رحلتي التصويريه في البحرين..

نبض · 14-02-2008, 01:29 PM

السسسسسسلام عليكم
وانا قاعده بشقّتي في البحرين...وماعندي شئ.والفضاوه مقطّعتني...ومتربّعه عالارض وحاطه شموع حولي وقاعده انتّف شعر ساقي ..وكل خمس شعرات اشيلهن احطهن في كيس عشان اوديهن المستشفى بعدين اتبرع بهن==تسمع بالتبّرع

المهم..جتني فكره وقلت يابنت الحين انتي صار لتس فتره تصورين...ولامره اشتركتي في معارض..ليه ما تستغلين الفرصه دام اهلتس موب معتس واطلعي خذي لتس فره وصوّري كم صوره يحبها قلبتس حلوه زيتس والا لا يااموره؟؟===من الحماس وانا اكلّم نفسي قبصت خدودي

دقيت عالتكسي وحجزته وقلت له يمرني عشان نطلع نحوس في الاحياء القديمه في البحرين...جهزت كاميرتي والفلاش والترايبود...وطلعت...
الوقت كان الظهر ..الساعه 2 تقريبا...
ودّاني التكسي مكان..قسم بالله تحسب نفسك قاعد في العراق ..اللي يلطمون من جهه..واللي لابسين اسود من جهه ثانيه...والمظاهرات وووالخ.....خفت ودقّيت اللطمه ..وقلت يلاّ نبدا تصوير...
اول حاجه شفت مجموعة شيبان قاعدين في تعريشه..قلت للتكسي انزل وقل لهم فيه صحفيه معي وتبي تاخذ لكم صور...قال لي حنا شعب البحرين مانقول شئ...مساكين..انزلي وخذي لهم صور عادي ماراح يهاوشونك زي شعبكم بالسعوديه..حنا شعب نحب السلام===اول ماقال هالكلمه شفت حمامه بيضا طارت من ورى ظهره...وحاطه غصن قمح بفمها
قلت له تلايط ولايكثر وانزل استأذن منهم زي ماقلت لك ...لااخلي شعب السعوديه هاللي خايف منهم يجون ويتوطون في بطنك

نزل ومدري وش قال لهم بس اشوفهم ميتين ضحك...رجع وقلت له وش قلت لهم؟؟ قال والله ماقلت ((اليهم)) شئ ...بس قلت لهم فيه وحده صحفيه تبي تصوركم....قلت له لعنبوهم اجل لو قايل لهم نكته وش يسوون؟؟
نزلت وسلّمت عليهم وقلت لهم عادي اصوركم؟؟==كم مره تستأذنين؟
قالوا لي خذي راااااااااااااحتك لو تبين حنا بكبرنا ندخل في الكاميرا محنا بقايلين شئ====بغيت احجر لهم واحط الكاميرا بالارض واقول لهم يلاّ وروني شلون بتدخلون في الكاميرا ..بس حسيت انهم مساكين ومتأثرين من مشاهدة البوكيمون
صوّرت 3 صور جماعيه...وشفت اللي بالنص ماسك عصا عجبتني قلت له معليش اصورها ابوي؟؟..عاجبتني...مااشوف الا اللي جنبه قال جيبو لي عصا جيبو لي بسرعه===غار الشايب
المهم...حسيت اني مسكت خط في السواليف ونسيت الصور

((خشبيّه اتكأ عليها..))

بدون اقتصاص..
الصوره كان ينقصها حدّه شويّه ..الفوكس ماكان مضبوط

**************************

هذي صورة الشيبان

((وفي كل جلسهٍ حكايه ازليه..))

برضو ماضبط عندي الفوكس... ...كنت اصور وانا مستعجله

******************************
بعدين روّقت:brows: ...وقلت وش بيسوون لي يعني؟:brows: ...انا جايه عشان اطلع ب صور حلوه ومافيها عيوب..مو عشان اطق اي صوره وامشي
شفت شايب يمشي وكان تحففففففه..حق تصوييييييير ...شايب بمعنى الكلمه..تحس باقي له يوم يومين ويموت استغفر الله
قلت له لو سمحت...لو سمحت...اكسكيوزمي ===هنا التكسي بغى يصكّني بالكاميرا..يقول وش عرفه باكسكيوزمي...الحين على باله اكله شعبيه قديمه ايام السيد جمال عبد الناصر===شطح التكسي
المهم..هالشايب يمشي وحنا نمشي وراه بالسياره وانا فاتحه الشباك ومطلّعه يديني ااشّر له ابيه يشوفني...تحمست بغيت ارقّمه
نزل التكسي وقال مالي الا امسكه واسحبه لتس من اذونه===تكسي ابضاي

