[] صغار قلوبنا بيضاء نعيش بعالم محصور []

عبطه أخت لزقه · 18-06-2008, 02:56 AM

{
نروح المدرسه بدري , ونضحك داخل الطابور ..
نحاول نزعج العالم في روحتنا وجيتناا ..
وعشان نأخر الحصه نخبي علبه الطبشور ..

المدرسه ..

ياحلوها من ذكرياتـ وياحلوها من اياام ..

يومي فيها اقول متى اطلع منها , ويوم طلعت اتمنى الحين ارجع لهاا ..

يوم كنا بالمدرسه في من كان فينا مؤدبـ , ولا هبيل وعبيط ,

وفي دافور , وفي دجه , ومشاغبـ ..

وكل واحد مناا له ذكرياته بـ المدرسه , واشياء يذكرهاا ..

ويحن لهاا ..

وفي الي لا ماصدق يطلع منهاا , ولا حن لهاا <-- هذا اكيد أول جامعه خخخ ..

اليوم موضوعي يحكي عن بعض من مقتطفات من مواقفي بـ المدرسه اللي لا يمكن ان انسااهاا ..

واتمنى انها ترجع , من كثر مانبسطت فيها , واتمنى اعدل اشياء سويتها وندمت عليهاا ..

(( الا ليت الزمن يرجع ورى والا اليالي تدور ويرجع وقتنا الاول ))

حصه فراغ ..

طبعآ حصه فراغ وايام مدرسه كانت من اجمل الحصص اللي تمر علينا بـ اليوم

وكنت اتمنا انها تصير حصه اسااسيه <-- احلفي ..

طبعا بحصه الفراغ , كلن يسولف مع الي جنبه ولا نسوي شله ودويره ونسولف جميعاا ..

والي مسوي دافور ويحل واجبات اليوم <-- مااذكر اني سويتهاا ..

عاد انا وشيوخ وسمسميه , وجوجو وهيونه كنا ورا بعض ..

وكنا نستهبل ونسولف , والا ستاذهـ قدامنا , بعدين هي الله يسلمها وهي تتكلم تتفل ..

فكنا نسميها ام تفال , وخوفآ من احد يكتشف اننا نقصدها صرنا نسميهاا ام مطر ,

علينا مطر خخخ <-- من كثر التفال اللي يجيك خخخخ ..

أي عاد بحصه الفراغ هذي , زاد هبال شيوخ وسمسميه وهيونه وجوجو وانا ..

ووقتها الاستاذهـ طلعت برا , يعني جوآ الفصل ماكان فيه احد ..

طبعا المصاخه اللي فينا زادتـ , وصرنا نفتح ونسكر البااب , ووحدهـ من الظريفاتـ قامت ودزتني خخخ

وانا صرت برآ الفصل <-- بحكم اني رشيقه ومع ريح الهوى اطير خخخ ..

طبعآ الاستاذهـ سمعت الصجه والخبصه اللي صارتـ ..

جتـ وفتحت البااب وقالت:

عبببببببببببطه اطلعي برآ ..

وانا وجهي صار!! _ !! وش برآ وحصه فراغ تسخف دمها هذي ولا وش ..!

فرراغ فراغ وقسم بالله وش تبي هذي ام تفااال , وطبعا الباقي انواع الموتـ والضحك علي انا الضعيفه ..

واستسلم لها , واطلع برآ الفصل , وتختار لي جدار يوسع الصدر <-- جنب الحمامـ خخخخخخخخ ..

وكذا خلصت حصه الفراغ ..

==

غياب ..

طبعا بحكم اني رئيسه الشله , واي شيء يصير لازم اكون ضمن المجموعه ..

يعني أي وحدهـ بتسوي شيء تجي تقول لي عبيطه تعالي معي ..

وانا طبعآ افزع , من هبال من طقااق من كل شيء , ماتعوق معي ..

انا بيوم غبتـ , ويوم غبت البنات <-- الشله كلهم مو بس اللي فوق بحصه الفراغ , لا اكثر ..

استهبلوا ومدري ايش صار , وسووآ ..

