رايح فيها

في وقتنا هذا كثير من الناس صاروا يحلمون بالثراء السريع لدرجة ان البعض منهم وهم قليلين ماصاروا يسألون عن الكيف ولكن اهم شي كم بيكون معي وكم بيكون في حسابي ؟
ولكن جتهم موجه من الأسهم علمتهم الكم حقهم وش يصير
وابوراشد الظاهر انه من الربع اياهم ولكن فرقه عنهم انه عارف الكيف حقه (( وانا اكتب الكيف احس اني اكتب بموقع المكافحه )) ... على طاري المكافحه خلونا نرجع لسالفة ابوراشد ..
خوينا هذا متزوج وعنده تسع بنات وولد وحيد وسبهه في ذات الوقت ... لذلك صار يحاول يطلع من ازمات عديده منها ازمته الماديه واهمها ازمة ولده السبهه !!
بس لو نظرنا للجانب المشرق من السالفه كلها نحصل ان الولد السبهه هذا يملك ميزه قل ان يملكها احد في ايامنا الغابره الحاليه وهالميزه ان كل شي تقوله له وكل فكره تقولها له يقول اوكي قدام ... ومصطلح قدام للي برستيجهم ماتأقلم مع هالمصطلحات معناه ولا يهمك يعني انا معك مهما كانت النتائج (( الله من زين الشرح )) ... هالرجال من كثر مايقول قدام لو تقوله خلنا نروح للأكوادور يقولون فيها محل يبيع كليجا مامثلها .. بيقولك عادي وقدام .. ولكنه بيسترسل وبيقول / بس انصحك نروح في سابتكو ارخص
خلونا من رويشد ولد ابوراشد ونرجع لسالفة ابوه ... ابوراشد من النوع الي يبحث عن الثراء السريع .. كان يشتغل بإحدى الدوائر الحكوميه ولكن الوضع ماكان عاجبه ابد سواء هو او خويه في المكتب واسمه ابونواف .
ويوم ان الوضع صار مثل ماهو الحين وكل شي غالي حتى الـ 5 % صارت غاليه قرروا هالشقرديه انهم يطلقون الوظيفه الحكوميه ويشتغلون اعمال حره ... صار كل واحد منهم يقدم اقتراحاته ولو ان راشد ولد ابوراشد اقترح عليهم يقطون مع الوليد في المملكه علشان ان صار عندهم عزيمه يحطونها هناك بدل مايخربون بيوتهم ... ويوم ان راشد خلّص اقتراحه عطاه ابوه 100 ريال وقال له رح للمعارض شف لك سياره نظيفه وعطهم هالميّه واتصل علي اجي اسدد الباقي .. اخذ راشد الـ 100 وقبل يطلع من المجلس التفت على ابوه وقال له / اروح لمعارض الشفاء والا النسيم ؟؟
في هذه الأثناء كان ابوراشد وابونواف يخططون لشركتهم الجديده وكيف بيكون شغلهم بعد ماتركوا الوظيفة الحكوميه واخذوا حقوقهم واستعدوا لبداية مشروعه .

============================

يقولون الرواة ان القروب اعلاه فتحوا لهم شركة مقاولات وجلسوا مدة سنتين مابنوا ولا شي الا جدار مقبره وترميم بعد .. وكل هالسنتين مغير شغل صدّق الورقه الفلانيه من الغرفه التجاريه وصدّق الخطاب الفلاني من الغرفه التجاريه وصدّق التزكيه الفلانيه من الغرفه التجاريه لدرجة ان ابوراشد استنكر شلون انه تزوج بدون مايصدّق عقد زواجه في الغرفه التجاريه ؟
ابوراشد تعقد من اسم الغرفه التجاريه ... مغير تصديق اوراق والنتيجه صفر .... كره كل شي مرتبط بالغرفه التجاريه حتى الـ 25 ريال حقة التصديق صاير مايشيلها بجيبه .. يا يشيل 24 والا 26 من كثر مايكره الغرفه وبلاويها .
وفي احد الايام الخوالي كان ابوراشد توه راجع من الشركه اياها واستقبلته زوجته عند الباب .. قال في نفسه (( على الاقل في حياتي شي حلو وهو ان ام راشد تستقبلني عند الباب )) ... دخل البيت والابتسامه شاقه وجهه كن وجهه كوره من كثر ماهو مشقوق وسأل ام راشد بتميلح واضح / وش موقفتس عند الباب ياقلبي ؟
قالت ام راشد بدلع غير طبيعي / ابد والله .. انتظر البقاله
طالعها ابوراشد مستنكراً وبتر استنكاره بقوله / ايه احتري البقاله وانا بروح ارقد لي شوي
وقبل مايتحرك قيد انمله قالت ام راشد / طيب اصبر حاسب البقاله اول ورح ارقد
قال لها / طيب انتي كنتي تنتظرين البقاله يعني معتس فلوس
قالت له / بس الحين مامعي .. اقول حاسبها انت الرجال
طالعها ابوراشد بعد مابدت تضرب من تحت الحزام وقال / ايه مايخالف نحتري البقاله
جلس ابوراشد ينتظر البقاله ويوم ان الهندي جا وعطاه الطلبات قال / الحساب 25 ريال بابا
ويوم ان ابوراشد سمعه يقول 25 قال مرتاعاً / صديق انتا فيه شغل في الغرفه التجاريه ؟
طالعه الهندي مستنكراً وقال / مافي معلوم بابا
قال ابوراشد وهو يعطيه الفلوس / خذ فلوسك وانقلع .. وان كلموك يبون طلبات بـ 25 لا تجيبها وبـ 50 هاتها عادي
انطلق الهندي لبقالته وهو يقول بنفسه وش هالمهبول ؟

