|
|
|
|
التسجيل | إسترجاع كلمة المرور | تفعيل العضوية | طلب كود تفعيل العضوية | إتصل بنا
19-11-2007, 06:59 AM
|
#1 |
 
|
يارووووحي يالسفاره الامريكيه ::d::
يااااااااااااوتس يااااااااوتس ياااااااااااوتس ع الي شوفتوه واللي سمعتوه فيذااك ياااوتس
 اولا احب احييكم واقول لكم اسيكم بالخير اسيكم بالنور اسيكم بالعنبر والبنوور هما لا قالو من طول الغيبات جاب الغنايم انا اقول من طول الغيبات جاب لعنة الخير والفشايل وقسم اشك انكم بتقطعون العلاقه فيني عقب هالسالفه وتشهد ازوفه وصورة الفيزا الله لا يعيدها من صوره المهم كلكم تعرفون اني حرمتن ناويتن اعرس و اهج لم امريكا واحاول اعيش حياة الفهاره هناك وانسى اصلي وفصلي وامن جابتني عقب ما اوصل فيذاك << عقوق الله لا يبلاكم الزبده اني من يوم شميت خبر بسالفة العرس وانا حاجزتن موعد للسفاره عساس اخذ الفيزا واركزها في جوازي المصون ابو ختمه وحده ما اقول الا الله حسيبي على ابوي فشلني عند راعين السفاره جوازن وش طوله وش عرضه واوراقن وش كثرها ما فيه الا ختم واحد  يحوول وقسم تسني بها موظفة التدقيق تناظر بجوازي وتقول الله من الخساير يومنتس طفرانه بنت طفران وشوله صارفين لتس جواز تسان ختموا لتس في قرطاسة شاورما وتخب عليتس يا ذا الطراره اومير احاول ارقع لنفسي قلت هذا جوازن جديد يالسبهه جوازي القديم امتلا من زود الختوم وصرفوا لي ثلاثن بداله وهذا واحدن منهم خلصينا الله يجزاتس خير  ما امدان اكمل حتسيي الا هي مطقطقتن على كمبيوترها همن ناظرتني بطرف عينها قالت : وتسذبين بعد ؟؟ هذاني داخلتن على اسمستس في نظام الدوله ما سافرتي الا مرتين لمصر يومنتس بصوه ما بعد بلغتي واولة العام رايحتن لدبي اومير اقمط العافيه وانكتم  يعني زود انهم لاطعينا في شموس رب العالمين حول ساعتين يحتسون ومغير يعايرونا عشان حنا فقراء  << موافق لعن الله هالوجه وخر احتاج الزاويه المهم خن اقول لكم وش نظامهم في سفارات الكفار هما لا قالوا تكنلوجيا تراهم صادزين  اول شي لازم قبل تاخذ الفيزا بشهرين تحجز لك موعد عن طريق النت اطال الله في عمره وجعله ذخرا لنا همين يرسلون لك ايميل يعلمونك وشسمه متى لازمن تجي ومتى موعدك وبعضن من الارشادات وتسذا ناااه دوكم وشهم مرسلين لي << سطير اسفط على جنب وانا امك اطمر هالسطيرات تلقى الترجمه تحت Applicant's Name: ma 7olik a7d Appointment Time: 8:30 AM Consulate: U.S. Embassy - Riyadh Visa Type: Academic University Other Security Advice: Please arrive at the embassy 30 minutes before your scheduled appointment time. The appointment time is not the exact time of your interview. You may not enter the Embassy with guns, cellular telephones, photographic or video cameras, electronics such as radios or other equipment, including computers. Please do not bring any type of electronic equipment. Please do not bring any large bags, briefcases or backpacks. يقولوووون وشسمه موعدكم الساعه