|
|
|
|
التسجيل | إسترجاع كلمة المرور | تفعيل العضوية | طلب كود تفعيل العضوية | إتصل بنا
13-08-2008, 06:38 PM
|
#1 |
 
|
نهاية مغزلجي
السلام عليكم
أسعد الله أوقاتكم بكل طيب   من حيني فاشل في المقدمات عشان كذا نخووش بالزبدة  أول شي حنا اثنين اخوان الكبير أيامها كنت بثالث ثانوي وهو بأولى ثانوي وكنٌا نسمع بالمغازل من يومنا صغار ونبي نجرب ونشوف وشهو هالمغازل  كنت دائما اعرف اقنع أبوي، اقنعه اننا نروح لخالي عشان نذاكر لنا وطبعاً خالي كان وقتها يطق عمره في الثلاثينيات وكان فله من جد وكل ما اقنعت ابوي إني أروح لعند خالي ينشب أخوي الصغير فيني عشان يشوف وش نسوي  وخالي كان عزابي وساكن في شقة لحاله وكان موظف وكل شي اوكيه بس مشكلته شكله كان مقشع ( مقشع = شديد الشهابه ) والحمدلله اني ماطلعت عليه المهم رحنا لخالي ذاك اليوم وكنٌا نروح على أساس يذاكر لنا هناك بحكم ان جو شقته هادئ ومافيه إزعاج، كنا نروح هناك ونجلس نشوف أفلام وثائقيه  ( ايقونه مادونا ايام الشباب  ولا تهون مرام وتصوير ولد جيرانهم ) المهم وحنا جالسين اقترح خالي اننا نطبخ عشاء عزوبية واتفقنا نسوي فول وتميس <= ويخب علينا بعد قلنا لأخوي الصغير يالله هذي 3 ريالات اثنين تميس وواحد فول ( الله يديم الرخص ايامها بريال الفول  ) المهم حرك الموتٌر حقه => السيكل الجبلي الخطير مدري من معلمه على حديقة المكتبة ويروح لها الاطخم ويربط السيكُل مقابلها على ماصورة سنعه وينقز بصرواله وفنيلته العلاقيه للشارع اللي فيه باب الحديقة عاد هناك أنواع التجمعات والمغازل وكانت معروفة ذيك المنطقة بكثر المشاكل والمغازل والهيئه يحلفون مسنترين هناك 24 ساعة حتى ان حقين الحديقة بغوا يكلفون الهيئه انهم يمسكون الحديقه بدالهم من كثر ماهم مسنترين فيها الموهم أخوي نقز بينهم كالغزال الشارد لصيد فريسته ( ايقونه اضحك مع غير البشر ، الله يالدنيا والله مدري وشلون كنٌا نضحك عليهم واعلى افلامهم الداجه  ) نرجع للسالفه ، عاد العالم هناك كلهم مرسمين وزكرت واخونا بالله مرسٌم بسرواله وفنيلته العلاق حتى مالبس هاف شوي إلا والهيئه تطب عليهم  ويتفرقعون الأخوان مثل المدرسة إذا رن جرس الطلعة ، الموهم ويجون الهيئه ويلقطون أخوي من علباه ويركبونه في الجمس .. وانا عند خالي وانتظر انتظر اخوي متى بيجي اخرتها واندس للبيت وانحاش لفراشي واصكها نومه <= قليل خاتمه سحب على أخوه شوي الا التلفون يدق آخر الليل واسمع الشايب يقول : هيئه الأمر بالمعروف ؟ وين مكانكم طيب ! وش مسوي هو ؟؟ .. مالكم بالطويله شوي الا وتجيني رفسه تمشي مليونين اثر الشايب مصحيني من النوم ويقولي امش يالله نروح نجيب اخوك لا بارك الله فيك وفي الساعة اللي جبتكم فيها الله يلعن من رباك .. وانا وقتها كنت جالس احلم بشغاله الجيران طيب كان حدي ذيك الايام  ولا تهون البندري بس لو شفتوا شغاله الجيران عرفتوا السبب ، تقل سوريه مو اندونيسيه يحلفون انها لاجت تطلع الزباله الله يكرمكم ان اللي في الحارة كلهم يتمقلون فيها .. وانا طبعاً يطق فيني عرق الشهامة واروح اطلعها عنها يوووه وش فيكم انتم تطلعونا من محور الحديث  نرجع لسالفتنا ، الموهم ابوي قالي يالله تعال نمشي للهيئه نجيب اخوك قلت طيب يبه بلبس واجيك .. وانا اللي اروح اطق الثوب القصير واللي اكتشفت بعدين انه قميص اخوي يحلفون كان يوصل لركبني وشو ركبته سوداء المهم واطق الشماغ واقدم الطاقيه لحد حواجبي وارجع الشماغ ورا طبعاً بدون عقال .. رحنا للهيئه عاد أول مادخلنا عليهم وانا القى اخوي عند مكتب الشيخ يوم جينا وقبل لا يتكلم الشيخ أو ابوي وانا افتح فمي واصارخ على أخوي .. ماتستحي على وجهك تروح اماكن مشبوهة  وأنا اقولك رح جب لنا دفاتر عشان نحل واجباتنا عليها وتروح تتسكع في أماكن مشبوهة واقعد اتفلت عليه والشيخ وابوي واخوي طيٌروا عيونهم فيني ومستغربين مني .. والشيخ قال لأبوي : انك لا تهدي من أحببت ولكن الله يهدي من يشاء  مصدق يحسب اني ملتزم وان أخوي الداج في اليوم الثـاني اقنعت ابوي لا يجيب لنا اخوي النشبـه عشان مايروح أماكن مشبوهة ويعاقبه ابوي بالسجن 2 شهرين في البيت ( ايقونه واحد انبسط انه افتك من أخوه ) واروح لخالي لحالي وانا تاعب من كٌوي الشمـاغ والثوب حتى اني كويٌت الهاف حقي وخربتها ذاك اليـوم وطقيتها ترويشه ولا يهون عطر امي اللي تعطرت منه .. والله مدري انا تعطرت من عطر ولا من مبيد حشرات من زود الطفاقه خذت لي اقرب شي وتعطرت منه يعني يقالي مرسم اخر شي وفي رواية أخرى مرتزح اهم شي الطاقية الزري وانا اروح لخالي ويوم جيته واقوله : والله يا اعرف لك مكان فيه بنات بالهبل ابيك ترسم بس عشان تخاويني والله ويخربها خالي ويتروش هو الثاني ويتكشخ ونروح على الحديقة وطبعاً مثل ماكنت اتوقع بنات في الحديقة بالهبل والمغازلجية ياكثرهم والله  واترزز واحصل لي وحده ماقصرت قدرت كوييٌ للشماغ وترسيمي تقول هندي ملبسينه شماغ بالغصب وقالت لي يالله بدخلك وحنا كنٌا بالسور وقلت لها طيب معي خالي بعد ابيك تدخلينه (شين وقوي عين ) رمقت خالي برمقة مدري وش تبي وقالت يالله مع انه شين بس بجيب له وحده تدخله .. وانا اللي انقز واروح اخذ التذكـرة واقابلها عند البوابة وقالت اني اخوها ( والله مدري وش جابني لاخوها البنت زي القمر وانا وجهي يالله لك الحمد تقول زفلت جالسين يرممونه ) ما امداني ادخل أخذ نص لفه في الحديقة وتوني بضبط كروت الأرقام ( احمدوا ربكم يالجيل التالي سهلوا لكم المهمة بالبلوتوث ) وانا جالس اتمشى في الحديقة معها وتوني جاي بقش عليها واهايط الا وذاك السيكورتي يدزني من ورا ويقولي تعال فيه ناس يبونك في المكتب عندنا .. قلت لها عن اذنك بس اروح اشوف وش يبون وارجع (ايقونه واحد ذهب ولم يعد  ) ويدخلوني ذيك الغرفة ويسكرون علي الباب مادريت الا وهذا خالي في وجهي وش جابك انت هنا اخبرك برا الحديقة اثاريهم صايدينه وحاجريني انا وياه لحد ماتجي الهيئه جت الهيئه