الأشياء الصغيرة التي تقهرني ! (على هالعنوان بتقولون راضعتن مع ريتشارد كارسلون )

النمرة · 20-05-2008, 06:43 AM

يالله ان تحيي الجميع كلن بإسمه

أحب قبل لا أبدا أني ابارك للنصراويين تكريم ماجد عبدالله اليوم والله يوفقه في مسيرته المستقبلية <--- شفتوا الروح الرياضية العالية في ذا البنت

موضوعي بإختصار شديد عبارة عن بعض الأشياء الصغيرة التي تقهرني <--- تراهم قارين العنوان يالكمخه

في محلات الأثاث :-

هالحين لاجيت لأحد هالمحلات في سوق بن دايل مثلاً (<<< تسمع بالكشخه) والا في العويس (<<< هذي قمة الكشخه) أو في صناعية الخليج (<<< ماعقب ذي إلا إيكيا خلاص) وقعدت تتفرج على الأسرة والمراتب حقتها وتجرب تطامر عليهن وجربت زنبركاتها وجازت لك وجيت بتسأل عن أسعارها يجيك البياع يقول :-

السرير أبو نفر بـ هاك العدة وأبو نفر ونص بـ هاك العدة وشوي وأبو نفرين بـ شوي وهاك العدتين

طيب لحظه يالحبيب / وش نفر ونفرين قالوا لك سرير والا مندي

ووشلون يعني نفر ونص .. ينقسم الآدمي نصين وينام نصه على السرير ونصه متدودل بين السما والأرض؟ وبعدين أي نص فيهم اللي نايم على السرير هل هو نصف فوقاني والا تحتاني والا الرجال مقسوم بالعرض والا شلون نص نفر يعني؟

ووش فيها لو قلتوا queen bed موب أحسن

ولا جيت للكنبات عاد .. وش حليلهن وش زينهن وكل طقم يقول الزود عندي .. بس شف المسميات:

كنبة مفرده single seat ... وكنبه مزدوجه loveseat .. وكنبة ثلاثية sova

اعنبوا بليسكم أي لف سيت أول شي المحبين ان بغوا يقعدون موب قاعدين في كنبة لشخصين لأنهم بيقعدون بأحضان بعض تكفيهم كنبة مفردة ثاني شي عندنا اللي يقعدون عليها غالباً يا سطعشر بزر كلن واطي على الثاني والا واحد وزوجته متهاوشين وكلن ماد بوزه للثاني ومع هذا فهم قاعدين عليها بغض النظر عن التسمية اللي مالها علاقه بإستخدامها الفعلي فالمفروض التجار لامنهم جابوا هالبضايع للسعودية يخترعون لهم مسميات ثانيه تليق بإستخدام هالكنبة من أمثال : fight-seat أو feed-seat أو أي شي ثاني غير loveseat

وطبعا مافيه داعي اقول ان الصوفا ترجمتها كنبة التسدح قبال التلفزيون

في المنتديات :-

الله يقلع الألوان واللي اخترعهن في المنتديات طبعاً أنا ما اقصد الألوان ككل جايتكم في السالفة أنا أخبر الواحد متى يستخدم الألوان... لا بغى يميز كلمة معينة عن غيرها لأنها سؤال والا عنوان والا حاجة مهمة يبي الناس تنتبه لها .. وإلا إذا كانت وحده عندها ذوق بمنسوب عالي (وهم قلة مثلي ) وحبت تنسق موضوعها قامت تمازج بين الألوان في التنسيق بشكل هادئ ومرتب .. بس كون الواحد يكتب كل حرف في كل كلمة بلون مختلف ويحلل أبو الألوان في موضوعه ! مشكلة أجهرتوا عيوننا ياناس

واليوزرات وما أدراك ما اليوزرات .. اللي يجيك رجال مسوي فيها رومنسي وعاشق بيخقق البنات عليه وهو توه متعشي كرعان ضب مكشوفه طبعاً ما يبعد عن "روحي تحبك" والا "مجنون الغرام" والا "tom enreky kroz">> هذا من جنبها بالانقلينزي بس يسمع ان البنات يخقون على توم كروز و انريكي ايغليسياس قال مابدهاش نجمع الحلوين في يوزر جميع