المهم صار شيء كبير , واحد بلغ عنهم الادارهـ , وخلص هـ اليوم ..

جى بكرآ وانا مبسوطه , كل البنات والله لك فقدهـ , والله اشتقنا لك

فاتك , وكل وحدهـ تجي تحكي لي , وتتغزل فيني <-- يالبيه

طبعآ فجأهـ وانا جالسه ,

تجي وحدهـ وتقول لي : عبوووطه

انا :هلا

هي : الاداره تبيك ..

انا بسم الله , ماامداني افتح شنطتي حتى , اوكيك اروح يمكن بيعطوني درع كذا ولا كذا <-- ترفقي خخخ

ولا المساعدهـ , مشتاقه لي وبتعبر عن اشواقهاا خخخ

اروح انا للمساعدهـ عبيطه جعلتس العبط والفرم ع كفر , وشسالفه الهبال اللي صار امس انا (( وجه كله براءهـ ))

وش هباااااااااااااااله !! هي لا والله يعني ماسويتي شيء هذا اسمك عندي امس جاني مسويه هبال انتي والشله تبعك ..

انا وقسم بالله حرررررررررام عليكم بنتحر ااناا , انا اصلا امس غااايبه (( وجه مظلووم ))

ولا ادري وش صار امس << أي هين ..

لاحظوآ اني كنت غايبه

وبكذا طلعت براءهـ ..

==

ندمتـ ..

كان يامكانـ في بنت يسمونها معجبه خخخ , طبعآ كانت معجبه فيني خخخخخخخخخخخخخ وقسم ماستهبل

المهم , هي كانت تتميلح عندي من فترهـ وتحاول تتتقرب فيني بـ شكل مو طبيعي , المهم انا بـ اخر المطاف عطيتها وجه , وانبسطت عليهاا , وصار لي اعرفها تقريبا تيرم , المهم بـ اخر التيرم هذا , صار بيني وبينها موقف , كنا نتناقش ع سالفه , ويوم قوى الحماس صارت اشياء واشياء , المهم اخر شيء

اني انا زعلت وعصبت وتركتها <-- ابد ماسكرتـ السماعه بوجي ..

وفي وقت هـ الفترهـ انا عندي اشياء كثيره منها , يعني ذكرياتها واغلبها رسايل ..

وانا الذكريات تعذبني بـ أي شكل كانت ومن أي شخص ..

طبعآ جى يوم وكنت اقراهاا <-- يقال لي حنيت لهاا ..

خطرتـ في بالي فكرهـ خببببببببيثه , الا وهي اني اقطعها حته حته , ويوم قطعتها قلت ورا ماقهرها

واروح اعطيهياهاا , طبعا سويت كل شيء وحطيتها بـ ظرف وكتبت عليها

{خذ بقايا ذكرياتك والاماني والوعود ..

وامح اسمي من حياتك وانسى اني بالوجوود .. }

(( ياقوووووي قلبي وقسم ))

وقتها جاني شيء ماقدرت اروح اوديها لها لحالي , فقلت لصقيقتي ندوووش تعالي معي , وهي في الشر مايحتاج خخخ , خاصه انها ماتحبهاا خخخ

المهم رحنا لها وعطيتها , والحين كل ماذكرتـ الموقف يضضضضضضضضيق صدري اكثر شيء ..

وندمت اني سويت هـ الشيء فيهاا ..

وبكذا انا فعلا ندمتـ ..

==

دفتر التعهد ..

بيوم كان عندنا اختبار , طبعا شهري بس سوينا اننا دوافير واتفقنا احنا والشله نهرب من الحصه

ونجتمع في مكان , وهو عند الكهرب خخخ ,
وندرس مادهـ اللي علينا الاختبار فيها ..

طبعا تجمعنا , وكان في مراقبه اسمها مها سووووووووووسه ..
جنيه وقسم تحس ان صاير فيه شيء بدون محد يقول لهاا ,
المهم اكتشفت مكانا السري ..
وع طوول ودتنا الى المساعدهـ عشان نكتب تعهد ..