وخذتنا وبنفس وقت امس ونفس اصحاب الهيئه اللي دقوا علينا امس عشان اخوي دقوا على ابوي مره ثانيه عشان يجي ياخذني شوي الا ابوي واخوي جايين (اللعين اخوي جاي يتشمت فيني حاقد علي من امس عشاني تسببت بسجنه في البيت ) ومن دخلة ابوي واخوي عرفني الشيخ وناظر فيني وقال : آهااا انت قدوة اخوك امس .. ويلتفت على ابوي ويقول : لا والله ان اخوه الصغير اهون على الاقل اخوه ماسكينه برا هذا ماسكينه يفرفر مع بنيٌه واخرة السالفة انسجنت في البيت مع اخوي ومنعنا ابوي من الطلعة لخالي بعد ما عرف انه رأس المشكلة واننا نروح ندشر عنده بدل ما نروح نذاكر خلص الجزء الأول |
|
    
|
|
13-08-2008, 06:39 PM
|
#2 |
|
|
رد: نهاية مغزلجي
الموهم بعد حسيت بالطفش وودي اسوي اكشن بحياتي شوي (وين بروسلي عني ذيك الايام بس
) وانا اللي اخطط ذيك الليلة القمراء بإني أنحاش من بيتنا وكان في استقبالي خوي المراهقة ابودايس (يحلفون من اسمه الواحد يدري انه شبهه ) المهم جلسنا ندور لحد آخر الليل وحنا ماندري وين نسكن فيه .. خالي خلاص ماعاد هوب ماخذني يقول مايبي بزران يورطونه كل يوم بمشكلة وكان ابودايس صاحب الابتكارات وانا اعزز له وارفع له وقوة ترييش إلا ان استقرينا وشفنا عمارة 10 أدوار طبعاً قررنا نشوف لنا شقه فيها ومن حسن حظنا طلع السطح حقها مفتوح ورحنا وسكنا فيه وجبنا ذيك العشه اللي تحبها قلوبكم تقول كننا من التشاديين المشردين من افريقيا ، ونضبط العشه (من هالمنطلق بدأت فكرة عشش الحمام والبزرنجيه معها ) وكان اغلب غدانا وعشانا من بنده (وش هالمطانيخ) وافضل شي في موقع سكننا كانت بندة جنبنا وكنا نخش فيها نقعد نفر وندور ونآكل ونشبع واخرتها نطلع بعلك نص ريال عشان نبعد الشبعة ونرجع لهم على طول نرجع العلك نقول شكل صلاحيته منتهيه (ايقونه واحد مايعرف التواريخ حزتها ولا هو في اي عام بس مسوي فاهم بالغصب ) وكانت مشاويرنا حقة اللموزين على الطريقة التالية:-1- نوقف اللموزين ونخليه يودينا لاي مكان ونقول لاتهمك الفلوس ثم اذا ركبنا ومشى فينا يلتفت علي خويي كأننا نتهاوش وبعد ما يمشي فينا مسافة نفاجئة ونقول : صديق كم الخرج ؟ ويرد علينا الخرج انا ما يروح بس روح رياض .. ونرجع نقول : لالا ماتصلح انت خلاص وقف نزلنا بس لا بارك الله فيك من لموزين .. وكذا من لموزين للموزين لحد مانوصل المكان اللي نبيه ( ناخذ 3 ساعات اذا نبي نقطع 2 كيلو) عاد فاضين حنا وما ورانا شي الله يديم الرخص والتوصيلاات المجانية وفي يوم من الأيام تفاجأت بخويي يعزمني يقول تعال نروح لأطلق مطعم لحم (من كان يآكل لحم ذيك الأيام) وانا اقوله يالملعون لايكون سارق فلوس من احد بس انا اعرف البير وغطاه واعرف ان راس مالك الثوب اللي لابسه ومهوب لك بعد المهم ونروح ذاك المطعم وننسدح فيه ونطلب لنا نص تيس لبُاني وببسي عائله من زود الطنخه وسلطات مع ان أننا ماناكل سلطة بس مسكت معي اطلب سلطه من زود اللعانه مهوب كل يوم يعزمني اللهيس الاربد ونطب في الآكل وقوة افتراس وماخصلنا الا 11 الليل وبعد ما خلصت قلت له انعم الله عليك يبو دايس .. رد علي : خلاص اوكي انت رح للشقه (العشه) واذا تأخرت عليك يوم يومين لاتخاف راجع لك راجع لك وانا اللي اطلع واروح اراقب المطعم من بعيد ابي اعرف وش سالفته ذا ومن ويــن جاب الدراهم ؟ واشوفه ياخذ عود الأسنان من الطاولة ويقول للمحاسب الله لا يهينك دق على الشرطة ما عندي فلوس ( أحسن شي فيه مستسلم للأمر الواقع ) حقين يبون يقلبون عليه بس شافوه منتف ورايح فيها رحموه ودقوا على الشرطه => هذا وهم راحمينه وأنا اللي ينقز فيني عرق الشجاعه واقول والله ما اتركك يبودايس  ويجي ذاك العسكري ويسلموني انا وياه له ونركب في الدورية ومن حسن حظ خوينا طلع راعي الدورية يقرب لخويي ابودايس من بعيد  والعسكري يقول كان طلبتوا نص حبه دجاج ؟؟ يالله حبتين كان رحمكم صاحب المطعم وجيت انا وسددت عنكم ومشيت ولا لقينا لها حل .. اما نص تيس واشياء طنخه وقعد يقوله فشلتنا ياولد عمي وقلبوا قبايل مع بعض وقال خويي للعسكري سالفة نص السالفة كالتالي: ( شف ياولد عمي جدي يقول لي انت قبيلتك لها صوتها وصيتٌها عند العرب إذا بغيت تقتل اقتل فلان رجال كبير ويستاهل لا تقتل لك هندي ولا بنغالي توصخ يدينك فيه واذا بغيت تسرق اسرق شي كبير لاتسرق شي صغير مايسوى يعني اذا بتخربها خربها على شي يسوى ) <= والله النصيحة اللي مدري وش تبي صراحه سلملي على جدك يبودايس المهم رحمنا العسكري وسأل من هاللي معك (يقصدني) وقاله ابودايس اني ولد جيرانهم واني رفيقه بالشقه وراح العسكري واقنع المطعم بنص المبلغ ووافقوا قالوا العوض ولا القطيعه وعطاهم ووصلنا لين البيت وقلنا له اقلط في عمارتنا وقال يالله ردينا عليه انا وابودايس وقلنا : ولا شكلك مشغول الحين وعندك شغل طرااخ <- صوت باب السياره يتقفل يعني رحنا وسحبنا عليه لا يدخل ويشوف عشتنا ويودينا للحجز عاد وحنا في الشقة كل ماطلعنا ودخلنا نلقى ناس كل يوم يسلمون علينا ويقولون كيفكم ياجيران شكل مامعكم عفش كثير ماشفناكم تنقلون اشياء كثيره ( مايدرون اننا نشيل اغراضنا ونوديها للعشه آخر الليل عشان محد يدري عننا ) ولزموا علينا الا نتعشى عندهم وحنا ماصدقنا خبر ونروح لهم ونتعشى وميٌر خذنا الدعوى حلى وكل يوم وحنٌا مطيحين عندهم وزل لسان خويي الملعون وقال : ليه ماتجون عندنا ؟ وهم مثلنا ماصدقوا خبر قالوا ابشروا ماطلبتوا شي متى تبونا نجيكم بس .. انا وجهي كذا وكملوا وقالوا : تصدقون للحين حنا ماندري انتم في اي شقة ولا أي دور ؟؟ وكانت زلة لسان خويي السبب في نقلنا من البيت اللي ترعرعنا فيه وتعلمنا الدشرة واضطرينا ننتقل لعشه ثانية وقررنا نروح لخالي ونقنعه نسكن معه .. واستقبلنا خالي بالرحب والسعة (ايه هين يحلفون بالنعال ) وقالي وينك ابوك يدور عليك ومشغل الدنيا يسأل عنك وماترك سوق ولا حديقة او مكان تجمع مغزلجيه الا دورك فيه ورجعني لأبوي واستقبلوني اهلي بالصدور الرحبه وجاني ابوي وضمني وقال لا تبتعد عني ياولدي احبك انا ايه هين قال كذا اشوى انه صكني بمخمس وقالي رح جب خبز كالعادة انا بفهم شي اهلي وين يودون هالخبز اللي كل دقيقة منشبيني وجب لنا خبز طبعاً لا جبت لهم خبز لازم نص الطريق آكل نصه الجمرك حقه وبعض المرات اوصلهم ويكون الخبز خلص وقالي أبوي خلاص لاعاد تغازل ياولدي وصكني بمحاظره عن المغازل وانا بوفر لك كل شي تبيه بس اهم شي فكنا من هالامور .. وفعلاً من هذاك اليوم صار يمشي لي مصروف شهري وسيارة وفله حجاج  بالمقابل اني اترك الغزل والمغازل واعقل واصير رجال واشيل البيت عن أبوي وفعلاً عقلت وصرت رجال ايه هين وش فيكم سبايك كذا تصدقون مجانين انتم مرت الأيام وأنا عاقل وش حليلي مالي من الشر طاري ورزقني ربي ببنت الجيران وكما انهم جيران لنا بالدول لأنهم كانوا كويتيين ومو أي اي كويتيه آآه بس من عقبها وانا احب الكويت وضبطت الملحق حق بيتنا وخليته لي ولأخوياي اللي يجوني فجأه وفي يوم من الايام راحوا اهلي لزواج وجلست انا بالبيت لحالي وهي قالت لأهلها انها بتجي عندنا في البيت تلعب من خواتي وكان يوم عيد ميلادها خليت الملحق يلق من النظافة وانواع الخنبقه حطيتها فيه ( ايقونه محل ابوريالين في قلوبنا والله ياهو يفك ازمات وقت الحفلات ) وحطيت شموع وورد أحمر بدل ما اشرطة الاتاري والسجاير منطله فيه صار ورد بدالها وفي ليلة لا تنسى ( قالها ابونوره : وليلة زي ذي الليلة وهبتك بالأمل عمري وياليت الدنيا خانتني وكل الناس ولا خنتي هواي انتي ولا قلتي فمان الله ) <- خش جو ابوالشباب وفجأه وحنا مشغلين المسجل طبعاً كان مسجل صغير حق اليد اللي يجيب قناة لندن بس وقتها اي شي يمشي الحال وانا مضبط لها التورته طبعاً كانت عباره عن كيكة لاقيها بثلاجتنا من اسبوع مدري وش وضعها طبعاً اكتشفت بعدين ان ابوي مودي اهلي لزواج حريم بس مادريت الا وهو يفتح علينا الباب ماعمره خش علي بالملحق بس يوم سمع صوت المسجل دخل علينا يقاله بيجي ينصحنا على صوت المسجل مادرنا انه بيحصل العن من المسجل المهم دخل وياخذ السلك حق الاتاري وانا اقول وش بتسوي يبه لايكون بتشنق نفسك ومير اتلفت ادور البنيه ماحصلتها اثرها انحاشت  وانا وافق في الغرفه وبيديني الكيكه والشموع والمسجل صوته عالي وابوي عند باب الملحق وبيده سلك الاتاري وجالس يناظرني والشر يتطاير من عييناته  طبعاً باقي الكلام مشفر صارت اشياء ما تنقال وراحت السيارة وراح الملحق ورجعت لغرفتي اللي فوق (السجن) وراحت سياره خويي ابو دايس ورجعت معاناة الطفرة السابقة وانتهت فترة الطفولهبس هذا كان ماضي قديم وطبعاً كبرنا الحين انا وابودايس وعقلنا واهتدينا ورجعنا لطريق الصواب برضوا ايه هين مايستفاد من الحكاية اللطيفه : 1- مهمُا كانٍَ ماضينٌا شُين يًبقى يفٌٍٍرحًنا اذا كبًُرنا وحٌٍتى لو كاُن مَؤلٍم يبقَى جميُل لما نتذًكرهٍ <- المنتدى الأدبي من هناك يالاخو .2- لاتتعرفون على واحد اسمه ابودايس تراه يدشركم .3- الاماكن المشبوهة لاتغازلون فيها اللي في راسه غزل يمدحون البالتوك والنت بشكل عام عشان مافيه هيئه .4- هذي للشباب مخصصه : إذا قالكم أحد تعال نشوف عشة الحمام لاتروح <- وشو عشاه اللي انكب .وبس اتمنى يجوز لكم الموضوع ولا ترى بجيب لكم ابودايس |