والا عاد يوزرات الرجال اللي داخلين بأسماء بنات
"بيضا وعيوني وساع" ... "قمر الرياض" ... "أحلاهن" خلاص عاد ترى باخت السالفة يا عيال أكبروا شوي

وأكره مالي لا صارت بنت .. أمها تسمح لها لا خلصت واجب المطالعة تفتح النت ويوزرها ما يبعد عن "دلوعة وتجنن" والا "ألماسة الورد" والا "النجمة اللامعة" .......... عن إذنكم بروح أطرش
يدخلون كلمات مالها علاقة ببعض وبزعمهم إسم خيالي .. والا وش جاب الورد للألماس ؟؟! بس بالفعل مدري وش قصتهم مع الماس من يوم تشوف يوزر داخل فيه كلمة ألماس اعرف ان وراه بنت في سادس

في المسنجر :-

أنا أخبر الرموز اللي على شاكلة ( $ ، ~~ ) يستخدمونها أحيانا ً من باب الزينة و زبرقة العناوين والتوبكات .. لكن يجيك توبك زي كذا

ღ♥ღ♥ღ♥ღ♥ღ♥ღ♥ `·.¸¸.·¯`··._.·₪ مخنـ ~ ــوقه يمـ ~ ـه وأحس الخنقـه هدتنـي!! مخنـ ~ ــوقه وودي أبكـي ,, لين يبقى دمــ~ــوع !! او لين الدمـ~ــوع تكرهني!! ₪..ღ♥ღ♥ღღ♥ღ♥♥`·.¸¸.·¯`··._.·

طوله مترين يمين ومترين يسار كله فواصل ونقاط وأقواس لا جيت تحكي مع صاحب هالتوبك ماتدري وين تلقى كلامه من طول إسمه
وكلش كوم ولا صار اللي معك يستخدم مسنجر نسخته غير اللي عندك كوم ثاني .. خاصة إذا صار مسنجره بلس وحاط إسمه بلون مختلف وزبرقة وأصوات ويجي يكشخ عليك وأنت ما يطلع لك غير

[color=4]·$#000000·$ليه دايم أحتاج أسئلك ·$·$ ·$,#FF0000 ·$#FFFFFFوش فيك وش إللي زعلك ؟ ·$·$... says:
[/c]
ورموز من هالقبيل

وش فيها لوخليتوا اساميكم بالأسود يعني؟؟ إلا لازم يعنني عندنا مسنجر بلس؟؟

<--- طيب نزلي مسنجرهم وارتاحي

والقائمة تطول لكن هذا اللي في جعبتي الحين عطونا مافي جعبكم وإذا ذكرت شي ثاني بأكتبه كـ رد .. تابعونا تجدون مايسركم