ثمان ونص من صبح رب العالمين تعالوا قبل الموعد بنص ساعه عشان يمدينا نضيفكم ونقهويكم هااك القوة السنعه الممزوجه بالفودكا المعتقه ونقوم بالواجب معكم بس ترا يمتسن نتأخر عليكم شوي بالموعد العذر والسموحه ممنوع تدخلون السفارة بالاشياء التاليه :- ممنوع تجيبين معتس بندقتس او ساكتونتس او اي نوع من انواع اسلحتس الفتاكه << خابرين اني منيب امشي الا والفرد تحت ابطي مير اشوا انهم علمون  - ممنوع تجيبين جوالاتس معتس الا تسان عندتس رقم مميز ذيك الساع نسمح لتس تدخلين الشريحه بس - ممنوع كميرات عاديه او فيدو او فوريه ولا كمبيوترات ولا اي شي الكتروني لو ساعتس اللي به اله حاسبه لا تجيبينها - خلي بقشتس في بيتكم ولا تجيبين اي من خنابيدزتس معتس << صكو علي عيال التسلب ناويتن اجيب معي جلابيات ابيعهن على موظفات السفاره ماتيلدا وروزي صرنا صديقات الله لا يفرقنا عن بعض يارب  المهم ما جت الساعه 7 الا وانا مرتزتن فوق رويس عمي وهو راقد ومغير انغز رجيلاته : ياااااوتس ياعمي وذا الشطوب برجليك  بالله عليك حكهن بسرعه بالمفرش ابشوف هو يطلع ريحة حسحسة المفرش ولا لا وهو اللي ينقز واقفن فوق السرير من زود الروعه : هاااه تسم الساعه ؟؟ انا : سبع ونص يالله هااك ثوبك وشماغك ونعالك قم قم لا نتأخر على ذا الفرنجه ترا مواعيدهم على الملي قم ياعمي يالله الوقت من ذهب << يقالك ابحمسه هالحين اشوا انه لعفني بالطفايه على خشتي اللي تراقلن ضروسي وعقب عشر دقايق من التقهوي وتنقيب التمر قام عمي وركبنا سيارتنا الرانج الرمادي ابو جنوط نيكل << تحك راسها تقول كودهم يصدقون ومرينا المحطه نعبي بنزيم ويقعد عمي ساعه يشاور روحه يعبي 91 ولا 95 وانا حرمتن اعصابي ما بقى الا هه وتنفلط واطلع خمسين من بوكي واطل على الهندي : يا صديييق عب 91 و جب 2 مالبورو احمر لي وواحد ابيض حق بابا جلدي جلدي << يحلفون ان عمي بغى يتبرى مني اشوا اني ماخذتن ولده ولا تسان اغتالني في لحظتها وصلنا لمواقف السفاره بالسلامه وياطووووول الطريق من المواقف للسفاره ياااااوتس وقيم معاناة خاصلة لا صرت متميلحن روحك ومسوي انك كيوت ولابسن صندل اختك كوكي اللي اصغر منك بمقاسين يااااوتس ما امدان اوصل الا التفافيخ ماليتن رجيلاتي ويوم وصلنا ونوقف في سرا قدام الباب طابورن تسنه مصير بليس وجع وجع كل ذا العالم بتروح امريكا وقسم اشكال والوااان هالعالم شي يلوق له امريكا وشي مااااااااايلوق ابد  مير واحدن قدامنا ياااااوتس ليت من يخطفه لازوفا والله ان تخق عليه لابسن هااك التي شيرت البني والجينز الديرتي ومحلق ومحدد ومتنظف يقول لجاك افهدز وانا اقعد محلك ومهب زين وبس وايضا يساعد الاخرين ينظار اوراق هذا ويعلمه الناقص ويناظر قراطيس الثاني ويساعده ويعبي معه النوذج وانا اقول في نفسي كووود تصير اوراقي ناقصه ولا جوازي منتهي عشان يحاتسين شوي اعرف وشهو من لحيه عاااد وهو يحتسي مع واحد وانا ناطلتن اذني معهم اسمعه يقول انا اشتغل بالملحقيه السعوديه عشان كذا اعرف الاجراءات << حبيت الملحقيه احس انها انثى الملحق والثاني يقول له : طيب اكيد معك بطاقة دخول وراك صافن معنا سرا قال ويالبى قوله : ليش ادخل قبل هالناس اغلبهم جايين قبلي وصافين وانا ادخل قبلهم بكل بساطه ؟؟؟ لا يا اخوي انا زيي زيكم ما فيني زود عنكم  يااااااااااااااااااااااااوتس ياااااااااااااااااااااااااوتس يااااااااااااااااااااااااااوتس الى ابد الابدين متى نوصل البيت اعلم ازيف عنه تروح تجيب خبره صدق اني بغيت اصمخه كف على خشته على الهباله اللي هو فيها وصدق اني بغيت انطل وجهي واقول يعطي الخماخم للي ماله اذان عطن البطاقه لعن الله شكلك واقفتن لي ساعه واثر معك بطاقه دخول وساكت  بس ولو  وانا واقفتن مفهيه مع الاخ ما دريت الا ذاك الكور الاسود اللي خامطن اوراقي وانا اللي اخمه بقفى يدي على عينه قال : OH DEAR GOD whats wrong with u mam << يعني وش بلاتس ياخيه قلت : الله ابوو من جمعكم يا تكارنة الجن وش تبي باوراقي هاه ؟؟ اثر المسيكين تبع السفاره يدقق بالاوراق ويناظر النماذج تسانها صحيحه خلانا بالسرا ولا تسان بها غلط ولاشي يمدينا نسنعه قبل ندخل واعطيه الاوراق واوريه قال ورين الصور اللي مصورتها عشان الفيزا وانا اسوي نفسي ما سمعت قال : sorry but i have to see them انا : ( قمة التناحه  ) ولا كني افهم شي قال بالعربي : اريد ان ارى الصور لو سمهتي << دهن الله ابو من جابه يعرف عربي التسلب واعطيه الصور وانا ماااش ما ودي ابد مير لو تشوفون الصوره ما تلوموني << يحلفون انها تشاور عمرها ترفع لكم الصوره ولا لا غاديتن تسني ايرانيه شبعانه وصايله وراها حسينيه ما تبي تتأخر عليها ومير ينطل الصور في وجهي يقول هذي الصور غلط لازم تصورين صوره وتطلعين شوي من شعرتس من لم الجبهه روحوا لم الاستديو اللي فيذاك وصوروا صورن ثانيه واروح انا وعمي طربق طربق لم الاستديو الله يالاستديو عاد غريفتن كبر عيني فيها 3 فلبينيين و سعودي قاعد على الكمبيوتر وكرسي بالوسط ومير يدزني عمي ويقعدني على الكريسي ويالله افتشي صوري وانا اناظر ياهووه الحجره كلها رجاجيل والناس صافين رجال وحريم بيصورون شلون افتش ويرجمني عمي بقارورة المويه : اقولتس افتشي ابلشتين انتي وصورتس من زينتس عااد اقول لتس افتشي اومير افرع من غير رايي واطلع شعري من فوق زي ما قال وتوووني ابفك خشتي للكميرا الا حرمة ناقزتن بوجهي : لااااااااااااااااااااااااااااااااااااااااااااااااء بسم الله علي وش بتس ياتبن غرفتي قلبي قالت : لاااااء غلط طريقتس انا تو سويت زيتس ورجعوون قلت : اجل وشلون اسوي ؟؟ قالت جعل امر الله يقول بها : لازم تطلعين اذانتس هاااااه وش اذاني اللي بطلعها قال الفلبيني : مدام برنج يور ايرز اوت يعني طلعي اذانتس قلت شلون اطلع اذاني وانا متحجبه تبون اغدي تسني قرد ؟؟؟؟ قالت الحرمه : همااا الحجاب سوي تسنتس ناصر القصبي في طاش ما طاش قلت احلفي بس وذا الفلبيني شااااااااايش علينا ابطينا عليه بغى يشوتني مع الباب اومير سويت ستايل ناصر القصبي واطلع اذنتاااي المملوحتااان من خلف الحجاب واثار العار والخزي تملأ محيياي والحرمه تناظر فيني تقول ماشاء الله عليتس قمر انتي واذانتس وش ملحتس اومير اتفل في وجهها واعود اناظر الكميرا انا واذاني غاديتن تسنها رادارات قلت اطقع ما اشوف هم اهم شي تطلع ذا الفيزا وبس واناظر عمي من بعيد واحس انه يتصدد عني ما وده الناس يعرفون اني تبعه وانا اللي اكيده مغير أأشر له اقول عمي تعاال شف الصوره هااه زينه اعتمد ولا لا ويومي برويسه يقول ايه ايه زينه اخلصي علي بس واطلع من الاستديو واقعد احتري الصور برا ما دريت الا ذا الفلبيني جايني طاااير مداام تعالي شوي الصوره اذن طالعه والثانيه ما طلعت قووه نصور ثانيه بغيت اتوطى في بطنه واعود ادخل وافتش ثانيه واسوي الحركه واناظر احتري الفلاش يقب في وجهي مااادريت الا انا المح الرجال اللي معنا بالسرا راعي الملحقيه ويناظر فيني وانا مفهيه اتفوكر في نظاراته وناااااااااسيتن المنظر اللي انا فيه وهالدشوش اللي طالعات ما دريت الا الفلبيني يكبس في وجهي : مدااام سوف كااااااميرااااااا قلت : بلاك ما تسوف اللي انا اسووفه صور بس صور ونشك هالصوره الثالثه بنفس المنظر المنحط واطلع لعمي واثره يا حرااام وده يطب من فوق العماره تووني ابحاتسيه واحاول اخفف عنه الا المصور جارني مع علباي تئااااالي صور مره ثانيه لعنبوووكم من مسلطكم علي يا عيال الترس صورت 3 مرات وش تبون قال : هذاا ميموري خربان سوي صوره ثانيه << اقسم بالله ما حلفتوني ان ذا الكلام صدز صايرن لي مير انا ادري اني مقروده بس عاد مهب لذا الدرجه الزببببببده طلعنا من الاستديو النحس ومعنا خمس صور مفجعه يحلفون ان اللي يشوفها لازم يزغل مرتين او اكثر واسألوا ازوفا عنها جاها شهاق من زود الضحك اللي ضحكته علي مير ما يخالف هماهم بيعطوني فيزا هماي بسافر امريكا هماي بتفهر وبلبس شورت هناك وبسوق واللي يحاكيني ابلعن امن جابته ما علي من احد عقب ذا كله ابشركم جا دورنا ودخلنا للسفاره  لعنبوها من سفاره فيها مليون باب وبين كل باب والثاني سير تفتيش وكاشف معادن وحاله كل ما بغينا نزرق مع باب لزووم احط الشنطه في السير وافصخ ساعتي واحطها وافرغ جيوبي وافصخ نعالي واحطها في السير همين اديور وانا حافيه ما تسمع الا صورت رجيلاتي في بلاطهم مير يازيييين بلاطهم زيناااااه ياااوتس يانظفه ويازين ريحه والله لو تنتسب غداك فيه محدن يلومك هاللحين الساعه 9 ونص وتونا ندخل لم السفاره <<< هذرررررهم اجل موعدنا 8 ونص الله من الخرط  ونعطيهم الاوراق وناخذ رقم للمقابله عشان يشوفون وش انتي يا ماحولك يخافون اني ارهابيه ولاشي لازمن يقرروني شوي همن يعطون الفيزا ونقعد في غرفة الانتظار ارررررررررررررربع ساعات ونص وقسمن تيبست وشسمه من زود القعده على الكرسي وعييناتي مغير تلاقط اتفرج على خلق الله بس ماااش ماهنا اشكالن تشجع وامشي هالاربع ساعات يا اقرى لي ورقتن طايحه يا رايحتن اشري لي مويه وكل شوي ناقزتن للحمام مير حماماتهم نظام امريكي ما بها مويه ابد مشه بالمنديل ويسد مير ليت هالانتظار على شين يسوى ذا المقابله مغير موظف ورا شباك ويسأل اسئلتن ماصخه ما كملت دقيقتين اول ما جيت لم وشسمه الموظف امريكي ومير افتش له قلت بكيفه هماه بيشوف الصوره ام اذاني خله يشوف الطبيعه احسن قال : هل تريدين المكابله بالعربي ام بالانجليزي ؟؟؟ انا : عربي الله يجزاك خير اخاف تسألني شي تسذا ولا تسذا همن اخوره ولا عاد تعطون الفيزا الموظف : جيد ,, لماذا ستذهبين الى اميريكا ؟؟؟ انا : وشسمه زوجي وفلذة كبدي يدرس هناك  وانا سأذهب لأونس غربته الموظف : حسناً , كم لكم متزوجان ؟؟ انا التفت على عمي : اقول يا عم كم لولدك مملتسن علي ؟؟ ما دريت الا انا لازتن بقزازة الشباك من قوة الخبطه قلت : الهقوه انها 4 شهور تسان مخي ما ارتج مع ذا الصمخه الموظف وهو مستاحشن من عمي : هل تريدين ان تدرسي في امريكا ؟؟انا :ماهقيته وانا اختك الصدز اني ناويتن اقعد في البيت واتكاثر مبي حيل دراسه ابد الموظف وهو يختم الجواز : جيد جيد ,, خذي هذه الورقه و تعالي بعد اسبوع لتأخذي الجواز وشكرا انا : بااااس وهذي هي ؟؟؟ الموظف : نعم شكرا لكي رجائن طسي انتي وعمتس الى الخارج انا : ينعن ابو الذل يا شيخ قاعدتن ساعتين في الشمس و 4 ساعات متحنطتن فوق هالكرسي وهذي هي الموظف : هل تريدين فيزا الى امريكا ؟ انا : ايه ابي اجل وشوله مشقيتن روحي من فجرية ربي الموظف : اذن ظفي خشتك ولا يكثر توني ابحتسي الا عمي زانطني الين فقدت الوعي خمس دقايق ما دريت الا انا في السياره قدام باب بيتنا ويفتح عمي الباب ويشوتني همن ينطل ورقه خضرا في وجهي ويقول : يوم السبت روحي انتي وواحدن من اخوانتس علي الحرام ماعاد اطبه معتس ياوجه العنز قمت واقضب الوريقه واصفطها والفزها في وشسمه وانفض الغبار عن عباتي وادخل البيت والفرح والسرور يقوطر قوطره من خشتي بس متى اوصل للصاله عشان اوريهم الصوره ما يستفاد من الموضوع : * لاعمرك تروح للسفاره مع واحدن ما تمون عليه * حاول قبل تروح انك تزبن شندوشتة بيض وجبن في مخباك عساس اذا جعت تاكلها ترا بوفية السفاره ما فيها الا كبوشنو ومويه وباونتي * تمارين الارداف مهمه جدا في فترة الانتظار حتى لا تصاب بتيبس معوي * الملحقيه في قلوبنا * ازوفا بتصيحين اذا رحت ؟؟؟ * برعي مثبت والى المعرض بعد اكتمال الردود وانت ماكل تبن |
|
    |
|
19-11-2007, 07:22 AM
|
#2 |
|
رد: يارووووحي يالسفاره الامريكيه ::d::
أولي .. أولي .. أولي .. << ماسك سرى في طابور المدرسة
موضوعك بن كوولاب وطويل جدن بس مايصلح كذا أقراه بدون ما أفطر علشان ما أفهم غلط حجزت مكان اولي ولي باك |
|
|
|
|
19-11-2007, 07:27 AM
|
#3 |
 
|
رد: يارووووحي يالسفاره الامريكيه ::d::
اللي يحب الحلو يصبر على مره و تعب سفره وسفارته
وسعتي صدورنا الله يوسع صدرك ويعجل سفرك ماحولك احد تسلم الايادي ياعسل  |
|
|
|
|
19-11-2007, 07:51 AM
|
#4 | ||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
 
|
رد: يارووووحي يالسفاره الامريكيه ::d::
كح كح
يحلفون ان عيال اختس نامو وانتي طسيتي تنومين معهم وانا جلست انا وبلحالي وثالثنا ابليس يوسوس لي بحتسي خاثر يالله صباح خير بس الله يكفينا شر مابهذا اليوم ..