ويوم ان ابوراشد رقد له دقيقتين قرر بعدها استعاد مخه لياقته وبدا يفكر غلط .. وهذي ميزة ابوراشد متى ماكان مركز يبدا يفكر غلط عكس الناس الله يخسه .. ويوم انه فكّر حتى ايقن ان فكرته صحيحه مع انها غلط مثل مااسلفنا اتصل على خويه ابونواف وقال له الوعد في المكتب عندي لك شغله ماتحلم بها .. والاجتماع بيكون مغلق بيني وبينك وبين ولدي راشد ... يعني اعتبرنا اثنين بما ان راشد تحصيل حاصل
ويوم انهم اجتمعوا بالمكتب بدا ابوراشد يفضفض لشركائه الله من زين هالشركاء .. فبداء بقوله / بصراحه وضعنا يوم اننا نشتغل بالحكومه احسن من الحين بواجد ... الظاهر اننا منظولين
قال ابونواف / لو كل الناس ينحسدون انت بالذات ماتنحسد .. الا الناس يدعونك لك بالخير ويقولون عسى ماجاك من ولدك تكفير
وفي هذه الأثناء كان رويشد يقلب بهالراس ومايدري وش يقولون مع انه كان احد اعضاء مجلس الادارة وشريك رسمي في الشركه حقتهم بس شريك بدون نسبه لأنهم خافوا يضيع نسبته على الشروخ والصواريخ .. المهم وبعد حوار طويل اقتنع ابوراشد واقنع صاحبه ان الحياة في هالديره ماتصلح خلاص خصوصاً انهم لو عاشوا سنه زياده بيبدون يشحذون لأن الغرفه التجاريه بتخلص فلوسهم ... وبما ان تفكير ابوراشد وذهنه صافي في هالفتره فمثل ماذكرنا بدا يفكر غلط ويقترح على مجموعته اقتراحات مدري وش تبي .. والميزه في اقتراحات ابوراشد انه ينفذ اول وبعدين يدرس الاقتراح موب مثل ربعنا درسوا انشاء نفق الشفاء عشرين سنه والتنفيذ يبي له 5 سنين ويفتتحونه بعد التنفيذ بسنتين بسبب بعض المشاكل والنتيجه ان الي اقترح عليهم انشاء النفق يكرمون احفاده لأنه ميت من سنين طويله .. المهم ان ابوراشد اقترح انهم ينعزلون عن العالم الخارجي يعني لا جوالات ولا انترنت ولا سيارات ولا طيارات ولا شي حتى الروادو حقت اول مايبونها !!
قال ابونواف / يعني ودك نستاجر شقه وننقطع عن كل الناس ؟
قال ابوراشد / الشقه فيها كهرب .. حنا نبي ننقطع عن كل التكنولوجيا الي بالدنيا ... يعني ودنا بديره مافيها تكنلوجيا ابد حتى ام راشد مانبيها (( مصنفها مثل التكنولوجيا لأنها هي والاتصالات واحد بارك الله فيها )) ... يعني لازم نطلع من هالديره كلها ومانرجع لها الا والواحد ذهنه صافي وتفكيره احسن من الحين بكثير .
قال ابونواف / خلاص اجل توكل على الله ... انت شف الوقت والمكان المناسب الي بنروح لها وانا بجهز العزبه
وقبل يطلع ابونواف من المكتب التفت وسأل ابوراشد / الا العزبه تكنولوجيا ؟؟