يامال الفانكس

A S 6 O R H · 20-05-2008, 07:18 AM

يالله ان تحييها و تبقيها لـ عينن ترجيها .. اول الغيث قطره .. عقبال ما نشوف روايات لتس .. وعقبال المواضيع اللي تملين وانتي تكتبين فيها وتخلي االلي يقراها يبي اكثر .. النمرة .. وش تحسين فيه وانتي تتكلمين بـ محلات الاثاث .. يعنني اني بنت الاكابر .. وانا اللي محدن قدي واعرف احتسي انقليزي .. يختي راعي ظروف اللي مثلي .. راعي طبقة الفقاره .. طبقة اللو كلاس .. الطبقة اللي للحين ما تمدنو .. صدقيني مره رحت لـ مطعم وطلبت لي عشاء .. وقالي ابو فلبن .. محلي ولا سفري .. قلت له لا يرحم امك ابيه تيكاوي .. صدز اني زلابه .. بس ترا يجي مني احيانن اللقط لي كمن كلمة من العيال واكشخ فيها عند هـ العماله .. والا اشين شي .. لمني جيتس متكشخ ع آخر شي ع الصنقل 10 .. وجلست واقول للعامل .. اكسيوزمي .. وجاتس ابن الكلب مدرعم ويرد علي ويرطن انقلش .. والله يا انا اخور بكل شي ويا سفاب كشختي والله .. يقعد يرطن يرطن ويحسب ورا كشختي رجالن بيرد عليه نفس لغته .. ما درا ان فيه واحدن ما يعرف هو تهش ولا تنش .. يدربي رويسه ولا يدري وين ربي حاطه .. آخر شي اقول له الطلب اللي انا ابيه بـ العربي وانا متفشل .. بس اهم شي اخليه يكمل ولا اقول له نو سبيك اربي .. اخليه ياخذ جوهـ وانا اخذ جوي اهز راسي اللين يسكت تسنه حط نقطة آخر الكلام .. ابداء اهذر عليه عربي واطلب منه اللي ابي .. اهم شي ما اخلي احد حولي .. ويا شينها لمنه رد عليك انقلش وحولك عالم وانت يا ما تدري وش تقول .. حيل الله أقوى .. وبعدين تسني شفت ذبتن تمشي مليون .. على سالفة المنتديات والالوان .. يا بنت الحلال قولي انتس غايرتن مني واني اعرف انسق وعندي حس ذوقي .. وانتي يا غافلينن لكم الله .. ربي عطاتس الانقليزي وعطاني الذوق .. معليش يـ النمرة انا ممكن اتفق معاتس ونسوي انا وياتس توأمة .. انتي اللغة وانا الذوق والكشخه ( ايقونتن تروح للسوق مع خواتها عشان ينسقون لها الملابس ) <-- نصابين اروح لحالي .
وهـ يا ملحي اهبل انا واللواني واشوى اني من المنسوبين العاليين اللي تقولينهم .. ويوزري ما فيه اشين منه الايحوم التسبد ولله الحمد .. واتذكر اني قد سجلة بيوزر انتحاري بحدا المنتديات .. وقسم بالله ان يوزراتي تروع .. كل واحدن اللعن من الثاني .. وقسم بالله تحوم تسبدي من هـ اليوزرات اللي تجي فيها مصالتن مدري وش تبي .. ما نيب ناطقن بـ اية يوزر لا يصير واحدن معنا بنفس اللي بقوله .. وهـ بس يا الطاسة ولا عربيد ولا كويحه <-- للمعلومية ولا واحدن منهم لي وعلى ذلك جرا التنويه .
اما المسنجر لا تسئليني عنه .. لـ اني من اول كل توبكاتي لون واحد وكلها سواليف مغازل ولعن خير في سيل الظلام و اهات و الصعيدي برايفت .. ومن بعدها تطورت وصرت اخلي اللي عندي يصلحون لي توبكات .. بس معليش يـ النمرة فيه فرق التوبيك اللي انتي قبل شوي حطيتيه ( ليه دايم احتاج اسئلك .... الخ ) والتوبكات اللي اوصيهم عليها .. كل التوبيكات تصير يوزري ( الاسطورة والحالة ميسورة ) لمني صرت بطران ومعي قرنقش وتوي مسدد كل فواتيري ومشترك بـ الدي اس ال .. بعدها بكمن يوم يقلب لـ ( الاسطورة والحالة معدومة ) ابداء اخلي اللي معي ع المسن يحولون ع حسابي او اقابلهم واخذ منهم اللي تجود بهي انفسهم .. يعني لمن اللي ع المسن ما فادوك من يبي يفيدك لازم تستغلين اي واحد تشوفينه قبالتس .. وعلى فكرة تراي من قبل الصلاة وانا انتظر موضوعك ينزل صليت ورجعت وانتي ما نزلتيه وانا فيني نوم جبال طويق كلهم .. جيت برقد واشوف الساعه قلت ما تسوى النومه وورانا دوامات .. واسوي تحديث واللقى موضوعتس نزل قلت خلونا نرجع ليااقتنا شوي ع النمرة ونتبيثر عليها مع اني والله فيني نوم ولا اعرف اعبر .. تحملي مصالتي مالتس الا الاجر .. والعذر والسموحة ادري اني ما جبت مواقف من عندي بس خليني امخمخ عليه بعد الدوام ان شاء الله وعلي اتذكر شي واجيبه لتس .
الاسطورة قدس الله سرهـ

* مثبت /.. برايفت الباقي عليك .