احنا مره كثير , والله كثير وقتهاا تقول هذوولي فصل خخخ ,
طبعا يوم رحنا وانا دايم يدفوني صحباتي بـ اول شيء ..
عشان كل شيء يجي في وجهي ,
المهم المساعدهـ ارتاعت من الكم الهائل من الهاربات ..

وهي تهزء وتهزء فتحت دفتر التعهد , عشان نمشي بالدور ونكتب تعهد ..

وهي تفتح كل شوي تحصل اسمي ,
وتقلب وتلقى اسمي وتقلب وتقلب وتقلب
وهي بس تلقى اسمي مع البنات الي كاتبين جنبي ..
قامت قالت لي :ماشاءالله عبطه , صار هذا توقيع حظور لك مو تعهد ..

والبنات ماتوآ ضحك علي ..

وبكذا كتبنا التعهد ..

==

اكرهاا ..

انا والله احسني المظلومه بين الشله , واحسهم هم وسعوآ الصدر وفلوها
وانا لاء <-- ياحياتي وقسم ..

المهم , بـ اول السنه نزلت القوائم <-- ومها مسؤله عنهاا والقوائم
هذي يعني كل بنت تعرف وين فصلها وكذا ..

وطبعا احنا ندور , ونشوف الفصل وانا مع مين وهذي مع مين ,

طبعآ اخر شيء اكتشف انه كل اغلب الشله صاروآ في فصل
وانا كن فيني جرب في فصل لحالي آهـ الله ياخذها مها هذي
وقسم الى الان قاهرتني ..

المهم انا شوي واصيح وش انا لحااااااااالي لاا وقسم مابي , واروح واشوف
من معي اوكي معي شيوخ وهيونه وجوجو وسمسميه ..

بس لاا ابي مع باقي الشله ..

المهم انا طقتني الغلقه , وخلاص مالي دخل ابي اغير فصلي ..

واروح لـ التبنه مها واقول لها , ابي اغير فصلي , مارتحت فيه البنات
اللي فيه ماحبهم مقدر اجلس في فصل وانا مارتحت فيه خخخخ

ابيها ترحمني قالت لي احلفي , ماتبين افتح لك فصل وتنقين البنات
اللي تبينهم <-- اكرهاا ..

المهم قلت كلي تبن بس <-- في قلبي خخخ

واروح للمساعدهـ , واحكي لها معاناتي , وقالت عبطه ماقدر خلاص

القوائم نزلتـ , ومها تقول مقدر اغيرهاا <-- حيوانه ..

رحت لمي واصيح عليها , واقول لها ابي صديقااااااتي
مالي دخل <-- وتقول لي مزدين فيتس ..

واروح لمها مره ثانيه كود قلبها البلكه حن علي , قالت لي عبيطه
لاتحاولين وخاصه انتي لو بنقل احد نقلته اما انتي لااع..

المهم , اكلت تبن وخستـ في هـ الفصل , بس الى الان وانا
حاقدهـ عليهاا

وخاصه اني نقلت التيرم الثاني <-- حكم القوي خخخ ..

ومره كنت ابي صديقاتي , بس المخيسه مها حرمتني منهم ..

وبكذا انا اكره مهاا ..

{ كبرنا وصارت الدنيا تصف احزاانا بالدور

وتهدينا الالم والهم غصب عن عين رغبتنا ..

تعبنا من بلاوينا احد ضيق واحد مقهور

وكلن غارق بهمه وبالاخر تشتتناا ..

*شاركوني ذكرياتكم

وسيم · 18-06-2008, 03:34 AM

والله موضوع رهيب وقلبتي المواجع احسن ايام الدراسه ايام المتوصط واالثانوي
مشكوره علاالموضوع وتقبلي مروري

مش ولا بد · 18-06-2008, 10:54 AM

كود PHP:

يومي فيها اقول متى اطلع منها , ويوم طلعت اتمنى الحين ارجع لهاا ..