 عفواً انا اعرفتس؟ نذرن علي لو ما ان ورا هالصوره سفرتن لامريتسا ان اتبرى منتس بس معذوره ياخي بتروحين امريتسا تدشرين وانا فيذا اندب حظي
الحين ورا اهلي موزينه عني صدز؟ مير باتشي بيعطونه جوازه انا وراه مغضوبن علي <<بلاهم دارين عن نواياتس يالخسيسه
يصير اخت واخت يروحون للزاويه مع بعض << السربوت سربوت لو يروح للمسجد
<< مايعوق معه النصب ابد
اصييييييييييييير جينز ديرتي اصير كلي ديرتي ونوتي وكل ابو شي بس وينه ذا وينه وانا اجيه
ثمن بيهون عنتس ويسحب عليتس وتنطقين معي لا امريتسا ولاهم يحزنون << نعنبوتس يالنذله ماعندتس وقت
؟؟ياعيلان لايفوتكم رجل ماحولك وجهه تقل خبزه صاموليه طويييييييييييييييييل جاي من فوووووووووق لتحت وقسمن ابد هو والخبز الصامولي واحد نعنبوه مابه خدود مابه شي الاذع كيف الحال؟ بسم الله ماشاء الله ماعطيت رجل ماحولك شوي من هالخدود
مغير اطامر مطامر من طاوله لطاوله في حفلتس عساس سنعه وكذا بس شكل المقرود مقرود تم بحمد الله كولي تبن شوفيني رديت واجحديها يامدهونة الصير |
||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
|
|
|
||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
|
19-11-2007, 10:35 AM
|
#5 | |||||||||||||||||||||||||||||||||||||||||
 |
رد: يارووووحي يالسفاره الامريكيه ::d::
ااااااااااه يالقهر وياحرقت التسبد ويارداة الحظ هالحين ماحولك تروح لمريتسا وانا لي اكثر من الخمس وثلاثين سنه بهالسعوديه مابعد تعديت سدير وش ذا الظلم ياربي وش ذا الظلم <- مس ماحولتس والله وماقالت اجل جالسينن نحتريتس لنا حول السنه ونقول لا تصير ماتت الحرمه والا شي الله يستر فاقدينها هذا وهي مراقبه ومسويتن زحمه على بال امها مهمه واخر شي كلها تقضي بالسفاره الامريتسيه .. ياعميله ياوصخه يامداهنة الكفار وراضيتن على افعالهم بفلسطين وش يبي يقلعتس لديرة هالفجره ترى مايجوز لتس حرامن عليتس الى يوم الدين وانا ابوتس وتراني مانب محللتس ابد ان رحتي وبتبرى منتس الى يوم الدين ياقليلة الخاتمه ياجاحدتن اهلتس وديرتس وباعيتها بديرة الكفار < - يحلفون يالاصمعي ان قليبك يفرتس تسنه طيرن محجورن له بعش . . . هالحين عاد نبدى بالترحيب والعلوم الغانمه وهبهبت الريح لمعزبتنا الملعونه < - توك تذكر ترحب يالله حيها يالله حيها يالله حي الخاله انورت واسفرت بهالحظور اللي تسنه وجه ازوفا اختس يامال العافيه على هالموضوع السنع اللي يخلي الواحد يروح يزين له كوب شاهين ثقيل تسنه حبر ويفك له بكت تتن جديد يالله يالله يقدر يمخمخ لها القصه العياريه الصدزية التسذبيه < - وقسمن تصلح شاعر يالاصمعي اجل ماشاء الله متزوجه يالتسلبه  ولا تقولين لنا نبارك لتس يالخاله ولا شي الله يدفع البلا تسنتس ماتعرفيننا الله يكافي ولا شي ترى عـ الاقل رسالتن خاصه قولي بارك لي يالاصمعي تراني تزوجت < -
عنبو بليستس فضحتي عمرتس يحلفون اني هالحين رسمت لتس صورتن بخيالي تسنها صورة عنز لابستن جسم بطريق يالله يالله وبعد يمكن اني مادحس شوي وتساذبن بالوصف الله مير لا يواخذني
< - داسن السم بالعسل بهالسجع مير هذي والله الساعة المباركه ياسبهتنا العظمى اللي تعديتي موافق عليها بالسباهه
عنبو بليستس تبي تروحين وتخليني لوحوش نجد اقابل خششهم اربع وعشرين ساعه تسني بليس انا واياهم وانتي تبي تروحين وتدشرين وتاخذين راحتس عـ الاخر ياتسلبة قريح تسرحين وتمرحين بهالبارات وهالكبريهات ورقص ومغنى وطرب ودشاره < - يحلفون ان اكثر خبرته من اللي سمعه من سواليف البحرين ومصر
| |||||||||||||||||||||||||||||||||||||||||
<< موافق لعن الله هالوجه وخر احتاج الزاويه