ستاربكس · 20-05-2008, 07:23 AM

خخخخخخخخخخخخخخخخخخخخخخخخخخخخخخخخخخخخخخخخخخخخخخخخخخ خخخخخخ

أيا ناكرة المعروف .. ما لقيتي تذبين إلا علي خخخخخخخخخخخخخخخخخخخخخخخخخخخخخخخخخخخخخخخخ

اقتباس

أول شي المحبين ان بغوا يقعدون موب قاعدين في كنبة لشخصين لأنهم بيقعدون بأحضان بعض تكفيهم كنبة مفردة

يا عيني يا عيني ..

اقتباس

انريكي ايغليسياس

آهات تعانيك ترا .. <-- تبي تشب بينهم ..

اقتباس

والا وش جاب الورد للألماس ؟؟! بس بالفعل مدري وش قصتهم مع الماس من يوم تشوف يوزر داخل فيه كلمة ألماس اعرف ان وراه بنت في سادس

خخخخخخخخخخخخخخخخخخخخخخخخ شوفي بنت أختس مسميتن روحها بلوتوث ., " ألماسة حساسة " .. خخخخخخخخخخخخخخخخخخخخخخخخخخخخخخخ يا إني كعيت ضحك عليها ذا الخبلة .. يقال لها مسويه أكشن الحين خخخخخخخخخ ..

اقتباس

[color=#000000]·$#000000·$ليه دايم أحتاج أسئلك ·$·$ ·$,#FF0000 ·$#FFFFFFوش فيك وش إللي زعلك ؟ ·$·$... says:

خخخخخخخخخخخخخخخخخخخخخخخخخخخخخخخخخخخخخخخخخخخ .. يختي شفيه توبكي ..
بعدين طووووووول الوقت توبكي كان وش زينه ( وظفوني وإلا ترا بهج من السعودية ) ويوم إني غيرته .. ذبيتي عليه ..
انتي إللي قرويه , وإلا كم مرهـ اقول لتس حملي البلس ..

اقتباس

عطونا مافي جعبكم وإذا ذكرت شي ثاني بأكتبه كـ رد .. تابعونا تجدون مايسركم

إذا فيه بعد زيادهـ ,, حطيه لنا جزء ثاني .. , فاضين لتس إحنا كل شوي نشوف وش رديتي ..

أختاااااي الخبله .. ثاني مرهـ لا بغيتي تذبين , ذبي بعيد عني يختي خخخخخخخ ..

وخروا عني !! · 20-05-2008, 10:03 AM

يا هلا والله بالمطخطخه < -- فيس يقول هل صحيح اسمك المطخطخه ولا الانمره

العن ام الفضاوة يا شيخه .. اجل اشياء تقهرك .. طيب حنا وش دخلنا < -- العن ابو ردك انت بعد على هالصباح

صبااااح الخييير < -- فيس يناظر الاسطورة ويقوله ما شفناك توطوط في مواضيعنا

يعني يوم اني احطلك صورة بنت تحت اسمي واجلس اتدلع واتغنج في ردودي وانت ولا همك ولا حتى مريت على مواضيعي .. وش تحس به والكل يناظرك ويقول ورا ما ترد علينا يا بوو .. ووش شعورك والكل يقول هل الواسطه تدخلت ايضا في المنتديات < --

اسف على هالشطحه ونبدا بالمفيد

اقتباس

طيب لحظه يالحبيب / وش نفر ونفرين قالوا لك سرير والا مندي

تدرين عاد .. ما ادري احس اني لما اقول نفر احس اني هندي .. تراها موب كلمه عربيه احس .. اسمعي اسمعي هالسالفه

مرة من المرات رايح برجر كنج واطلب بالانجليزي وكذا وبالاخير الاخ يقول سفري ولا محلي ؟؟ .. ناظرته كذا .. قلت له بالعربي .. لو حنا جالسين بـ مطعم بخاري قول سفري ولا محلي ترا حنا في مطعم فاست فود ( وفي روايه اخرى سبيد فود )

ادري ان السالفه مالها دخل بموضوعك بس انتي قلتي كل واحد يقول اللي قهره .. وقلتا

اقتباس

ووشلون يعني نفر ونص

ياربييي يعني مسويه مو فاهمه .. قصدهم نفر والنفر الثاني نصه فوق النفر الاولاني والنص الثاني على السرير .. بس