من جد :|

يحبيلكم يالبنات لاعجبتو بعض هدايه ورسايل بينكم
حنا ع طول نخطف

انا ماضيعني الا اخوي
كل مارحت اسجل بمدرسه قالهم لكم الحم ولنا العظم << بايعني اهلي

المدرسه ايييييه انا مافي مدرسه برياض مادرسة فيها
كل سنه انقل طبعن هم يرجفوني مع الباب
مع اني هادي ومالي حس
هي احسن مافيها هذيك الفتره ماكنا نشيل هم
كانت مقطعتنا البرائه << ايه هين
اذكر مرا ع طاري دفتر جتهم ايام يخلون دفتر بفصل حقون الملاحظات
وكل سبت يدور المدير ويمحط الداجين
طبعن انا من ظمنهم
المهم جا يوم اربعا ودفتر الملاحظات خذه المدير ويتحرى السبت عشان يمحطنا
انا كنت مفاخت يوم الاربعا وجا السبت وقفني المدير
القسم الاداره صار فاضي مافيه الا انا هذا ع خبري
والعيال يقلونه حاول تزرف دفتر ملاحظاتنا حقون فصلنا
ممداني اقول بسم الله ياهادي واجلس اتسحب لغرفة المدير
الا القهوجي لاقطني ويصرخ يامودير ياوكيل يابو حمممممد يابو عدنان << واضح من اسمه ان لحيته لسره مشاء الله
ويجون يتجمعون علي :| وهو يقول حرامي :|
وانا بنص وكلهم حولي ومدري اسمع مين ولا مين
كلن يهاوش اخر شي قلت خن اسوي نفسي محلوس عبالي ملكع
وقولهم اجلسو اجلسو بقولكم قلة الفار والاسد ( هذا بعد ماتربعت ع الارض )
الا جاني طراااااااااااق خلاني اشوف عصافير دور فوق راسي
وبعدها فصلوني ورحت غلطة العيال
..
ويجلس اخوي يحومبي من مدرسه لمدرسه
اهر شي دخلوني مع عيال اختي المدرسه
ولا كملوها انا واحد منهم بنفس الفصل
وهو وراي بعد
عندنا عريف ملعون خامسه ماقد غاب
كان حلمي يغيب عشان امارس سلطتي << نايب عريف ولاول مره
الله يذكره بالخير رائد فصلنا ياما عانا معنى
المهم ويغيب العريف وهو انا الي اتشقق
واجلس اصبخ بطاوله ولا ابي اسمع نفس
والد اختي عباله اني خاله بيفلها ويسولف
هو هلهرش سبب ازعاج وكلهم يقلون ليه ولد اختك ماتكتب اسمه
المهم انا سجلت اسمه اول واحد وكنت والله كنت ناوي امسحه لاجا الاستاذ
هو شاف اسمه ولا ماشاف قام ومسكني مع علباي وفتح باب الفصل ورجفني برا
وعفط الورقه ورجفمها بوجهي قمت عدلت الثوب ونزلت ادور بساحه
انا ظاع وجهي حسيت اني نائب عريف ع الطل
ورجعت وعادي ولا كن حصل شي بعدها جت حصة E
جا الاستاذ قالو طلعو واجباتكم واجلس احوس بهدرج
واقلب الطاوله يمين يسار ونفضت السجاده
ماش الدفتر موب فيه مامداني بقوله الدفتر ضاع الا جا ودحجني مع ظهري :|
قطع الخلف عندي والتفت ع ولد اختي الا اشوف الاستاذ يقوله مشاء الله انت ممتاز ومدري ائيش وانا طاقتني البوها اناظر ولد اختي عيوني طايره يلعن ابليسك من متى انت تفتح الكتاب
واخر شي الحقير صار صارق دفتري وشاطب اسمي وكاتب اسمه
وصدق من قال الاقارب عقارب

