كيف تعرف إن الدختور نـذل ؟

بسم الله الرحمن الرحيم

وشلووووووووووووونكم عساكم طيبون
هذا اول موضوع لي ، وتوي كاتبه
قاعد اهوجس في القاعة ويطب علينا الدختور وانا اللي اقعد اطلع عذاريبه وبسدحها لكم هنيا
طبعن اللي درس جامعة بيعرف ان ذا الاشياء تصير صدق ولاهيب خرابيط
خويكم خبرة اربع سنوات في الجامعة ومر علي اشكال والوان من الدكاترة
فيهم ناس والله إني اتذكرهم واقول الله يذكرهم بالخير ويوفقهم ،
وفيهم ناس والله اني ادعي عليهم وعلى اليوم اللي صاروا فيه مدرسين
يجيك بعضهم يحط لك أسئلة كنه يقول أتحداك تنجح
والا قد شفتوا اختبار نحو اختار؟
ولاهوب اي اختار ، كل فقرة يبي لها ساعة تفكير عشان تحلها صح
الموهم بسدح لكم هنيا العلامات أو الاشارات اللي تعرف بها الدكتور النذل من الدكتور الحبيب
لأن أحيان المظاهر تخدع.
وهذي هدية للي توهم مسجلين جدد في الجامعة ، ولا ودنا يجيهم ماجانا << اخس يالاخلاق؛)

مواصفات الدختور النذل //

1ـ تلقاه يسجل غياب من اول يوم ، مع ان محد يحضر ولا فيه دراسة أول اسبوع .

2ـ المحاضرة مثلاً الساعة 5 م تلقى الدختور مسنتر عند باب القاعة الساعة 4.59 م

3ـ ما يطلع لين يحلل ام المحاضرة، لازم يطوف على الوقت الاصلي

اذكر دختور درست عنده بدأت المحاضرة الساعة 5م يعني المفروض تنتهي الساعة 5.50 م
تصدقون انه ماطلع إلا 6.20 م ؟ نص ساعة محطنا بها زيادة
ويوم واحد كلمه قال عندي درس بخلصه واللي مو عاجبه يطلع

4ـ يجيك أول محاضرة ويقولك : (( أنا بعطيك حقك ولانيب ظالمك )) إذا قالك كذا اعرف ان بتحمل المادة الله لايعوق بشر.
5ـ يطلب منك كتاب او مذكرة ، واذا نسيتها اول شي يقولك اياه: اطلع برى .
لا ويقولك روحوا اشتروا من المكتبة الفلانية، عشانهم يعطونه نسبة ابن الذين

6ـ تبطي تدخل بعده، يعني اذا جيت ولقيته في القاعة اغسل يدك منتب داخل
لكن اتحداك تتنفس إذا تأخر هو عن المحاضرة .
يعلمني ولد خالي يقول دختور قالهم محد يدخل بعدي، الموهم وصل الطالب والدختور عند الباب سوى
الطالب قال للدختور تفضل تقديراً له ، ويجي الدختور يدخل ويصك الباب وراه

والله لو سوى فيني كذا الدختور لأفتح الباب واقول: الشرهة مهيب عليك على اللي يقدرك لابوك لابو التسلب <<< تهور

7ـ مستحيل يسمح لك تطلع قبل ماتنتهي المحاضرة، واذا سمح لك بيكون بشرط انه يسجلك غايب .
واحد يعلمني يقول: قلت للدختور عندي موعد لازم اطلع ، قال ترى بدعي عليك
وين عايشين يبو؟
خويي يقول خفت لااطلع واصدم بسبب ذا النذل بغيت ارجع

8ـ إذا جاه ضرف لاقدر الله ، يرسل واحد من خوياه عشان يحضر الموجودين <<< مسوي فيها أمين

9ـ ياويلك وياسواد ليلك لو يجي ويلقاك واقف برى في السيب
ياللللللللللللله هذي تعتبر كارثة وجريمة .
دختور عندنا قد طب علينا وقال فلان وفلان وفلان برى
ليش ؟
قال واقفين في السيب <<<< ينعن ام العذر ياشيخ قل مابيكم في محاضرتي وفك نفسك

10ـ ما يسمح لك تناقشه في أي مسألة ، خلك مثل الكرسي اللي انت قاعد عليه
و اذا بغيت تبدي رأيك في اللي سمعته ما يعطيك وجه .

اذكر كنت دايم اتلقف على الدختور وانشب له كل شوي اطلع بكلمه، يوم خربتها معه ناظرني بنص عين
قلت خلاص منيب متكلم الله يلعن ام اليوم اللي شفتك فيه
اول مرة اشوف دختور مايحب الطلاب يشاركون معه

11ـ تلقى في يده شنطة <<< هذا انحش منه ولا تشاور.

12ـ ياويلك لو يسألك ولاتجاوب ، والا يقزك ماعندك مذكرة والا ماعندك دفتر .

13ـ أي إجابة تجاوبها بقولك غلط ، حتى لو كانت صح.

مثلاً يسألك عطني اسم منتديات فيها رجه تقول : خنبقه
يقول لا هو فيه اكثر من منتدى وكلها رجه ،، يعني يمشور بك طريق الملك فهد ويطلعك مع خريص
ومناك على النسيم ويرجعك منفوحة وانت ماتدري وش المطلوب.

14ـ اذا جاوبت على سؤال نشب لك، بيصير كل ماسأل سؤال ناظر فيك هااااااااااه يافلان


15ـ لو بيموت ماغاب ، يعني تبطي يغيب
دختور اليوم نقوله يادختور الربوع وش رايك فيه؟ قال : دوام عادي
قلنا يابن الحلال الدخاترة اعتذروا كلهم، انا طلعت وهو يتكلم قلت : غايب غايب والله لو تحرمني في المادة مااجي .

اممممممممممممممممممم
ترى خلص الماضوع انتو وش رايكم في الحتسي؟