=================================

في أثناء تجهيز ابونواف للعزبه كان ابوراشد ويا فتاه اليافع راشد في احد مكاتب الخطوط وكان بينهم وبين المصري الي في المكتب حوار يمكن ماشهدته مكاتب الخطوط في كل العالم /

ابوراشد / ودنا بديره مافيه اي شي يمثل الحياة بوضعها الحالي .. احجز لنا على ديره مافيها الا اشياء بدائيه جداً لو حجز لنا على طائره حجريه ابرك (( يسمع بالعصر الحجري ))
المصري / بما انكم عاوزين ديره مفيهاش اي تكنولوقيا ولا حاقه .. ايه رايك تزور الطايف ؟
ابوراشد / الطايف مانبيه .. اخبر فيه الردّف وحسب ماسمعت الردّف تكنولوجيا
قال المصري / طيب بص حضرتك .. انا عندي ليك بلد مافيهاش الا ناس آخر ماتوصلوا ليه هم الرمح للصيد
قال ابوراشد / ايه هذي ديره ممتازه .. وينها فيه يابدري ؟
قال بدري / هالديره طال عمرك في غابه حول الاكوادور وهي من غابات الصفصاف
وهنا فقط نقز راشد السبهه وقال/ الاكوادور .. يقولون عندهم كليجا طيبه (( صدق لا قالوا الخبل ماينسى سالفته خخخخخخخخخخ ))
التفت ابوراشد على ولده وطالعه من فوق لتحت ورجع لبدري المصري وقال له / طيب يابدري احجز لنا ثلاث مقاعد وان حصل مقعدين وراشد مع العفش مهيب شينه
قال بدري / العفش صعبه لأنه اغلى من راشد لكن ححاول احط راشد عالقناح !!

=================================

بعد رحله استمرت ساعات طويله اعلن الكابتن ان الي يبون جزيرة (( الله بالخير )) يستعدون للنزول .. ولكن هلمره عكس العالم .. يعني بالعاده الكابتن يقول اربطوا الاحزمه ولكن الي يبون هالجزيره يفكون الاحزمه لأنهم بيطبون ببراشوت ... ويوم ان ابواشد سمع هالسالفه ويروح للكابتن ويقوله / انت منتب صاحي .. شلون تبينا نطب بالبراشوت ؟
قال الكابتن / وانت تبي جزيره مافيه تكنولوجيا وفيها مطار ؟
عاد هذي شلون تصير.. وهنا فقط اسقط في يد ابوراشد .... واردف الكابتن قائلاً / اقول جهز نفسك انت وربعك وطبوا بالبراشوتات وقبل تطبون عطوني بطاقات الاحوال حقتكم علشان ان رجعتوا للرياض ترجعون البراشوتات واعطيكم بطاقاتكم
قال ابوراشد / وش فرقك اجل عن الي يأجرون زوالي وخيام ومساند للمناسبات ؟
قال الكابتن / الفرق بيني وبينهم ان البارشوت حقي نظيف وماتشقق (( طرّاه ان نص خيامهم مضروبه وان لقيت خيمه سليمه تحصلها بدون عمود ))

المهم بعد ان نهرهم الكابتن طبوا بالبارشوتات وكلهم وصلوا سالمين الى الأرض ولو ان راشد اخذ يعبث بالبراشوت وكان بيطيح في الارجنتين بس نسمة هوى خفيفة حولت وجهة هالسبهه لجزيرة الله بالخير المقصود زيارتها !

========================================

بعد كل هالامور بساعه كان ابوراشد وجماعته يبحثون في الجزيره عن مكان مناسب للعيش بهدوء ,,, ويوم انهم اخذوا لفه على الجزيره حصلوا شجرة هندباء مناسبه للسكن (( صوّر سيل جنب هندباء )) .. وفعلاً نزلوا عزبتهم وبدوا يرتبون امورهم على اساس انهم بيبنون بيتهم فوق الشجره لمنع الكواسر من مهاجمتهم وفي ذات الوقت للخوف على الكواسر لا تاكل راشد ويصيبها تسمم وقتها وش يفكهم من حماية المستهلك ؟
ويوم اهم بدوا يرتبون الامور استعداداً لبناء البيت كان بينهم هذا الحوار /

