وش رايك بالزوج الي يتزوج على زوجته ؟!!

-[بسم الله الرحمن الرحيم]-


السلام عليكم ورحمة الله وبركاته !!

هوووووولآ بـ كل عيال وبنات خنبقة !! يالله ان تحييهم وتبقيهم ..

شلونكـم يابعدي ؟ شخباركم ؟ !! وش من جديد !

وراكم تطالعون فيني كذا ؟ صحيح اني دبشة بس يمديني اكتب مواضيع جديّة وكذا لاحد يطالعني تسذا !!

بصراحـة منذو مبطي وأنا ودي انزل موضوع بهالقسم .. وخاصة إن هالموضوع شاغل بالي من زمــان !!

وكنت اتسائل بيني وبين نفسي .. وأقول : وش فيها لو تزوج الزوج على زوجته ؟!

سؤالي للبنات / وش راح تسوين لو يتزوج عليك زوجك !!

سؤالي للعيال / وش الأسباب بنظرك الي تخلي الزوج يتزوج على زوجته ؟

فيه شباب يعتبرون ان الزواج من حرمتين ولا ثلاث من حقهم ولازم ياخذون حقوقهم كامله في حياتهم !!

وانا من وجهة نظري اقول : صحيح .. هذا حقك ، ومن ابسط حقوقك انك تتزوج بكم وحده !! ليش تحرم نفسك من حقك ؟؟

أعتبر الي يحرم نفسه من حقـة في هالدنيا . إنسان لامبالي !! حاضره زي ماضيه ولا يفرق عن مستقبله

واعتبر الزوج الي متزوج زوجتين .. او اكثر .. ذكي .. لأنة لقى سعادته بشيء حلله رب العالمين !!

طبـعا بتكلم عن نفسي .. وياليت كل عضو فيكم يتكلم عن نفسه وعن وجهات نظره ..

أنا لو تزوجت لاحجت البقره وزوجي فكر يتزوج علي !! تدرون وش راح اقول له ؟؟ راح اقول : اذا تبيني اختارها لك وأخطبها لك ماعندي مانع !!

اساسا انا بزعجه الين يتزوج وحده ثانيه .. وعندي اسبابي ..

بتسألوني : ليش ودك لو زوجك يتزوج عليك ؟؟؟

بقول : 1- ما احرمه من حقه في هالدنيا ، ومن شي ممكن يسبب سعادته !!

2- مسؤولية البيت والطبخ والنفخ تقل بنسبة 50 % .. يعني يوم علي الطبخ ويوم على جارتي !! بكذا راح ارتاح بالإسبوع اربع ايام ولو بغى يتزوج ثالثه راح تكون مسؤوليتي بالأسبوع مرتين بس !!

3- العدل يكون من صالح المرأة .. لأن الجاره ممكن تلب منه مثلاً يسافر معها !! وبكذا يضطر انه يسفرك اول مايرجعون (عشان يعدل)!! أو مثلا الجاره تطلب فلوس .. يضطر انه يعطيك انتي بالمثل حتى ولو ماطلبتي !! بس عشان يعدل !!

وبكذا راح تكون حياتك اسعد !! بدون هموم !! وبالوقت الي بيكون زوجك مو موجود (عند جارتتس) .. تقدرين تروحين لأهلك وتطلعين مع صديقاتك .. وتعزمين الي تبين في بيتك .. وتسوين الي تبينه .. مافيه ارتباط بالزوج !!

لأن الزوج لو دخل على زوجته وهي عازمه ناس او انها ناويه تطلع .. بيقول انتي مافضيتيلي ولا فضيتي للبيت .. وبيبدون يتهاوشون ..

يعني خلاصة كلامي .. ان المرأة راح تاخذ كامل حريتها كل ماكثرت عدد زوجات الزوج !!

بتقولون بـتغارين عليه !! هو لي مو لوحده غيري ؟؟؟ [هذا كلام مسلسلات] ..

المسلسلات شوهوا نظرة الزوجة للزوج المتزوج من اكثر من وحده !!

تقول جدتي !! ان اول على ايامهم كانت الحرمه ترقص بزواج رجلها !! يعني ماخذين المسألة عادي ..

لدرجة ان جدتي تعرف وحده كانت جالسه مع زوجها على الغداء .. وقبل يكمل أكله قال لها : لاتسوين العشاء الليله لأني ابعرس ( ماقال لها الا بنفس ليلة العرس )

تدرون وش ردت عليه ؟؟ على بالكم صاحت زي حريم الحين وقالت له طلقني ؟؟

ردت عليه وقالت : الله يوفقك أجل بكرا عشاكم علي

ولا كأنه صار شي .. من جد انتم مكبرين المسألة

ومن يوم دخلت التلفزيونات للبيوت وشافوا المسلسلات المصريه .. صاروا يكرهون الزوج المتزوج من حرمتين !!

طيب ليش ؟؟ وش فيها ؟؟ واحد يبي يفكك من شره ويتزوج عليك ، وراه ماتفرحين ؟؟

ان كنتي تكرهينه ، فـ بترتاحين منه لأنه بينشغل بالزوجه الثانيه !!

وان كنتي تحبينه !! فأكيد انك تبين سعادته .. وتطمحين لها !! وبذا هو بتتحقق سعادته !!

بتقولون يالوليتا عشانك مو متزوجه تقولين هالكلام .. ولما تتزوجين راح يتغير كلامك !!

