شرح برنامج الستوف بلوق stuffplug 3 ( شرح كامل مع التفاصيل والمميزات والتعريب)

pringles · 09-12-2007, 05:24 PM

السلام عليهم ..

يالله ان تحيي لكل من دخل موضوعي ونور صفحتي

وش اخباركم عساكم طيبين .. وان شاء الله مبسوطين

بما اني من زمااان ما نزلت موضوع قلت انزل هالموضوع علشان اجدد حظوري بس

طبعا الموضوع جاهز من اول رمضان .. وشارحة ومضبط كلش بس اني كنت متعيجز ارفع الصور

بس الليوم لقيت اني فاضي قلت خل انزله كود يستفيد منه احد .. ومنها يخفف علي ذاكرة الجهاز

(( مشكلة اللي يفتح مجلد للشروحات ويشرح ولا ينزل

))

المهم الليوم شرحي عن برنامج الستوف بلوق stuffplug 3

من اطلق البرامج التابعه للماسن

يعني تقدرون تقولون زي البلس والدسكوفري والشيل وهالبرامج

وانا اعتبره من البرامج اللي لازم تكون عندك بالماسن .. جنب البلس والدسكوفري

:: اسالة يمكن تسالونها ::

بيجيني اللحين واحد ويقولي طيب وش فايدته اغلب مميزاته موجودة بالبلس ما يحتاج احمله !!! .. بالعربي برنامجك ماله فايدة اذا ان اغلب مميزاته موجوده بالبلس

بقولك والبلس وشو الله يصلحك !!
مهوب برنامج مثله مثل هذا ؟؟ .. يعني تراه مهوب برنامج اساسي مع الماسن ..
بس مشكلة بعض ربعنا الله يصلحهم يحسب البلس يجي مع الماسن اوردي وخدماته من الماسن نفسه مهوب برنامج اضافي !!!
بس دامك بتاخذها [[عبط ]] .. بقولك ترا مميزات البلس عندي هي اللي اغلبها نفس مميزات الستوف .. لاني عرفت الستوف قبل البلس

.. وبعدين البلس انا ما استخدمه الا بالالوان بس .. اما الستوف استخدم اغلب مميزاته

بيجيني واحد ثاني ويقول طيب انا قد حملت وثبت البلس والدسكوفري .. ليش اثبت هذا وهم تقريبا زي بعض ؟؟

بقوله ترا هم مهمب زي بعض .. كل واحد برنامج مختلف عن الثاني .. يعني زي الماسن حق الهوتميل ..وماسن الياهو .. والسكايب !! .. كل واحد يفرق عن الثاني صح انهم كلهم يعتبرون برامج محادثه [[ بس ]] مهمب زي بعض .. وهالبرنامج اللي انا جايبه والبلس والدسكوفري و و و .. كلها برامج تابعه للماسن بس مهيب زي بعض ..

وبيجيني واحد ثالث يسال .. بيقول طيب اللحين انا معك وانه يختلف وكذا .. بس يستاهل اني اركبه اذا كان عندي البلس والدسكوفري من اول ؟؟ .. يعني فيه مميزات تحمس اني احمله ولا اللي عندي يسدون الغرض ؟؟

بقولك شف .. فيه بعض المميزات فيه بتلقاها فيهم وكلهم يسووننفس النتيجه .. بس فيه مميزات بعد فيهبدري على امهم يسوونها

.. وان كانوا يسوونها فهم يسوونها بعد ما تحمل لهم سكربتات وتقعد تلاحق ورا السكربتات وتعب راسوممكن ما تلقاها بعد فيهم .. اما هذا المميزيات منه وفيه لا تطامر ولا تلاحق ولا شيء

وهذا واحد بيجيني يسال يقول .. طيب واذا برد عليك وبقعد اعابطك واحوس موضوعك وش بيكون جوابك ؟؟

بقولك ترا محدن ضاربك على يدك علشان ترد .. ما جاز لك الموضوع شرفنا بسكوتك

.. ما تعبت على الموضوع علشان تجيني انت وخشتك وتعابطني

<< يحلفون انه منزل هالاسالة علشان يفتك من هالبثرين اللي يحوسون المواضيع ويقللون من قيمتها

:: معلومات عن البرنامج ::

اسم البرنامج : stuffplug 3
حجم البرنامج : اقل من 1 ميقا ..
رقم الاصدار : 3.0.0387 BETA
تصريح البرنامج : مجاني

:: اهم مميزات البرنامج ::

بحط لكم هنا اهم المميزات اللي فيه .. وباقي المميزات بذكرها بالشرح

1- يسرق جهات الاتصال اللي عندك .. صور العرض - الابتسامات - الصور المتحركة - الاشكال الصوتيه ..

2- يخليك تفتح مليون ماسنجر ..

3- تقدر تسوي لك نكين نك يكون بواجهة الماسن .. ونك ثاني ما يطلع الا بصفحة المحادثه

.. يعني اذا انك من الناس اللي تحب تحط توبيكات واجده هالخاصيه بتجوز لك

4- يخلي كلامك يجي على شكل تعذر تسليم الرسالة التاليه ..