ابونواف / طيب الحين قبل نبدا نبني البيت لازم ناكل لأننا جايعين
ابوراشد / ايه اصبر شوي وسوف نذهب للصيد
قال راشد / وشو صيده ياابوي ؟ مارح نروح لسوق الغنم ؟؟
قال ابوراشد/ الحين وانا ابوك ان رحنا لسوق الغنم مهوب لازم نروح بالددسن ؟
قال راشد / الا لازم
قال ابوه / والددسن تكنولوجيا .. لذلك بنذهب للصيد ولا يكثر
قال راشد / طيب ياابوي سؤال ثاني
وقتها ابوراشد حس ان هالرحله بدت فايدتها تطلع والدليل ان راشد تفتح مخه وبدا يسأل ،، قال اسأل وانا ابوك
قال راشد / الحين انت ناوي تبني بين فوق الشجره مثل طرزان
قال ابوه / ايه وانا ابوك بنصير مثل طرزان
قال راشد / طيب ياابوي لو امي معنا وسكنت فوق الشجره تصير طرزانه ؟

قطع سواليفهم ابونواف وقال / على اسألتك ولدك انت متأكد ان هذي غابة صفصاف والا غابة حشيش ؟
ثم التفت على راشد وقال له / رح العب وانا عمك حتى نبني البيت
وكمل ابوراشد وقال / بس انتبه وانا ابوك لا تبعد اخاف ياكلك أيل (( يسمع بالحيوانات المتوحشه خخخخخخخخ ))

ويوم ان الولد القلق راح بدا ابوه ويا ابونواف يصلحون البيت ويسولفون وابوراشد يقول / شف هالدنيا كيف .. كنا نسمع عن الغابات والحين بنسكن فيها .. بس لا دققت الدنيا صايره كلها غابه والكبير ياكل الصغير
قال ابونواف / يعني الفيل ياكل الاسد ؟
قال ابوراشد / مااقول الا الله يحلل ولدي السبهه عندك انت واسألتك

ويوم انهم منهمكين في الشغل طبوا عليهم مجموعه من السود الي الواحد منهم حاط عظم على راسه وصاير راسه كنه دسك توب عليه حقة الواير لس
بدوا يتكلمون بلغه غير مفهمومه ... وابوراشد يقول / الظاهر انهم يرحبون فينا .. اخاف بس يلزمون علينا ويذبحون لنا تمساح وانا من زمان عن لحم التماسيح يجيب لي الحساسيه !
قال ابونواف / اجل من زمان عن اكل التماسيح ... ذكرتني ببعض الناس يقولون من زمان مااكلنا تماسيح وهم كل يوم ياكلون واحد (( اسطوره اطلع منها ))

المهم ان هالجماعه سحبوهم من مكمنهم وراحوا بهم لسجن من اعواد القصب
ويوم انهم سجنوهم مسك ابوراشد الشبك الي هم مسجنونين فيه وقال / هذا الي يسمونه القصب
قال ابونواف / اجل المصري الملعون لاعب عليك يقول بوديكم الاكوادور وهو ماطلعنا من الديره
وهنا فقط تمنى ابوراشد الغرفه التجاريه على سباهة الي معه
وفجأه قال ابوراشد / على طاري الغرفه التجاريه وبلاويها ولدي وينه ؟
ويوم ان توهم يفكرون وين الولد الا والخوال جايبينه وحاطينه بنفس السجن
وهنا بس قال ابونواف / شكلهم من الي ياكلون الاوادم
ابوراشد / الظاهر كذا .. والظاهر بعد انهم بيبدون فيك انت وانا بيتركوني للحلا
ابونواف / الا ماودك نقدم لهم راشد ولدك واول مايصيبهم تلبك معوي ننحاش .. وبعدين ماكنت تقول انهم عازيمنا لى تمساح ومدري ايش وش اكد لك الحين انهم ياكلون اوادم ؟
قال ابوراشد / يارجال لا تمساح ولا غيره بس انا قايل كذا مسوي اتكلم لغات

وهم في معمعة النقاش رفع صوته رويشد وقال / آدم
التفت عليه ابوراشد وقال / الحمد لله رب العالمين .. شكله يبيهم يشغلونا ام بي سي برنامج آدم .. مايدري ان حتى حواء مستحيل تلقاها بهالديره
شوي الا وجايهم واحد من هالتكارنه وقال / اهلين راشد .. ليه انتا هينا ؟
قال رويشد / مدري يااآدم .. انتم جبتونا هنا
قال ابوراشد لولده / من هذا ووشلون عرفته ؟
قال آدم / انا اول فيه شغل مغسله سيارات عند بيت راشد ,, وراشد ولد كويس ويعطي انا بلوتوث حلو على جوال
قال ابوراشد / بعد ياالملعون ترسل بلوتوثات مخزيه
قام آدم وطلع جواله وشغل لهم ملف برجس