مرا سالفه حقيره هاذي صدق موب ناسيها الله يسامحهم :|
مرا كنت غايب يومين وثابت حقنا كان مفصول
المهم داومت بعدها المدير الا بالقوه موب مصدق اني بيتنا
يقولي لااااااا لا انت منحاش لا تقنعني
قلت له منحاش منحاش الي يرضيك وش اسوي الحين انا قالي وقف هناك
واوقف تحت الشمس بعدين شوي ينقلوني لظل وهمين يرجعوني وثمين ينقلوني
شمس ضل شمس ضل لعبو بمخي
وانا واقف جاني هبوط مدري وشو المهم بيغمن علي وفعلن اغمن علي
وامحط ولما فتحت عيوني لقيت روحي ع الكنب حقون المدير
وازاريري مفتوحه وانا الي القوله خلصت ولا ارجع يغمن علي << وش فيه شطح خخخ
المهم بعد مافتحت ماسلمت منهم :|
قالي انت تاكل حبوب قلت حبوب ايش قال ابيض قريض كبتاجون
:| واجلس احلف له قال لا خلاص الحين بندويك المستشفى نحللك
وتطلع ام العبيد عليه اقوووووووووول والله ماتحرك من هنا لين تحسبونلي ولي امري
اطلع معه انا وش يظمني اذا ركبت مع ابو فهد مايخطفني
وجاني كف ثاني من مدرسه ثانيه
المهم اني ماطلعت الا لين سحبو اخوي وقالو له احنا شاكين فيه انه يتعاطى
وسبها اخوي وداني وحللوني وطلعت سليم وهنا عاد وش يبدا الاستغلال لعباتي هاذي
وقتها كان توه طالع سوني قلت ابي سوني ولا موب ماكل شي قالي بقريح
قلت منب رايح المدرسه قال بتروح ورجلك فوق رقبتك
قلت طيب ابي ترنق للهلال بوت ابو نور قالي ماكد ع عميان
قلت ترى بدخن وقف عند بقاله وسئلني وش نوع دخانك
قلت له بنحرف نزلني بشارع اظاهر انه ناوي
يصدمني لينه دور علي ومسرع لو ماوخرت كان نشبت بصدام
بس ابشركم طلعت برضاوه

مير حنيت لذيك الايام :|

ربي يسعدك

آخر كلام · 18-06-2008, 03:28 PM

اهلين وش هالزين وقسم بغيت ابكي ياعيني على ايام الثنوي والمتوسط والابتدائي

أيام الابتدائي

كنت بنت ابله عاد ذاك الوقت غير بنت الابله بس كانت الحركه محسوبه علي أي شئ اسويه ينقال لامي وامي تقول لابوي فتشوفيني كنت منيب لعابه واجد

كنت 24 ساعه بغرفة المعلمات مع امي >> ناشبت لهن وتطردن امي وانا اقول مافيه معتس
الله وناسه لا كلش بكوم ولاجتني بنت قالت لي انتي بنت ابله فلانه واقول ايه اشخص عليها من قدي بنت ابله تحسين بشعور ثاني وتشخصين على البنات على كيفتس

بس تبين الصراحه يوم رحنا الجامعه وشفت البنات اللي كانوا معي بالابتدائي ماتتخيلين قد ايش
حاقدين علي صدق بينت مواريهم

أيام المتوسط

طلعت حرتي اللي بالابتدائي فله هروب وضحك وتعليق ولا عليتس رادارات الله يذكر أيامتس يا اسومي وقسم فقدتس

أيام الثنوي

على كثر ماكنت كئيبه فيها على كثر ماتمنيتها ماكنت اتمنى اني ارو ح الجامعه بس
الحمدالله على كل حال

نجي لتس
اه اجل تبين حصة فراغ اساسيه وشوله تدرسين أجل عندتس معجبه هاه ياحليتس تعطينهن وجه
اجل دفتر توقيع مو تهعد ههههههههههههههههههههههه الله يصلحتس بس
انا دين امي والا التعهد الحمدالله طلعت وتخرجت بدون تعهد ادري انوه مصيره الزباله بس ماش منيب احبه

عبطه اخت لزقه روعه صراحه ذكرتينا باحلى ايام لاتحرمينا من ابداعك

ستاربكس · 19-06-2008, 02:08 AM

<-- جابت لها دلة قهوهـ وحلى لزوم القعدهـ ..