5- يخليك تكلم اللي انت صاقعهم بلوك من دون ما تفك البلوك عنهم

.. تنفع اذا عندك واحد بثر وما تبيه يكلمك يصير ما يقدر يكلمك الا اذا انت كلمته

6- يخليك تزيد عدد الحروف المسموحة لك بالمحادثة ..

7- يعرض لك حالة اللي انت قاعد تكلمة .. هذي من اطلق المميزات اللي فيه .. مثلا انت قاعد تكلم واحد وكان متصل تجيك صفحة المحادثة تحت وعليها ايقونة متصل .. اذا غير حالته الى بالخارج ولا مشغول تتغير الايقونة للخارج او لـ مشغول .. طبعا هذي تفيدك اذا كنت مخلي ماسنك مفتوح وجا احد كلمك تقدر تشوف وش حالته علشان ترد عليه

8- يخليك تقدر تغير اختصارات الماسن العاديه لاي اختصار انت تبيه ..

9- يخليك تقدر ترسل اكثر من 5 ابتسامات بالرد الواحد ..

10 - يخليك تقدر ترسل اكثر من 3 ملفات بوقت واحد ..

11 - تقدر تشيل خاصية جاري كتابة الرسالة بواسطة .. يعني لما تكلم احد تخليه ما يدري انت قاعد تكتب ولا لا ..

12- يخليك تقدر تغير النك حقك من واجهة الماسن .. من دون ما تدخل على الاعدادت ..

13- يخليك تقدر تضيف اي احد تبيه من قائمة البحث .. يعني اذا بحثت عن واحد وما لقيته تقدر تضيفه من دون ما تضغط على ايقونة الاضافة ..

:: شرح البرنامج ::

اول شيء حملوا البرنامج من الرابط اللي تحت ..

stuffplug مع التعريب

:: التثبيت ::

اول ما تفك الضغط عن البرنامج .. بتلقى ملفين اضغط على هالايقونة اللي هي ايقونة الستوب

اضغط next

من هنا لو ضغطت على Browse تختار المكان اللي تبي تحفظ البرنامج فيه ..
بس نصيحة خله زي ما هو اصرف لك .. وعقبها اضغط Next

من هنا تختار اللغات اللي تبي تضيفها .. انت حددها كلها وارعص على Next
وتراها ما تاخذ حجم واجد كلها كم كيلو .. بس احتياطن وعلشان يفتح لك ملف للغات

اذا جتك هذي اضغط على Install علشان يثبت لك البرنامج ..

اللحين اضغط فينش .. وخلاص كذا تثبت البرنامج عندك وضبط وضعك ..

:: خصائص البرنامج ::

شرح النقاط على الصورة ..
وبنشرحها بالتفصيل وحدة وحدة ..

:: welcome screen ::

نضغط اول شيء عليها من هنا ..

فبتطلع لنا هالصفحة .. والخيارات مشروحة بالصورة ..
كلمة language هذي تضغط عليها اذا تبي تغير لغة البرنامج ..

:: Options ::

ندخل عليها من هنا ..

هذا صفحت الاعدادات العامه .. وكل خيار مشروح بجنبه وش معناه ..
اذا عدلت شيء وخلصت اضغط على اوكي ..

هذي صفحت الاعدادات حقت صفحة المحادثة .. وكل خيار مشروح بجنبه وظيفته ..
لا عدلت فيها شيء وخلصت اضغط على اوكي وبس ..

هذي صفحة اعدادات جهات الاتصال .. وكل خيار مشروح بجنبه وظيفته ..
خلص تغيراتك وارعص على اوكي ..

:: Content Stealer ::

هذا حرامي جهات الاتصال .. تدخل عليه من هنا ..

اول خيار هذا الخيار اللي تسرق منه صور العرض حقت اللي عندك ..

شرح النقاط اللي على الصورة :

1- علشان تقفل النافذه ..
2- علشان تسوي للصور تحديث كود انها طلعت صورة جديدة

3- علشان تحفظ الصورة عندك على الجهاز ..
4- علشان تثبتها بماسنجرك يعني تخليها موجوده بقائمة صور العرض اللي عندك ..

فيذا بتلقى الايقونات حقت ربعك ..

شرح النقاط اللي على الصورة :
1- علشان تقفل النافذه ..
2- علشان تسوي للابتسامات تحديث كود انها طلعت ابتسامه جديدة ..
3- علشان تحفظ الابتسامه عندك على الجهاز ..
4- علشان تثبتها بماسنجرك يعني تخليها موجوده بقائمة الابتسامات اللي عندك ..

هنا بتلقى الصور المتحركة اللي عند ربعك ..

شرح النقاط اللي على الصورة :

1- علشان تقفل النافذه ..
2- علشان تسوي للصور تحديث كود انها طلعت صورة جديدة ..
3- علشان تحفظ الصورة عندك على الجهاز ..
4- علشان تثبتها بماسنجرك..

هنا بتلقى قائمة الاشكال الصوتية اللي عند اخوياك ..