المهم بعد مشاورات قرر آدم ينحشهم قبل ياكلونهم ربعه خصوصاً ان ملف برجس يسوى الفزعه خخخخخ
ويوم انه صار الليل دبروا امرهم وانحاشوا .. وركبهم سفينه ودتهم لاقرب مدينه ومنها اقلعوا راجعين للرياض .

=========================================

بعد كل هالمعاناة رجع ابوراشد لبيته ورحبت فيه زوجته وبناته التسع
وقال بعد كل هالترحيب / الحين رحت ورجعت وانتن تسع مااعرست ولا وحده ؟؟
المهم قال لعياله اطلعوا خلوني ارقد شوي لي كم يوم ماحسيت بطعم الراحه

نام ابوراشد ويوم انه صحى من النوم واكل وارتاح بدا يفكر في هالرحله السيئه وحلف انه مايكررها ابد
وفجأه تذكر ان بطاقته مرهونه ببراشوت
ونقز من مكانه ولبس ثيابه وشغل سيارته وراح لبيت الكابتن ياخذ بطاقته (( موصف له الملعون ))
يوم ان الكابتن قال له طيب وين البراشوت ؟
قال ابوراشد / بصراحه قصتنا ماتنحكى ولكن زبدتها اننا نسينا كل اغراضنا هناك ومن ضمنها البراشوتات

قال الكابتن / طيب موب مشكله .. بس ادفع قيمة كل براشوت وخذ بطاقاتكم

قال ابوراشد / وكم سعرها

قال الكابتن / البراشوت الواحد بـ 25 ريال

الفايده من الموضوع /

في بعض الدول ياكلون كل يوم تمساح

رايح فيها

Private

آهات

وش هاللي اشوفه .. لحظة لحظة
<< يفرك عيونه

يا حيا الله أستاذ العيارة .. وملك التنسيم .. رايح فيها
تو ماانور المنتدى

لمن لا يعرف .. رايح فيها من رواد الانترنت (مغبر) ومن أوائل الكتاب الساخرين على الانترنت

يوم بدا يكتب بالنت كنت انا اطالع مباريات البرازيل والهلال (4-0 للهلال)
يعني كان كبير هرش وانا توني

وكان يطلعني من المدرسة يقول تعال بشتري لك بفك اماراتي بس مايشتري لي بفك اماراتي،
يشتري لي ابو بس ويقعد يسوي اشياء ماعرفها

حتى كان احيان يوديني خرابة جنب بيتهم ويشر على سري ويقول ابي اشوف حبة الخال اللي فيذا مع ان مافيه خال الا فيذاك

المهم ندخل بالموضوع

الغرفة التجارية وما أدراك ما الغرفة التجارية ووزارة التجارة .. وألعن منها البلدية

انا اضمن لك ان سبب طلوع الشيب في الشعر هو شغلتين: العمار، ومراجعة التجارة

يعني مع امهم يصيرون 11 ،،، منتخب ،،، وابو راشد المدرب

على فكرة ليه دايم عيالنا يطلعون سبهات وهم صغار ، والبنت تطلع مليعينة وفاهمة الكفت

اقتباس:

حتى الـ 5 % صارت غاليه

سمعت ان التجار يبون يرفعونها بسبب ارتفاع اسعار المواد الخام ،

تعرف الفلوس من ورق والورق ارتفع سعره

اقتباس:

لدرجة ان ابوراشد استنكر شلون انه تزوج بدون مايصدّق عقد زواجه في الغرفه التجاريه ؟

بالصميم يبو نوف

اقتباس:

قالت له / بس الحين مامعي .. اقول حاسبها انت الرجال

هذا اللي لعب بحسبة الشباب السعودي دايم يلعبون علينا بكلمة انت رجال

وهالشي موب بس الحريم يستغلونه، حتى اهلنا يومنا (وغدان) يلعبون على هالوتر الحساس وكل ما طق عود بحصاة قالوا انت رجال وانت رجال ...