|
|
|
|
14-08-2008, 03:58 AM
|
#3 |
 
|
رد: نهاية مغزلجي
 نـــآآآآهـ  بو جروح ,, ياروح الروح,, قلبي فيك مفضووح  >> برا  >>تحسبه غزل الشات لـــي بـــاكـ .. >> منت عاقل يوم تقول والله انك منت مغازلنجي .. احجز لي مكان مربع مثلث متوازي أضلاع في ذا  ..موضوعك وشسمه ,, يبي له فصفصة ونــ ع ــنعه وحـ ب ــقـنة |
|
|
|
|
14-08-2008, 04:14 AM
|
#4 |
 
|
رد: نهاية مغزلجي
يوووهـ يبيله قعده ودايخه عقب المسبح
لي بـآآكـ يا أووط   |
|
|
|
|
14-08-2008, 10:12 AM
|
#5 |
|
رد: نهاية مغزلجي
هههههههههههههه ||||||||| تســجيـل حضــور ولي عـوده ||||||||||||||||||| الله يوسع صدرك بالعافيه |
|
|
|
|
14-08-2008, 02:28 PM
|
#6 |
|
رد: نهاية مغزلجي
وعليكم السلام
هلا والله في صمتي جروح موضوع روعه وخقق <<< اهم شئ فيه غزل  بالله فيه احد يفرط في لحظه رومنسيه مع بنت بنت الجيران كويتيه بعد  كان قفلت الملحق ولا شفتلك دبره ياخي <<< متحمس مع الموضوع  مشكور اخوي في صمتي جروح على الموضوع الي يشرح النفس <<< اكيد مدام السالفه فيها بنات بيشرح النفس <<تفكير سعودي لاتحرمنا من مشاركات الرايقه  مره ثانيه مشكور اخوي على الموضوع الرايق |
|
|
|
|
15-08-2008, 12:54 PM
|
#7 | ||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
|
رد: نهاية مغزلجي
 Dحى الله في صمتي جروح
بس يا كانت تسريب الكتب و الروايات تسبب لنا قلق 
بس والله انا معاك بدال ما يخسرون بدل رواتب هالموظفين يسلمون الهيئة هذي المهمه منها نطمئن على شبابنا انهم تحت ايادي أمينه ومنها نحافظ على أقتصاد الدولة
أن شاء الله لو يلبس خط البلدة انت وش فيك عليه <<خاقة على واحد شكلة هندي لابس فانيله علاق وووزار وطالع وش ملحوه الزبدة أهم شي الجوهر مو الشكل الخارجي
 اتوقع انها طقاقة مشهور في وقتكم
<<أقول طسي يقالك كارشتك
ما لحقت الى امي بعد اسبوع هي الثانية مشرفة لمدرستنا العزيزة اسمع تراني ممسوكة عشان كثر نحشاتي في حصة الجغرافيا اوب شين أوخر لا سمح الله
حبيته لأني أحسة رجل شهم وشجاع وكريم ما قلت لي وش صار عليه الحين مرتبط ولا لساته سنقل
أنا في حياتي ما قد شفت ابجح منك الحين ابوك مهاوشك على المغازل برا تقوم تجيبها في البيت لا والسهره الي تفتح النفس أجل مسجل اليد وورود
أجل أتاري
واذا على الدراهم ما يقصرون أشقائنا العرب
بس حلو لقيت شي ابتزك فيه اذا ما فهمت كلامي بعلمه عليك << تستعمل رذالتها مع كل العالم  موضوع بطل يا بطل عافاك خيو  |
||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
|
|
| ||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
