افتح يا سمسم ابوابك نحن الاطفال

وخروا عني !!

صبحكم بالخير يا عمال العماليه .. مساكم بالخير يا عمال العماليه

جينا ناخذ بنتكم الحلوة الجميله .. ما نعطيكم اياها الا بألف وميه

بنكسر ابوابكم .. وبناخذ عيالكم .. وهذي عروستنا


اناااااااااااااه

والله ذكريات حلوة .. صحيح انها كانت العاب سخيفه ومالها سنع بس والله كنا نتونس ليش ما ندري

الله يرحم ايام أول .. لا سبيس تون .. ولا افلام كرتون كلها حروب وطق وطقيق زي الحين .. كانت وناسه .. بومبو وطختها .. واذا كان الفيلم كرتون اكشن .. حطولنا قلندايزر ولا سانشيرو

كانت هذه مقدمه بسيطه

ندخل بالمفيد

-----------------------------------------------

يا عيال وبنات اللذينا .. هل في يوم من الايام تمت مقارنه بلوتوثات عيالنا وبلوتوثات عيال الامريكان الحمر .. اكيد لأ .. وذلك لان مافي وجه او وجيه مقارنه بين الاثنين

تبون الدليل والاثباتات وكل ابو شي

سرينا تحت نناظر الفيديوهات



قمه البرائه .. ااااوتش < -- عجبته الكلمه .. ياخي مشكله الاجانب منهم صغار يعرفون يتكلمون انقليزي وكذا .. مواافق ياليتك مولود هناك كان الحين نشوفك تسولف بالانقليزي ( ويانا ) بدل ما انت تتكلم عربي في كل ابو شي .. حتى يحلفون انك في تشيليز تطلب وبالاخيرتقول له سفري تسنك داخل مطعم بخاري


نشوف المقطع الثاني



اووهووووووووووو ... .. وش رايكم بس .. شفتوا عيال الاجانب وش يقولون .. اووووتش يو هيرد مي جولي .. ولكن عيالنا وش ييقولون ... لعن الله ابو ابو هالشدود .. اووووهووووووو

---------------------

يقولون كلن له مواهب في هالدنيا .. والشاطر اللي يعرف وشلون يطلع مواهبه .. او يستغلها ..

وبعض الاحيان تصير منافسات وكذا بين المواهب والشاطر اللي يفوز ويصوتله الجمهور ( فيس الطخمه اللي بـ ستار اكادمي )

تعالوا نشوف هالمنافسه



عسى ما تروعتوا بس

وش رايكم بس بالجمهور .. انواع الرشاشات والشدود .. الله لا يحطك بينهم يا الاسطورة .. قسم ان تروح غلطه ثمن نشوفك في مقطع باليوتيوب وحاجبينه عندنا بالسعوديه

------------------------------

دايم تشوفون مقارنه بين عيال الحضر وعيال البدو .. وذلك لان عيال الحضر عند البدو رخوم .. انا لا أأيد هذه الفكره .. ولكن يوتيوب يؤيده

نجي نشوف





وقسم رحمت الكلب .. اهم شي يوم الورع يناظر في وجهه و كانه يقوله تبي شي .. الله ابو شكلك .. وين حقوق الحيوان عنك .. في امريكا حاطين دوريات حق حقوق الحيوانات وكذا ولو شافوك معذب سلحفاه قاضوك ويمكن يقصون راسك .. وانت هنا لاعن ابو خير هالكلب

والله دنيا

---------------------------------------

يعجبني الورع لا جاك فيه من علوم الرجاجيل .. ولا جاك لابس شماغ وكاشخن وكذا ..

ماراح اطول بالكلام .. نتابع



موافق يحلفون لو انهم راميينك في العاذريه في عز الصباح ما دليت وشلون تطلع ..

اهم شي

لامن تياسر وتيامن وفله

--------------------------------------

ماراح اتكلم هنا بعد بريح شوي ( فيس يشرب مويه )



واااااااااافديته يا ناس .. هذي الاطفال السنعه

-----------------------------------

عيال هالايام .. او بالاحرى ورعان هالايام .. كل ما يبي شي ولا احد لباله طلبه .. تسدح وتبطح وبالاخير يكسر خاطر امه ولا ابوه ويحصل مراده .. ولكن هالطريقه في بعض الاحيان ما تنفع في ظل وجود الزبيريات والشحاطات

وهالفيديو بيأكد لكم ان البزارين ما يبكون الا علشان يكسبون عاطفه الابهات والامهات

مشينا نشوف الفيديو



اووم العباطه واللكاعه في هالورع .. والمشكله ما يتوب وما يدري انه راح ينزل في يوتيوب < -- سجع

--------------------------------------

اخيرا وليس اخرا

مع موهبه من مواعب الوراغين الموهوبين

مع الموهوب

الطفل القطو

نشوف الفيديو



ابي اعرف وشلون دخل بس

-------------------------------

عمووووووما

اتمنى اني امتعتكم على هالصبح < -- والله محد حولك بهالصباح

واتمنى اني اسعدتكم قبل الاختبارات .. واتمنى اني طلعت اللي بخاطري من الطفش وكذا

اي استفسار ولا شي انا حاضر

وخروا عني !!