وش أقوول وش أخلي , الظاهر ايام المدرسة كانت كلها ذكريات .. بس الإبتدائي لو وشو ما ذكرت وش كنت أسوي .. بس الظاهر إني كنت عاقلة ومالي حس ..

أما المتوسط عاد .. طلعت حرة الإبتدائي كلها فيه .. أول متوسط ما خبرت إني قد حضرت حصة كاملة , كل الحصة برا .. واذكر مرهـ في حصة سويت حركة غلط ومالها داعي .. ما يصلح اقولها فيه مراهقين .. المهم وتروح وحدهـ وتبلغ عني الله يهديها .. وتجي وحدهـ من الإدارة وتقول بنات معليه يعني .. وش هـ الحركات إللي تسوونها .. تحسبون انكم في البيت وإلا مسوين فيها كبار يعني .. ويطيح وجهي .. ساد هذا دوا إللي يقبل التحديات ..

ثاني متوسط كان سقيم مافي أكشن مرهـ , مافي إلا يوم يسوون معرض فني في المدرسة ونروح أنا وصديقتي نسرق الشموع حقتهم .. ونكسرها .. مدري وشوله الفساد .. , ويوم نخترع لنا لغة خاصه فينا .. وللحين نستخدمها لو بغينا نقول سر وإلا نحش في أحد ..

ثالث وقت الدجة عاد .. سقف الفصل كان جبس وإلا مدري وشو ذاك إللي ينفتح , كنا نمسك المقالم وننطلها على السقف .. لييييين ما طاح علينا .. وغيروا لنا الفصل .. وصار اردى لنا , كانت فصولنا برا كل ما بغينا هجينا , دخلونا جوا جنب الإدارهـ .. اي حس على طول تجي الإدارية تهاوشنا ..

أحلى سنة وأحلى بنات وأحلى ذكريات كانت في أول ثانوي .. ..
قبل لا يتفرقون البنات وينقسمون شي علمي وشي أدبي ..

كراسينا مخرمه من تحت .. فيها فتحات مدري وش سنعها .. المهم كنت أخذ الأقلام هذيك يوني بول ما غيرها ام خمسة ريال .. والوي الحديدهـ حقتها , تصير كنها أبرهـ , وأقوم أنغز البنات من تحت الكرسي .. وما تشوفون إلا البنات يطامرون وهم ماسكين الصرخه عشان ما يتهزئون خخخخخخخ ..

مير ربي عاقبني ..

مرهـ كان عندنا إنقلش , المهم الأبلة كانت معصبة علينا كـ العادهـ .. وموقفه ثلاث ارباع البنات , وأنا كنت قاعدهـ عشاني مؤدبة معها وتحبني .. بلا محد يشارك ويعطيها وجه إلا أنا ..

وكان عندنا شباك كبر قريح في الفصل , والبنات الواقفين قاعدين يستهبلون على عيال التمهيدي , يطلعون لسانهم ويتمصخرون عليهم من الفراغ .. وأنا منقهرهـ ابي اشوف وش اللي يضحك ذا البنات ووش قصتهم ..

المهم وقفت شوي يعنني بصلح تنورتي .. واقز مع الشباك , وكنت وقتها معلقه الشنطه ورا الكرسي , ويصيح الكرسي ولا دريت عنه .. وأجي بكل حماس وأجلس .. وطبعاً مافيه كرسي فـ طرااااااااااخ على الأرض .. خخخخخخخخخخخ أنا معد قدرت أمسك روحي كعيت ضحك .. ويوم شافوني البنات أضحك , قاموا يضحكون علي .. استوعبوا الموقف .. الأبلة عصبت زيادهـ .. وقومي واطردينا كلنا من الفصل خخخخخخخخخ طيب أنا وش ذنبي ان الكرسي طاح .. دنا بريئة خالص .. بس ماش ما اقتنعت ..

ثاني ثانوي .. هه هه كننا عقلنا شوي , بس صرنا نهبّل بـ المدرسات الجدد .. حصة الكيمياء هذي كنها حصة فراغ عندنا ..