اقتباس

واليوزرات وما أدراك ما اليوزرات

لا عاد هذي جلستها جلسه .. امير الغرام .. وملك الرومانسيه .. وغيرها من الكلمات .. اللي تخلي البنت تذوب لما تشوف اسمه ( بنات سادس قصدي الالماسات هم اللي يخقون على هالاسامي ) ما ادري وش يحسون فيه وهم مسميين نفسهم بهالاسامي .. طيب والفشله لا جاك واحد سألك وش اسمك بالمنتدى .. قلت له امير الغرام .. ولا قلب ما ادري وشو .. والله هالاسامي ما عاد لها كرت الحين .. شوفي شوفي اللي يقهر صدز لما اشوفهم

كنتاكي ليست مجرد مكتبه
او

مكتبة كودو للإسعاف

وووووووووووووع

العن ام السماجه يا شييخ .. لا والادهى والامر .. لا جاك احد عطاه وجه وقاله ترا نكك يجنن .. العن ابو شكلك وشو يجنن .. وقسم بنتحر .. تعالي بطرش وياك النمره

اقتباس

وش فيها لوخليتوا اساميكم بالأسود يعني؟؟ إلا لازم يعنني عندنا مسنجر بلس؟؟

عاد بهذي وخري بس .. وش فيها طيب لو الواحد استعمل ماسنجر بلس .. يعني ما حملته علشان اجلس اناظر خشتك واستنى تنقدين < -- قلب عليها

بعدين الكل الحين يستعمل بلس والوان وقله حيا .. وقفت علي يعني < -- محد كلمك انت .. حتى لو ما حملتي ماسنجر بلس بتشوفين ماسنجرك خربوطه .. كانه شله يمن جالسين يليصون مجلس .. ركبي ماسنجر بلس وخلي عنك الخنبقه الزايده

النمره

موضوع جمييل جدن جدن

برايفت الاسطورة

اقتباس

*مثبت /.. برايفت الباقي عليك .

ياخي طيب قولها انت للذهب وما ادري وشو وراه برايفت .. يعني اني ما سويت شي وانا مؤدب وجا برايفت ووداه للذهب .. العن ام الواسطه يا شيخ .. طيب مر علينا شوي

عطنا وجه .. الاسطورة مجرد خنبزه انا بعد جالس اخنبز عليك .. اعرفك تستحملني

سلاااام

موافق عليها · 20-05-2008, 10:18 AM

النمره النمره مدري ليه يوزراس يذكرني بالاتحاد شكلي ابكرهتس صدز ان الله ماعطاني مثلكم لا اعرف اهرج عربي ولا انقليزي بالياله افك الخط <<< متأثر بامه بقووه
اول شي نجي لسالفه المراتب وما المراتب وشوله طيب الواحد يرووح يدور ماركه ومدري وشو ولازم يكون مريحه ومدري شلون والله ترى راس مالها نومه يعني مهب لازم يجي طول المرتبه ثلاثين متر عشان تعرف تدربا على كيفك احلى طريقه كانك تعرف احد في اسكان الحرس في خشم العان ويبي يطلع من بيته يبي ينقل لم حي اشبيليه مثلا << يلعن ابو امثالك قله بالله الله لا يهينك يرحم لي والديك عطني مرتبه من اسرتكم دام انكم تبون تطلعون ولا تسان عمك دكتور بالعسكري وجدتك تعبانه وصرفوا لها سرير بالبيت وهي لاقدر الله توفت (الله يرحمها ) واهلك ناوين يرجعون السرير من الامانه الحين خذ انت المرتبه وخلهم يرجعون السرير وكييذا يصير عندك مرتبتين بعدين وشوله يشتري الواحد سرير ورا مايفرش بالارض اريح له يقولون انه مفيد افيد من السرير

اما على طاري الكنب والله اني احب الجلسه الارضيه عندي حكمه ماطير طير وارتفع الى كما طار وقع هي كييذا بس ولا غلط خاصتن اذا كنت شاريه قطه <<< ماعمره خسر ابد