سلاااااااااااام

موافق عليها

ورخوا عني صوت الحق <<< الى الحين يحسبنه بالمحكمه


وش هالمقاطع الله ياخذ بيسلك على ها الضهريه ضحك لعنه الله عليك (على وزن لعنه الله على الشدود ) اما المقطع الاول اللي بزرين انقليزيين (تراهم مهب امريكان شف التيشيرت حقه ) << صح التدقيق ايه الانقليزيين والله مدري وش قاعدين يقولون المهم ادري ان العضه تعور وقاعد يقول اوتش اوتش خلا مخي يسرح قليل واتذكرك وانت قاعد تتعور من واحد انقليزي شلون تعطيه جوه اما المواهب الغنائيه يحايه الرووح (قلوب من هينا لسوريا ) انا من رأيي انك تشيل ها المقطع قبل لايجي الاذع همن تاخذ اثمه يا انها تروح عليك ولا تروح على ها السوري ابو صوت جميل << تراني قلت صوت اما ابو يمن اللي بالجزء الثاني من التصوير شي ثاني لو كنت ملاحظ ان اللي عنده خاشين جو وانا العن خيري واقطع يدي تساني فهمت شي من اللي قاله كله كوووم والبزر الملكع ابن الكلب اجل يدور الكميره عشان يجي يتبطح وتراني ضعيف الله يلعن بليسه والله انه غطى على الاسطوره باللكاعه شف عيالنا شف يصلون ازين من الامريكان اللي انت بازن فيهم شف الايمام مخارج الحروووف عنده مهب مضروووبه وبس الا معدومه ولا من وسع الخشه يقول للي جنبه قل امييين
وخروا عني الله يلعن بليسك كل ابو دايم اطفش والله اني عجز اروح ادور باليوتوب ها الحركات انا لامني فتحت اليوتوب ما افتحه الا عشان اشوف مقاطع الهلال << ايه هين وين راحت بميلاديفيد

جاسم كل تبن

ستاربكس

: موسبت :

سريع سريع راجعة لك يا صديقي ..

------

باك ..

ياخي وش هـ التحشيش خخخخخخخ ..

اما البزر الأمريكاني .. أأووووتش .. يا حلوهم يا ناااس ..

وإلا السوري حق يا حياة الروح .. تدري أنا قد شفت هـ المقطع من قبل , ورحت سمعت الأغنيه بسبته .. يخرب بيته عليه صوت ..
بس غطى عليه البزر إللي عقبه خخخخخخخخخخخ .. والله مدري وش يبي بـ حياته ..

اما ذا اللي يوصف .. ما فهمت ولا كلمه ..

قـل آآميـــــن .. , بسم الله على قلبه هـ الولد .. وهـ ودك من يأكله ..

خخخخخخخخخخخخ ذا البزر تحففففه , اجل يلاحق الكاميرا .. ذكرني بواحد من عيال اختي , لا شاف احد قدامه قعد يصيح , وإذا ما عطيناهـ وجه نسى السالفه ..

وش ذا البزر .. ذا بني آدم وإلا سبايدر مان .. <-- اول شي سبايدر مان إنسان .. ثاني شي وش دخله في الموضوع ..

وخروا عنه صديقي ..

وسعت صدورنا الله يوسع صدرك بـ العويفيه ..

كثـر لنا من هـ الفديوهات , لا شفت إنك فاضي ولا وراك شغل ..

وخروا عني !!

وخروا عني !!

وخروا عني !!