المهم نهاية الفلم الهندي طلع هالشايب اصمخ..مايسمع ..قلت للتكسي هذا والله الصيده السنعه..بصوّره لين اقول بس...بسوي مجلدات بصوره...بألّف كتاب كامل عنه.. ..قمت ااشّر له ابي افهّمه انّي بصوّره.. قمت اسوي له حركات بيدي وارفع 3 اصابع يعني الجمله تتكون من ثلاث كلمات...وااّشر عالاصبع الاول يعني الكلمه الاولى...واسكّر يديني وافتحها..اسكّرها وافتحها بسرعه..===يعني الشتر ..سرعة الغالق
المهم عقب ماخلصت قام يقول لاااا لاااا انا خلاص ماابي بنات..عندي حرمتين...خلاص ماابي اتزوج...
قلت للتكسي افا..لايكون فهمني غلط يومي اسكر يدي وافتحها بسرعه
قال شكله خخخخخخخخخخخخخ ...
مشينا عنّه وطلّعت راسي من الشباك وطلعت له صورة قطو مع صورة كرز=====يعني ((كلّش ياتوم كروز))

عقبها شفنا شايب نفس اللبس ونفس المشيه وكل شئ...قلت بسسسسس...بصوّره من غير مااستأذن..لابوهم لابو اللي مسوي اخلاص ويستأذنهم مره ثانيه
وانزل واطق له صور من ورى..واركض واروح قدّامه واصوّره...لين بعدين حسيت انّه بريء ...قلت له ابووووي...انا مصوّره وعندي معرض قريب وابغى اصوّر واشارك بالمعرض يمكن وجهك يصير وجه خير علي وافوز====تسلك له
التفت علي وقام يطالعني ساعه ...قلت له خير؟ ...مضيّع شئ بوجهي يبو؟ ...قام يضحك وقال لي ((صوري اللي تبين يابوووج)).....
يالبىىىىىىىىىى عمره ...قسم بالله انه وسيع صدر بشكل مو طبيعي...من وساعة صدره تشوف صدره متدودل وطايح عالارض
صوّرته صور وانشاء الله ابشارك فيها ب اي معرض جاي

((ابتسامه للزمن))

بدون اقتصاص..بدون تعديلات..

**************

وهنا خليته يقعد عند بيت قديم

((ضحكه تنتشي فرحاً))

بدون اقتصاص..بدون تعديلات..

********************

((اتخبأ خلف تفاصيل صوفيه ويلجمني البرد))

بدون اقتصاص...تعديلات بسيطه جدا

******************

هذا لما ماكان يدري...

((اتخبأ من شبابي الراحل))

بدون اقتصاص...تغيير اللون فقط

*****************************

((عائد الى موطني..))

************************

((اتخبأ خلف تفاصيل صوفيه ويلجمني البرد2))

بدون اقتصاص..بدون تعديلات

*******************

ويوم خلصت تصوير راح للتكسي وقال له شوف وانا ابوك..الصور لاتنتشر..انا عندي حرمه تغار علي..وان عرفت ان اللي مصورتني بنت بتطلب مني الطلاق..طبعا كان يضحك

ركبت وتحرّكنا ورحنا ل حي ثاني...اول مادخلنا شفت ولد واقف على جنب...وشدني اللبس اللي لابسه..ووقفته...ونظراته...رحت وصوّرته وتخيلو ماانتبه لي ..او انه انتبه لي وماعطاني وجه

((اترقب حلما يجول في خاطري))

وبعد ماصورته راح يركض وركب باص مكتوب عليه نادي المدري ايش ..الزبده انّه طلع لاعب كرة قدم..
طبعا ماقدرت اخلّي مجال امامه في الصوره..لأنه واقف في نهاية الجدار

***********

وآخر صوره هذي..طبعا مو عاجبتني مره...لكن حبيت اعرضها لكم

((اسير في ردهات الماضي))

*************

وهذي كانت نتائج رحلتي التصويريه في البحرين...انشاء الله عجبتكم الصور

عقبال الرحله الثانيه

كل الصور ب nikon D40x

تحياتي
نبض

*****************

بكيراوي · 14-02-2008, 02:36 PM

ما شاء الله تبارك الله

الصور كل وحده ازين من الثانيه

اقتباس

((اتخبأ من شبابي الراحل))

بدون اقتصاص...تغيير اللون فقط

صورهـ رائعه لكن تمنيت ظهورها كامله من تحت

اقتباس

((خشبيّه اتكأ عليها..))