اما على المنتديات اشوا اني ماعرف الاوان ابد ولاكد استخدمتها الا مره يوم اني احط عنوان في الثمان طعش حتى كتبت كييذا :: يوم السبت :: وعقبها ماكد حطيت الوان اما على طاري الاسماء بالمنتدايات اشوا اني ماشاركت الا بها المنتدى وحتى اسمي جاي غلط صدز انه اللي يقراه يقول وش هالتميلح بس والله والله جاي بالغلط <<< قام يحب رجلها

والماسنجر صدز اني دايم الون وازبرق بس والله الجمل من نافوخي ولا عمري طلعت الوان زينه دايم والله يجني تهزئ اتوقع اني بالقريب العاجل راح ارجع للاسود عما قريب

احس اني حقتها

نبض · 20-05-2008, 01:52 PM

اقتباس

الأشياء الصغيرة التي تقهرني ! (على هالعنوان بتقولون راضعتن مع ريتشارد كارسلون )

خلينا نعرف منهو ريتشارد كارسلون قبل عشان نقول انتس راضعتن معه!!!
مع اني اشك انتس حتى انتي ماتعرفينه على بالتس علبة شوكولاته والا مشروب طاقه جديد والا حاجه زي كذا...الله يخلي قوقل بس

المهم...
نجي للموضوع ياابضايه===منيب متأثره بسنوات الضياع ابد

اقتباس

ووشلون يعني نفر ونص .. ينقسم الآدمي نصين وينام نصه على السرير ونصه متدودل بين السما والأرض؟

هههههههه يابقره نفر ونص تجي بمعنى ( قدها وقدود).....زي اذا قالوا لتس رجّال ونص والا حرمه ونص..عرفتي شلون يالكمخه؟===مدري منهو الكمخه والله

على طاري الاثاث
ابقول لتس موقف صار معي امس في محل الاثاث...هو صدز ماله علاقه بالموضوع بس ابقوله كيفي عندتس مانع؟ لا لا قولي ان عندتس مانع بعد!! هذا اللي ناقص ناس ماتنعطى وجه===وراي قلبتس عليتس؟؟

امس انا واختي رايحين ادينوس مدري ادنوس مدري وش اسمه ذاك اصبري افتح قوقل
ايه اديموس
اختي تبي تشتري طاولة مكتب حق غرفتها...المهم لفّينا الطابق الاول وماعجبتها ولا طاوله....ولفّينا الطابق الثاني برضو وماعجبتها ولا طاوله...مع ان المحل كشخه وكل طاوله احلى من الثانيه بس تعرفون ذوق القراوا
المهم لما جينا بنطلع لفت انتباها طاولة مكتب على جنب...قالت بسسسسسسس...هذي اللي ابيها....راحت تمسّك فيها وتلعب في الدروج وتدور في الكرسي وتشخبط على الاوراق اللي عالطاوله وتقول ماشاء الله كامله والكامل وجه الله...هذي اللي ابيها...وماشاء الله يجي معها طقم مكتب كامل ...روحي اسأليهم بكم.....
واروح انادي البائع===يمديكم على البائع

واقول له يابائع====عجبتني

بكم ذيك الطاوله اللي قاعده عليها اختي البقره؟؟

قال البائع==لحووول

اي طاوله؟؟ قلت له كم بقره عندكم بالمحل؟؟؟ قال ثنّتين...انتي واختس...قلت له اجل لايكثر وقول لي بكم الطاوله

قال ذيك الطاوله مو للبيع..هذا المكتب حق مدير الفرع!!!

انا وجهي صار كذا...قلت له صدز؟؟ اصلا بس حبينا نمزح معكم .. مو حلوه نطلع وايدينا فاضيه ونحطمكم...عشان كذا حبّينا نخلق جو الدعابه في المحل===ترفّقو علينا ياطاقم قناة فنون

والله واروح ركض لأختي واشوفها تحوس في كروت المحل وتقول شوفي شوفي يجي معها بطاقات هديه بعد...قلت لها لابوتس لابو اللي يجي معتس مره ثانيه يعني الحين محل وشكبره ماعجبتس الا طاولة المدير؟

وامسكها واسحبها ونطلع بره وتجـ.....اووووووووووووووف بقص لكم قصة حياتي انا؟

اقتباس

الأشياء الصغيرة التي تقهرني ! (على هالعنوان بتقولون راضعتن مع ريتشارد كارسلون )

تكية الملحق