يومني صغير مرة انصك الباب على اصبعي وجلست اصيح، قال ابوي لا تصيح انت رجال، ومرة كنت اطالع افلام كرتون ومتأثر اشوف سالي والانسة منشن تخليها تكنس المدرسة واتعبر ويجلسون العيال يضحكون علي ويزاعقون يالبزر يالبزر واللي يجدع نعلته علي واللي يرنني على دمجتي قرموع واللي يلفطني بالشماغ

صح كلكم طفولتكم زيي؟

اقتباس:

المهم وبعد حوار طويل اقتنع ابوراشد واقنع صاحبه ان الحياة في هالديره ماتصلح خلاص خصوصاً انهم لو عاشوا سنه زياده بيبدون يشحذون

طراه ان غازي القصيبي يبي يشغل البنات خدامات

اقتباس:

درسوا انشاء نفق الشفاء عشرين سنه والتنفيذ يبي له 5 سنين ويفتتحونه بعد التنفيذ بسنتين

طراه ان صندوق مكافحة الفقر صرفوا 300 مليون للدراسة: وشلون يكافحون الفقر

انا اقترح ينشئون صندوق لمكافحة هالصندوق

اقتباس:

ابوراشد / الطايف مانبيه .. اخبر فيه الردّف وحسب ماسمعت الردّف تكنولوجيا

ولا تنسى منتجع النقبة الحمراء ، فيها تكنولوجيا ( اسم هالمنتجع مشبوه )

اقتباس:

وهنا فقط نقز راشد السبهه وقال/ الاكوادور .. يقولون عندهم كليجا طيبه (( صدق لا قالوا الخبل ماينسى سالفته خخخخخخخخخخ ))

خخخخخخخخخخخخخخخخخخخخخخخخخخخخ

تصدق بالله ان تفكيري مثل تفكير رويشد

اقتباس:

قال بدري / العفش صعبه لأنه اغلى من راشد

السنة اللي فاتت وانا جاي احجز تذاكر على باريس قالوا لي الاسعار ارتفعت، قلت وش دعوة انا حاجز السنة اللي قبلها بهالسعر ولنفس البلد وش اللي تغير يعني مثلا صارت ابعد ولا راحت ورا المحيط !!

قالو لا حضرتك بس ارتفعت اسعار الوقود ، وبكذا ارتفعت اسعار التذاكر وارتفعت اسعار الشحن والعفش وكلش ... هالكلام قبل يضرب النفط 110 دولارات ... وتطير اسعار كل شي ...

المراد .. خله يروح الطائف ازين له بس المشكلة حتى الخطوط بيحطون لها تسعيرة يعني الازين الواحد يروح الجسر المعلق ويجدع حصى من الجسر ويرجع بيته

اقتباس:

وقبل تطبون عطوني بطاقات الاحوال حقتكم علشان ان رجعتوا للرياض ترجعون البراشوتات واعطيكم بطاقاتكم

ذكرتني بموقف صار لي وقفت عند محطة اعبي بنزين وقلت عبي 20 ، وعلى اساس توني جاي من السوق وبوكي مافيه الا 20 ريال بالضبط ... ابو هنود عبى بـ 21 وقال معليش زاد بالغلط قلت ادفعه من جيبك قال لا ومدري ايش ....

منا ومنا قال هات بطاقتك عندي الين تجيب لي الريال قلت فارق يبن الكلفس ارهن بطاقتي عشان ريال تدري هما المحطات يوزعون مناديل مابي المنديل خذه وفكني من هالريال

اقتباس:

بس انتبه وانا ابوك لا تبعد اخاف ياكلك أيل

خخخخخخخخخخ ياحليله ابو راشد يخاف على ولده

الا وشو الأيل <<<< جاك رويشد الثاني

بعدين ليه الغرب تحسهم حضاريين حتى بحيواناتهم ( ماودي اقول الله يكرمك اخاف اغلط ذكرت اللي يوم قام من العشا مسوي سنع قال للمعزب الله يكرمك مسوي يبي يقول اكرمك الله ) اقول لك حيواناتهم بالطريق وانت ماسك خط يطلع لك أيل ... موب زينا يطلع لك بعير اسود هو وطرش بحر توأم .. الا ما عندهم مزاين أيل

اقتباس:

الواحد منهم حاط عظم على راسه وصاير راسه كنه دسك توب عليه حقة الواير لس

يخوي لا عمرك تشبه بس ما قلت لنا فيه فتحة USB وحدة ولا ثنتين

اقتباس:

قال الكابتن / البراشوت الواحد بـ 25 ريال

شفت كيف التعامل الحضاري ... لاحظ انه سافر ورجع ولا ارتفعت الاسعار .. وتقولون غلاء معيشة؟؟

~~

رايح ... جعله ما ينرقع هالفتق اللي بمخك عشان تعطينا من هالتنسيم

وعساك من هالحال وازود قل امين يالمقضم ...