اما هذي ما شاء الله

خياليه بطله مدري وشلون اوصفه

كفاني عذابـ · 14-02-2008, 03:01 PM

نبض وش ذا الإبدآآآع

وربي خطير تصويرك

نبض · 14-02-2008, 03:31 PM

بكيراوي

اقتباس

صورهـ رائعه لكن تمنيت ظهورها كامله من تحت

ياخي وش اسوي..ماقدرت الحّق عليه...كنت امشي قدّامه واصوّره..كل مااركض واوقف عشان اصوره اشوفه لاصق بالكاميرا...يلعن يومه سريع

حياك اسعدني تواجدك ماننحرم

نبض · 14-02-2008, 03:35 PM

كفاني عذاب

عشون عيل..على بالك نمزح؟

حياك اسعني تواجدك

ماننحرم

نبض · 14-02-2008, 03:39 PM

مثبت عشان خاطري

A M A L · 15-02-2008, 04:08 AM

نبببببببببببببض انتي بنت والا ولد

والله التصوير خطيييير مره ولاعليه كلام مره

ما شاء الله تبارك الله

نونا · 15-02-2008, 05:54 AM

والله صور خطيررررررررره ماشااء الله عليك
عقبالي اصيرر مصوره مثلك
خربت كاميرااتي وانا ما استخدمتهاا غير في تصووير خشتي
يعطيك العافيه نبض لاعدمناااك :::

بنت ابووي · 15-02-2008, 06:22 AM

هالثنتين حبيتهم اقواا شيّ ! يمكن لانهم عفوياات
الاولى مثل ما ثال بكيراوي لو انتس مطلعه رجيلاته .. بس عذرنااتس مع هالمرااكض
الثانيه شسمه كاسرن خاطري الولد مدري ليه بس تحسينه يبتسم مع انو عايش بهالمكان
<-- يرحم امتس لاعاد توصفين

حتى جلسه الشيباان جازت لي مررره !

الوكااد اننس مووبدعه

A S 6 O R H · 15-02-2008, 06:36 AM

وللمعرض بعد اكتمال الردود عشان خاطري انا
ولي رجعه باتسر ان قاله الله ع التعليق

موافق عليها · 15-02-2008, 09:05 AM

الاسطــورة اقتباس

وللمعرض بعد اكتمال الردود عشان خاطري انا
ولي رجعه باتسر ان قاله الله ع التعليق

الحين قاعد تهاوشني ليه مارديت وانت هذا ردك

حتى انا ابرد بعدين الحين فيني نوم اذا مارديت اليوم بالليل اجل الوعد لامني رحت اشوف الصور صدز

مدري!! · 15-02-2008, 09:53 AM

نبض بصراحه كلمة مبدعه قليله عليك

كل صورة فيها تفاصيل وتعطيك معاني كثيره

تخليك تسرحين فيها

كل صورة اوقف عندها اتأمل .. ملامح الشيخ ابتسامته

مسكت العصى تحس بالهيبه والاحترام

جلستهم نظراتهم

وقفت الشيخ نظرته وهو ماشي بحاله مو عارف عن شي

كيف مغطي نفسه عشان الصورة

لقطات بصراحه مو طبيعيه

وقفت الولد ينتظر الباص ياخذه عشان يلعب

سرحان يفكر كيف بيلعب ..

بصراحه يانبض فكرة الصور تحمل معاني كثيره ... احيك عليها

واتمنى اشوفك ان شاء الله بعد كم سنه فاتحه معرض ونحضره : d

الله يوفقك يارب ولا تحرمينا من ابداعك

المنقهره · 15-02-2008, 12:23 PM

وعععععععع وش ذا التصوير المخيس ؟ <<----- غارت غارت
نبض تصويريتس بااايخ مصورتلي شيبان وتقول لي فن وين الفن معه تكفين ؟
لالا صدز اكلمتس جد وين الفن معه في ذا الصور ؟ ومن البجاحه بتشارك فيها في معرض استحي على وجهتس يالبجيحه تعالي تعلمي مني وشلون تصورين همن فكري تنزلينها فيذا
وكانتس مصممه تشاركين فيها .. قولي لي عشان نشارك سوا عشان اذا حطموتس وسفلوا فيتس أخمتس وأجلس أواسيتس <<----- ياحنيّنه
كل أبو صورتس فيها إرتجاج <<---- تسمع بالنقد همن خشي في عيني ماعدلتيهن بالفوتوشوب ؟ علينا يالوصخه ؟ اعرفتس حركات الشيّعه ماتخلينها

دوتس

رحلتي التصويريه في البحرين..

ستوديو التصوير الضوئي