يا أسدنا ... طيب ... قم .. قم إنحش بعمرك يالزلابة
و... اصطّـره بكف ... عشان يصحى ..

وهو اللي يقوم من الخوف ويشيلني وينطلني بكل ما أوتي من قوة على هالوحش اللي ناصينا
ويعـطّ ... والله ياعليه إغبرة بعد ... تـقـل ... كسارة حـصى ...

المهم أنا أسـتـسـلـمت لقدري وغمضت عيوني وقلت خلاص قد هي وزت ... قـدني ماكول ماكول ... وشوله التعب

إلا وذا اللي يشوتـنـي .... قم ... قم .... هاه وش رايك ... خوفتكم ...

وكنه صوت الزلابة منذر , وأفتح عيوني إلا والله أنه هو ...

غربلك الله.. وش سويت فينا أنت ؟ وأصطره مع عـلباه بعد أن أستعدت قواي وبرستيجي
.
.
.
ونقوم انا وياه نزهم فلول الشلة اللي من غرب واللي من شمال واللي من جنوب

الوحيد اللي ما بيّـن- بعينك على كثر ماجاك - هو أبو مرضي عيّا لايجي ويطلع من السيارة ...
يقول يمكن فخ مسويه له الوحش عشان يطلع وياكـله بعد هو ..
.
.
.
يبومرضي الله يهديك ذولي حنا شلة الوراعين
اللي طلعت أنت أبزر منهم وحدّك تـكـشت إذا أبعدت بالكثير في حديقة مكتبة الملك فهد

من بعدها أبومرضي زعل علينا ولاعاد يسمينا إلا شّلة وراعين الثمامة ... قصدي ... شجعان الثمامة ..

.
.
.
.

على فـكـرة القـصة حقـيـقـيـة ولـكـن بتـصـرف

وخروا عني !!

هلا والله خنبوق

تصدق عاد قصتك يبيلها مخمخه

عاد يا اني امخمخ عليها واقتبس ولا عاد ارد عليك رد عادي

على حسب المود

طبعا الحين موب معاي لاني ما نمت ولاني بالدوام

خلني اروح البيت وانام واقوم من النوم ثمن افكر امخمخ

جاسم

لي رجعهـ..

مصيّول بن جورج

ههههههههههههههههههههههه


قوصه منتهيه

اونواع الاقلااااع

والصز حسيت بام الركب وانا اقرا القوصه

والله يعطيك العافيه يا خلفهم

خنبووووق

خنبووووق

خنبووووق

A L X S

حلو يا خنبوق
وتسلم على القصة

الفلتر

مشكوررررررررررررررررررررررررررر

$ قمر 14 $

شكرا ياخنبوووووووووووووووق
جزاك الله خييير
وانت بعد يا وخروعني
تعياااااااااااتي

$ قمر 14 $

شكرا يا متدى خنبقة والله انتو فيكم فنبقة كثييييييييير
جزاكم الله خير
تحياااتي

خنبووووق

سكرتير ابليس

السز اني متعيجز اقراها


تويله مره

على العموم سكرا على القصيده<<<<ه ه قصدي على المسرحيه( شكله سكران )

بايات