موضوع من طينة الكبار .. مليء بالاسقاطات الساخرة .. يحتاج الواحد يقراه كثير ويتمعن مابين السطور

بس لو تعلمنا وش نوع الصنف اللي تتعاطاه اشك انك راعي زحلاوي

لا تحرمنا من جديدك

A S 6 O R H

( ايقونتن لـ عربجية قاصه بوي و سمعت لها حس احدن يناديها ودرعمت فيذا )
ابو فيها .. انورت تكية الملحق يومنك اقبلتا عليها .. لو اننا دارين تسان من مبطي خلينا سيل يليص الملحق ويصبغه و يأثثه من بدري .. ما اقول الا قاتل الله ايام الظلال والتماسيح .. يوم الواحد تسانه ما يدري هي فيه ولا بـ اللي جمبه ( ايقونتن مبدئها وسع صدري وخذ مرادك مني ) <-- سيل الظلام معليش اخذت مبدئك .
وشذا الخبال يـ ابو فيها الصدز من زمان ما قريت لك مدري البلاء مني بس الاكيد انه منك يا وحش .. غاطسن عن العالم ما ينشاف لك ولا شين ابد .. يالله حذفت ردن لك ويالله نشوفه وان خربتها سمعنا صوتك ابو 15 ثانيه وانتقل الجوال من يد لـ يد يكلمون سموك الكريم .. وراشد هـ الفاهي تسنه واحدن من العيال كلما قلت له شي قالك قدام .. وهو قدامه خرطن فاضي قدام ولمن جاء الصدز قال انا مشغول وجدع له كلمتن يوعدك بباتسر وانحاش وليته يجي باتسر ( برايفت تراي ما اقصدك ) وابو راشد وولده البليه ان شاء الله تكفير ذنوب بس اللي اشوفه انها بيضتها التيكنلوجيا واللي بيضها زود برجس ( ايقونتن حاقت السالفه وتبي تاكل خابور ) <-- ورا ما تنزل حدر وتاكل تراب .

ابو فيها هـ الحين صدق اللي يقولون ان الغرفة التجاريه مالها ابواب ( ايقونتن دايم يجيها لغز : ماهي الغرفة التي ليست لها ابواب او نوافذ ) <-- ودايم جوابها الغرفةا لتجارية .

^
^^
يا رجال ملعوبن عليك ولقينك سبهتن تصدق كل شي ينقال .. اجل بالله عليك شلون مالها ابواب والباكستاني اللي بناها وشلون طلع منها <-- وشو حشيشة اللي عندهـ آهات .

مير ع طاري التماسيح يا ابو فيها .. ابشرك سيل الظلام كبر و صار تمساح اد الدنيا .. حتى بـ الماريه معه سبحة ما يمشي الا بها وان تسانه طلع من بيتهم من دونها يعتبر روحه مهوب رجال .. لدرجة انه يمتنع عن صلاة الجماعه بـ المسجد ( استغفر الله ) ويقول ما اصلي بـ المسجد الا برمضان بـ مصلى النساء لمنها ضاعت سبحتي ( ايقونتن ودها ان السبح ينقرضن تسود يدخلون بارتيات الدي جي عند البنيات) <-- .

ابو فيها : مقدر اقول ابدعت ولا اقدر احكم ع موضوعك لـ ان الابداع طالع منك وحنا نتعلم منك طريقة الكتابة وودنا نجاريك بردودنا ونعطيك لو ربع حق الموضوع .. ما شاء الله عليك كاتب كبير لا يشق له غبار .. ما يمدينا نبداء بـ اول سطر الى حنا بـ آخر سطر من موضوعك وقمت الانسجام لدرجة اني عشت دور راشد وصرت اقول شكل ابو فيها مع ابوي بـ استراحته و يعرف خوي ابوي السبيكه اللي يطاوع ابوي بكل شي .
وترا برايفت مهوب احسن مني يومنه يثبت موضوعك
* نسخة لـ ذهب الملحق بعد اكتمـال الردود ( ) .