ثالث ثانوي .. اول ترم وهـ ماصلين ما ننبغى , كل وحدهـ خايفتن على روحها ومعدلها وجايبتن جهدها .. ثاني ترم عقب ما جتنا النتايج استلجينا .. , رجعنا زي أول جانا النشاط اشوا .. اذكر كانوا حاطيني في فصل , وصديقتي في فصل .. المهم واروح للمديرهـ اسوي مناحه عندها , حطوني مع خويتي وإلا ترا بترك الدراسة .. أهددهم خخخخخخ واشوا رجعوني معها .. وهـ الله لا يخليني .. و كنا ننحاش من الحصص ونتوزى تحت المسرح نسولف .. ومرهـ سرقنا دفتر الدرجات حقت مدرسة الرياضيات , ونحط صح على المشاركه , ونشيل الأكسات .. وأنواع التزوير .. ومرهـ دخلنا مكتب المساعدهـ ومالقيناها فيه .. ونستغل الفرصة , ونقوم نفتح الدروج ندور على أشياءنا إللي قد أخذوها مننا , أكسسوارات , أشرطة وست لايف .. أفلام , كلش ..
ولقيناهم .. ونقشهم كلهم .. وهـ بس المال الحلال ما يضيع ..

ولسى فيه كلام كثييييييييير .. بس حسيت إني مصختها ..

موضوع روعه فتح الجروح ..

بـرب أدق على صديقتي .. من جد حنيت لـ ذيك الأيام ..

وسيم · 19-06-2008, 05:24 AM

ماشالله عليكم وخاصه ستار مودراسه ذي ذاشغل مافيه ومجرمين العن ام الطهبله الي انتي عايشه فيهاياستار عساك بس عقلتي الحين

عبطه أخت لزقه · 19-06-2008, 07:01 AM

وسيم :

اقتباس

والله موضوع رهيب وقلبتي المواجع

مروورك الارهبـ خيو ..

==

مش ولا بد :

اقتباس

يحبيلكم يالبنات لاعجبتو بعض هدايه ورسايل بينكم

اي لاننا كيوووتااتـ بسم الله ع ألوبنا خخخ ..

اقتباس

حنا ع طول نخطف

وحوووش < - ياااي خخخ ..

اقتباس

انا ماضيعني الا اخوي
كل مارحت اسجل بمدرسه قالهم لكم الحم ولنا العظم

خخخخخخخخخخخخ ..
كنه أمي اجل , والله اني عظامه لين ماطلعتـ من الثنوي ..

اقتباس

الا جاني طراااااااااااق خلاني اشوف عصافير دور فوق راسي

خخخخخخخخخخخخخخخ ..
عصافير الجنه ان شاءالله <- برآ ..

اقتباس

وبعدها فصلوني

والله جد , مالهم داعي ..
ام السخاافهـ , هـ التخلف .. خخخخ ..

اقتباس

اهر شي دخلوني مع عيال اختي المدرسه
ولا كملوها انا واحد منهم بنفس الفصل
وهو وراي بعد

خخخخخخخخخخخخخخخخ , اجل خربتوآ أبو ابوهاا خخخ ..
والله كنتـ اتمنى معي اقاربي , بس امي ماتطططططططططيع ..
تقول مابزيناس لحالس , فـ لو احد معتس .. !

اقتباس

واخر شي الحقير صار صارق دفتري وشاطب اسمي وكاتب اسمه
وصدق من قال الاقارب عقارب

خخخخخخخخخخخخخخخخخخخخخخخخ ..
وقسم خطير ولد اختك هذا , حبيته أووي أووي خخخ ..

اقتباس

مرا سالفه حقيره هاذي صدق موب ناسيها الله يسامحهم :|
مرا كنت غايب يومين وثابت حقنا كان مفصول
المهم داومت بعدها المدير الا بالقوه موب مصدق اني بيتنا
يقولي لااااااا لا انت

[] صغار قلوبنا بيضاء نعيش بعالم محصور []

تكية الملحق