العن ابو شكلكم

لكم الحين 5 ايام ولا احد رد على الموضوع

ستاربكس تعالي العن ابو الحاله وفكي التثبيت

ابوو شكلكم

kwe7h

وخـروا عنـه
دايمـاً مواضيـعك أكـه <-- من كثـر اللي دخـلتيه ألحين خخخ

//

يـقطع بليسـه حتى شـف اللهجـة

اقتباس:

لعن الله ابو ابو هالشدود

وش ذا التربيـة
قسـم بالله شي يضـحك ويضيـق الصـدر بنفـس الوقـت , على بـالي هـ الناس خـلاص خـلصوا

::

اقتباس:

ذلك لان عيال الحضر عند البدو رخوم .. انا لا أأيد هذه الفكره .. ولكن يوتيوب يؤيده

اقتباس:

يـارجاااااااااااااااااااال , عسـاك سالم بس ,

مب رخـامة , ياملحهم والله , أجـل ذاك الجـفس المـجرم .. وجـع يـوجع اللي يصـوره

::

اقتباس:

تعالوا نشوف هالمنافسه

هههههههههههههههههههههههههههههههههههههههههه
هههههههههههههههههههههههههههههههههههههههههه
هههههههههههههههههههههههههههههههههههههههههه

الله يـقطع عـدوك قل آمين ,

::

اقتباس:

لامن تياسر وتيامن وفله

وبتـلقى لك خطيـط لاتنـساها , تـذكرت أبـوي بكـلمة خطيـط خخخخخخخ

::

اقتباس:

ماراح اتكلم هنا بعد بريح شوي ( فيس يشرب مويه )

مع أن أهم شي تعليـقك , بس معليـه اشرب اشرب عافيـه

ياقلبـوووووووووووووهـ
وأحلى شي , قـول آمين هههههههههههههههههههه
ماشاءالله , الله يحـفظهم

::

اقتباس:

والمشكله ما يتوب وما يدري انه راح ينزل في يوتيوب < -- سجع

اقتباس:

أول شي أهنيـك على ذائـقتك الشعريـة <-- صـارت ذائـقة خخخخخخخخخ

ثـاني شي ,
ههههههههههههههههههههه
يازيـن عبـاطته , ويـاروق أهله خخخخخخخخ
يـوم كنــت صغيـرة كنت أسـوي مثـل حركتـه وأكتـم نفسي لـحد مايـقلب لـون وجـهي - على كلام أمي - تقـول ماعـقلتي لحـد ماتـركانك , كانت تخـاف علي أمـوت الظـاهر خخخخخخخخخ

::

اقتباس:

الطفل القطو

واللي يصـوره يـقول يالسكنـي , مسـوي يشـجع هو وخشـمه
بس اللي فـجر مخـي كيـف دفـع نفسـه لجـوا , تتـوقع أحـد من ورا يسـحبه

اقتباس:

اتمنى اني امتعتكم على هالصبح

ليـتني والله شايـفته على الصبـحية , بـ الفـراغ

عمـوما , واللهي أنـت أكـوس شي ,
يسـلمو قـد كثـير .. وسـعت صـدري الله يـوسع صديـرك بالعاافيـة

.

وخروا عني !!

هلا والله بالكويحات كلهم

بالسود كلهم

بالعبدات راعيين البسطات

< -- تحمس

وش اخبارك كويحه .. نورتي موضوعي

.. ياحلو شعور .. احس اني نهضت من جديد بعد ما طحت وبعد ما سحبوا علي الناس ولا احد رد علي

اقتباس:

وش ذا التربيـة قسـم بالله شي يضـحك ويضيـق الصـدر بنفـس الوقـت , على بـالي هـ الناس خـلاص خـلصوا

شفتي وشلون .. للحين في ناس تربي عيالها على الكلام اللي مال امه وابوه داعي .. والله في مقاطع كثير باليوتيوب فيها كذا .. الله يستر

اقتباس:

يـارجاااااااااااااااااااال , عسـاك سالم بس , مب رخـامة , ياملحهم والله , أجـل ذاك الجـفس المـجرم .. وجـع يـوجع اللي يصـوره

اي ادري انه موب رخامه .. بس البدو كذا

اجل اسمعي هالنكته

يقولك في بدوي يخطب في جماعته في صلاه الجمعه ويقول .. تصدقوا وصلوا وافعلوا الخير .. ماهوب يوم ادخل الجنه بعدين ما اشوف غير حضران متسدحه

كيف

اقتباس:

وبتـلقى لك خطيـط لاتنـساها , تـذكرت أبـوي بكـلمة خطيـط خخخخخخخ

الله يخليلك ابوك

اقتباس:

مع أن أهم شي تعليـقك , بس معليـه اشرب اشرب عافيـه

وش اسوي غصيت

اقتباس:

وأحلى شي , قـول آمين هههههههههههههههههههه ماشاءالله , الله يحـفظهم

اي هذي التربيه السنعه

اقتباس:

أول شي أهنيـك على ذائـقتك الشعريـة <-- صـارت ذائـقة خخخخخخخخخ

وانا اهنيك بعد على الترفيع بي .. واهنيك على كل ابو شي

اقتباس:

يـوم كنــت صغيـرة كنت أسـوي مثـل حركتـه وأكتـم نفسي لـحد مايـقلب لـون وجـهي - على كلام أمي - تقـول ماعـقلتي لحـد ماتـركانك , كانت تخـاف علي أمـوت الظـاهر خخخخخخخخخ

اقتباس:

لووووووووووووووووووووووووووول

اجل تكتمين انفاسك .. انا يوم اني صغير كانت امي تقول اتبطح في الارض واجلس احوس .. لحد ما تجلدني امي ولا تسفهني ثمن اقوم

اقتباس:

بس اللي فـجر مخـي كيـف دفـع نفسـه لجـوا , تتـوقع أحـد من ورا يسـحبه

عادي سكني على قوله خويه .. وبعدين ترا الصغار وخاصه اللي كل ابو دايم بالشارع وكذا عادي تشوفينه يسوي العجب العجاب .. يعني لا تستبعدين تشوفين مقطع يو تيوب بزر فوق اشاره .. ابدن عادي الوضع

اقتباس:

عمـوما , واللهي أنـت أكـوس شي , يسـلمو قـد كثـير .. وسـعت صـدري الله يـوسع صديـرك بالعاافيـة

ليش قلتي صدري وقلتي صديرك .. اكيد السالفه فيها ان

المهم ما علينا

نورتي الموضوع وكذا .. وردي الزياره .. وثانكيوو على الوشسمه

يا صديقتي العزيزه

سلاااام

Ls3t Lka3aн ~

يآحيآاه الروح يآأنت يآشيخ

اروح بلكـّه مع العُرب الي تقطها

الشي الي طـلع بعدهـ يآهو يجيب العنقـز


شوكرن مرآأ(وردهـ)

وخروا عني !!

^
^

هذا اللي قدرك الله عليه

سويرا الحين انا في حاله نفسيه سيئه وانتي تجين تزيدين الطين بله .. لو انك مسويه اقتباسات فله مو كان الحين اسارير صدره منشرحه وكذا

بس مو مشكله تشكرين على المرور .. ونورتي الحته

برايفت ستاربكس

تعالي فكي التثبيت خلاص تحطمت بما فيه الكفايه

ستاربكس

^^

يااخي يكفي أن الموضوع عجبني وثبته .. وإلا قل إعجابك ما يكفي .. لا قل قل .. <-- فيس حالته النفسية دماااار ..

بعدين موب لازم كل من دخل رد , فيه مواضيع مخيسة مليانه ردود من نمونه , وااو شكراً مرهـ خطيرهـ .. وفيه مواضيع روعه .. وفيها ردود اروع .. من ناس رائعين .. <-- ما تعرف إلا كلمة روعه .. وتلاقي عدد الردود ولا شي مقارنة بـ المواضيع الثانيه صحيح ,, بس إنها ردود عليها القيمة ..

بعدين إللي ما دخل موضوعك ولا رد هو الخسران صراحه .. ماشاء الله مميز في كل مواضيعك وردودك .. الله لا يضرك .. اهب عليك .. <-- ـ

وخروا عني !!

اهلين ستاربكس

الا عاجبني وشلون ما يعجبني .. انتي ست الكل هنا

اقتباس:

بعدين موب لازم كل من دخل رد , فيه مواضيع مخيسة مليانه ردود

والله انك انسانه كذا ( فيس رافع اصبعه الدبي ) .. تعرفين وشلون ترجعين نفسياتنا وكذا وتخلينا نحس ان الدنيا حلوة ..

اقتباس:

ماشاء الله مميز في كل مواضيعك وردودك .. الله لا يضرك ..

ياااوتس ياناس احرجتني هالبنت .. خلاص بس كلام حلو وكذا ترا ثمن وشسمه اي انتبهي

اقتباس:

اهب عليك .. <-- ـ

ستاربكس

وخروا عني !!

NABDH

يصير ارد الحين والا تأخرت؟؟==ايقونتن جايبه عذر طبي

ايييييييه الله يذكر زمان اول بالخير...لاقضت اللعبه تشوفوني انا الوحيده اللي واقفه لحالي وخانقتني العبره..ولامره احد تجرّا يختارني عروسه لعن الله ابوهم طيب خذوني مسيار عالاقل





المهم ندخل بالموضوع
فيديو الامريكان لعب بعقلي وخلاني اتهور...تصدقون رحت دخلت اصبعي بفم اخوي ابشوف يعني هل حنا كيوت زيهم والا لا....وابشركم توني جايه من المستشفى بترو اصبعي واعطوني 30 ابره تسمم






لحووول دقيقه امي تناديني
برب