سيل الظلام

عيار

انا ابي اعرف شي واحد يا رايح فيها ,,, انت صدق رايح فيها وعاطبها ومأجر الدور اللي فوق ,,, ابي اعرف شي واحد ممكن تخدمني فيه وتطلع صديقي اللي من بعده انا مالي اخويااااء واقطع القهاوي كلها ولا عاد اطبها وتدعي لك امي وتقول الله يوفق اللي سوا خير بوليدي ومنعه من دخول القهاوي وريحة التتن والجراك وجلسة السرابيت ,,, رايح فيها ابي نوع الصنف اللي تستخدمه ,,, انت قضوم ولا ابرا وعلومن سفره ولا بودرة وشم ,,, رايح فيها مهبول منتب صاحي موضوعك يدخل الواحد بمتاهات تسنه داخل ذا الغابه صدز ,,, تخيل اني كنت معكم ويوم طبو عليكم هالعبدن التكارنه كنت فوق الشجرة انا وخديجة وحده تقول للقرد وخر وانا بجلس مكانك ,,, بس للظروف احكام ,,, والضرورة تبيح الممنوع <<< الشيخ الاسلامي والمفتي المطوع
موضوع فاصل وبقوة والكاتب غني عن التعريف <<< والله لو انه فلاش ميموري وشابك على نظام اكس بي وما فوق
موضوع منتهي الى النعله < وانتم بكرامه > تمزعت ضحك وتقطعت مصاريني وامي تناظرني وتقول يالله اصلح ولدي وخله يبعد عن ذا المخزي ,,, تسانه هبل فيه وطلع قليل صح ,,, زود على القله اللي سببها له ابوه ,,, وعلى طاري ابوي والله يا كان سفاح مهوب ابو حنون يعطف على عياله الزيون الطخمان اللي مثلي وشرواكم < شرواك الطيب يا عيار > كان حاقد علي ابوي من كثر ما انا مخرب عليه الجو وماكل امي عنه ,,,, صاير يغار اذا جت ابوي تدورني بالملحق تالي الليوم تشوفني موجود ولا للحين اسربت وملاحق ورا المواكب التفحيط ,,,, كانت الله يجزاها خير تجي تالي الليل وتلحفني بالشرشف وتغطيني زين وابن اللذينا يويدز على امي من بعيد ويقول وش يوديها لغرفة ولدها اخر الليل ,,,, يا منحط هذا ولدها يبه صدق انك سبهه احد يحاسب الام وهي تلحف ولدها ,,,, ياخي مهوب ذنبي ان امي تحبني يومنك كل يوم تمحطني بسلك المسجل ,,,, رايح فيها صرقعت ونسمت ووزحفت فينا وخليتنا نكب الخافي والمستور عن بيتنا المزبله
رايح فيها ,,,

دويشّر

تمنيت أني قاري الموضوع في الليل لكن قلت خلني ابدى اقرى بداية الموضوع واسكره وأرجع في الليل ... لكن الموضوع سحبني على وجهي الين [البراشوت الواحد بـ 25 ريال ] .

والله ودي اقتبس وما ودي تبي الصدز كل موضوع يبيله اقتباسات لكن كل ماقريت سطر وجا كلام في هالراس اقتبسناه .. يعني موضوعك في الصميم وخصوصاً انه عن وزارة التجارة .. كل ماقريت ( وزارة التجارة ) ذكرتني بواحد الله يذكره بالخير كل مادقيت عليه قال انا في الوزارة لدرجه اني خلاص ما أدق عليه على طول ارسله كول مي اذا خلص يدق علي

ياخي أبو نواف حبيته تحس انه على نياته بس وش طيحه في هالمقرود ابوراشد لكن خلوه مع الحظ الاقشر يا ناس .
وحبيتك معهم يابعدي

هههههههههههههههههههههه ههههههه شرهتك على اللي طلع حساب عشان يساهم لكن والله طلعنا بطاقة لأن الدراهم كثرت ولا عاد يزبن البوك

اقتباس:

والميزه في اقتراحات ابوراشد انه ينفذ اول وبعدين يدرس الاقتراح موب مثل ربعنا درسوا انشاء نفق الشفاء عشرين سنه والتنفيذ يبي له 5 سنين ويفتتحونه بعد التنفيذ بسنتين بسبب بعض المشاكل والنتيجه ان الي اقترح عليهم انشاء النفق يكرمون احفاده لأنه ميت من سنين طويله

ههههههههههههههههههههههههههههههههههههه اقسم بالله يا رايح انها في الوريد

رايح فيها ..[] يابعدي عز الله أنك ابدعت ومتعتنا بموضوك الأليم لا عدمنا هاليد يالسربوت

دويشّر

برايفت سيل الظلام ..