برد عليكم واقولكم أنا ماراح اخذ الا واحد متزوج من اساس !! .. أو اني اخذ واحد اشرط عليه يتزوج علي ..

مانيب ناقصه مسؤوليات أنا

انـا ما اقول لاتغارين على زوجك .. ولا تزعلين !! لأنك ماتقدرين تتحكمين بمشاعرك ، وممكن هالشي يسبب لك صدمه !!

لكن اقولك ، لا تمنعينه .. ولاتقولين : اذا تبي تتزوج علي طلقني !!

::

تصدقون فيه وحده اعرفها قايله لزوجها : ان تزوجت علي ابيك تطلقني ؟!!!

صدق انها ناقصة عقل !! معقوله تضيع مستقبلها ، وتضيع مستقبل عيالها عشانه بس فكر يتزوج عليها ؟؟

طيب ليش ؟؟ نعنبو حيها تبي تحرمه من حق من ابسط حقوقه ؟؟

والسبب عشانها تغار عليه أو عشان صديقاتها وقريباتها مايشمتن فيها.. ههههههه الحمد لله والشكر ..

::


لاتقولين انه مافكر يتزوج عليك الا عشانه شايف منك شي ؟؟ ولا انك مو ماليه عينه !!

الرسول صلى الله عليه وسلم متزوج 9 نساء مع العلم ان ولا وحده منهم تقل عن الثانيه بشيء .. وكلهن امهات المؤمنين ..

يعني فكرة انو الزوج مايتزوج على زوجته الا ان كانت مو ماليه عينه ، هذي فكرة خاطئة 100%

اغلب الرجال الي متزوجين زوجتين .. يحلفون ان زوجتهم الأولى ماقصرت معهم ابد .. لكنهم يبون يتزوجون ثانيه لأنه مافيه شي يخليه مايتزوج على زوجته وهذا حقه !!

طيب يمكن عنده ظروف فوق طاقته تخليه يتزوج عليها .. مثل لو يكون ساكن بالرياض وشغله بالشرقيه .. ليش مايتزوج وحده الرياض ووحده من الشرقية !! عشان مايلجأ للحرام !!

أو مثلا ان طاقته اقوى من انه يفرغها بوحده ( ماراح اتعمق بالكلام ) .. فلازم يتزوج ثنتين او ثلاث .. وإلا بيلجأ للحرام

اتحدى وحده تجيب عذر مقنع بأنها تطلب الطلاق اذا زوجها تزوج عليها ؟؟


مهمه كانت الأعذار فهي كلها من تأثير المسلسلات

تدرون ان سبب العنوسه بالسعوديه عدم تعدد الزوجات ؟

بمدينة جدة يوجد حوالي 40% من نسائها عوانس !!

بينما بمنطقة القصيم توجد فيه عوانس بنسبة 8 % بس

مصدر النسبه / جريدة الرياض !!

تدرون ليش ؟؟ لأن اهل القصيم اغلبهم يتزوجون على ثنتين او ثلاث .. عشان كذا ماتبقى عوانس بهالمنطقه ..

يالبا قلب اهل القصيم .. مع اني مالي علاقه فيهم الا اني معجبه باللي قاعدين يسوونه ..

اغلب رجالهم متزوجين على كم زوجه ..

والدليل كل ماتروح مكان بالسعوديه لازم تلقى قصيمي او قصيميه .. عددهم كثير ماشاء الله .. وبناتهم يتزوجون وماتبقى ولا وحده !!

بينما جده .. تقول الزوجه لزوجها : اذا بتتزوج علي طلقني !! وبكذا ماراح يتزوج عليها .. او راح يطلقها ..

وبتكثر نسبة العوانس بالسعوديه !! والسبب افكار بنات جابوها من مسلسلات بالتلفزيون !!


....


بالنسبه للشبـــــاب : انت بنظرتك وش السبب الي يخلي الزوج يتزوج على زوجته ؟؟

هل هو تقصير منها ؟؟ أو يبي عيال اكثر ؟؟ أو لظروف مشفره

أو حايمة تسبدة منها ؟؟ ولا زيادة فلوس مايدري وش يسوي فيها !!

بيني وبينكم يا شباب .. أنا اشجعكم على الزواج من عدة زوجات ..

وربي راح تلقون الراحه والسعاده .. كل وحده تبي تخدمك من عيونها .. وغير كذا راح تريحهم من شرّك والطبخ والنفخ عشانك

اقل شي لا بغت زوجتك تسافر مع اهلها ماتصير عزوبي .. تروح لزوجك الثانيه

او كانت زوجتك بفترة نفاس عند اهلها .. ماترجع عزوبي بعد : (

وغير كذا لاتهاوشت مع وحده منهن ماتروح للبحر وانت زعلان <<تأثير افلام.. لا .. تروح عند الثانيه

عاد عبروني .. وياليت تعطون هالموضوع حقه بدون هواش وتعصيب ..

مجرد وجهة نظر .. ان تقبلتوها كان بها

ماتقبلتوها .. عاد الشكوى للي ماتنام عينه : )

صحيح وجهات النظر ممكن تختلف .. والوقت والزمان والعادات تختلف .. لكني مافتحت هالموضوع الا عشان اوضح لكم وجهات نظري .. اذا كنت غلطانه فصححولي ، وان كان كلامي صحيح .. فأتمنى اني قدرت اقنع احد بهالشي مع اني ماهقيته ابد

سلامووو

لوليتـــlolittaـــا