شرح النقاط اللي على الصورة :

1- علشان تقفل النافذه ..
2- علشان تسوي للاشكال تحديث كود انها طلعت اشكال جديدة ..
3- علشان تحفظ الاشكال الصوتيه عندك على الجهاز ..
4- علشان تثبتها عندك بالماسن ..

:: Abuot ::

من هنا تدخل على معلومات البرنامج ..

هذي خرابيط البرنامج .. وفيها رقم النسخة اللي انا شارحها ..

:: طريقة التعريب ::

داخل ملف البرنامج اللي حملتوه .. فيه ملف حجمه 6 كيلو بايت
هذا ملف الترجمه .. سوله نسخ ..

ورح للمسار اللي انت حفظت فيه البرنامج .. وغالبا يكون مثل المسار اللي انا داخله ..
وبعد ما تدخل على ملف البرنامج ادخل على ملف اسمه Languages ولصق ملف الترجمه اللي نسخته فيه ..
وبكذا بيصير ركب عندك البرنامج .. وما عليك الا تروح تضغط على مكان تغير اللغة زي ما شرحتها اول الموضوع وتختار اللغة العربيه ويصير البرنامج معرب عندك

..

:: مشاكل يمكن تواجهها ::

احيانن ممكن لما تفتح الماسن بيجيك بمثل هالشكل

حلها انك تقفل الماسن وتسوي له انهاء من شريط المهام .. وعقبها تفتحه ثانيه وبيضبط معك زي الحلاوة

هالخيار حدد عليه اذا ما كنت تبي البرنامج يشتغل مع الماسن ..
بس حط ببالك انك اذا اخترته معد تقدر تشغله الا اذا سويت خروج من الماسن .. وتشغله وبعدها ترجع تسجل دخولك مره ثانيه ..

البرنامج انا استخدمته على :

نسخة الماسنجر 8.1
ونظام ويندوز اكس بي
ومشتغل معاي تمام التمام ومن دون اية مشاكل

اي سؤال عندكم عن البرنامج او استفسارات هاتوها وان شاء الله نجاوبكم عليها كانا نعرف لها

كفاني عذابـ · 09-12-2007, 06:00 PM

برنجلز

شكل البرنامج ماااره خطير

يعطيك ربي العافيه

اعقل مرجوجهـ · 09-12-2007, 06:25 PM

جاري التحميل وشكل البرنامج خطير

يعطيك العافيهـ برنقلز والله لا يحرمنا من جديدكـ

شليويح بيك · 09-12-2007, 08:22 PM

فناان مبدع
مميز
شرح ولا اروع وبرنامج ولا احلى

A S 6 O R H · 09-12-2007, 08:56 PM

عز الله اني جايبن رجال لـ التقني <-- تسني قصبت بندهـ

برينقلز عارفـ(ن) وش راح اقول اول شي وغصبن عني ولا اقدر اوقف في وجهك قدام الابداع اللي انت تسويه

بس لا تنسى يا حقير اني مضيفك عشانك تبي احد يعرف لـ برنامج الكمبيوتر وقمت اعلمك ع المسن يا ابن اللذينا والحين انت اللي تعلمني ع البرامج الله يـ الدنيا والله واكبرنا يا برينقلز وصرتا تعلمني ع البرامج بعد ما كنت اعلمك شلون تغير التوبيك ووشلون تلون التوبكات وكنت اسوي لك ايميل

.. والله وصرتا رجال كبير ويعتمد عليك بـ امور البرامج .. ما اقول الا يالله لك الحمد زين اني كنت شرارتن خلتك تطلع ع عالم البراامج وحطيتك في يدين سعودي و احساس وخليتهم يعلمونك ان الله حق ( ايقونتن جالستن تضحك ع ايامن مضت ووشلون اضفت فيها مقلع ) <-- عز الله انها ايامن مضت لبى قلبها ويا زينها بكل ما فيها

( ايقونتن مشتاقه حيل لك يا مقلع )

مثبت و للمعرض بعد اكتمـال الردود وهـ بس وش بقول غير يا بندهـ دزيه للمعرض لمن قضيتو رادين

.. بررب احمل البرنامج يلعن ابو الشقى يا كلب

"RaMz" · 09-12-2007, 09:35 PM

pringles
\\
//

الرابط اذا فتحته تطلع لي لم يتم العثور على هذه الصفحه !!
بس من جد شرح كافي ووافي الله يبيض وجهك
عز الله لو بتفهم مهبول ان يفهم الله يعطيك العافيه
.
.
تسلم الايادي حبوبي

سيد نفسي · 09-12-2007, 09:38 PM

ماشاء الله عليك يابرنقيز ,,

شرح وااافي وكااامل ... والكامل وجه سبحــأنهـ ,,,

عشت ولأهنتي يالغلا ... وجــأري التحميل والتجــربة

تبطي عظم · 10-12-2007, 03:11 AM

برنقلز

وش اقول بس

والله ان كلمة شكر ما تكفي

وكل ما اجي اسأل عن سؤال اتخيل تجاوب وانت تطالعني بنص عين وتسكتني

جاااري التحميل

مره ثانيه يعطيك الف عاااافيه ايها المبدع