سلمى

إمام الحُجه

لا تشرب التتن يا المملوح يخـرب ثنايـاك يـا iiالغـالـي
مـا فيـه نفـع ولا مصـلـوح نقص في الاعمال والمال
اسمر وكل اسمر مملـوج كـلــه عـلـشـان رجـالــي

<--- يسمع بإضافة المشاركه

ام غمازات

وعليكم السلام ورحمة الله وبركاته..

الحين اذا شفت واحد واقف بسيارته قدام محل ولا مطعم وقاعد يدخن ودي اساله

بس ماتستحي وانت ماسكها كذا وتنفخ قدام الرايح والجاي بتدخن بكيفك بس موب

قدام الناس اما اللي يدخن قدام عياله وش يحس فيه هذا ؟؟ يعني تعلموا مني

ياعيالي !! الله يعافيه ولا يبتلينا

حنا عايلتنا اللي اعرفه ومتاكده منه ان الابهات (( يعني الابو )) مايدخنون ابد

الحمدلله لكن الشباب فيه منهم اللي يدخن بس موب قدامنا وقدام اهلهم محترمين

وجودنا

اقتباس:

وفية بعض البنات هي تبي واحد يدخن , وتقول احب ريحة الدخان مع العطر

الله يحوم تسبده يعني عاجبه وهو يكحكح وحالته حاله شوفي انا اموووت

على ريحة الدخان بس لايمكن اخذ واحد يدخن لاني صراحه ماتعودت

اشوف الزقاره بيد ابوي او احد من اهلي عشان كذا احس ان هالشي مستحيل

اتقبله لو ايش مايكون

اقتباس:

اذا نجحت بنته جاب لها هدية شيشة فوشية

الله يرجتس ذكرتيني لارحت لجده اشوف كل وحده مزينه

الشيشه حقته بالوان ودناديش وخرابيط مدري وشي مدلعين شيشهم

الا شسمه ماتشمين روايح دخان بالجامعه ؟؟

*لكل واحد يدخن وقرا كلامي:

ودي انك تفكر شوي وش بتستفيد من الدخان ؟؟

بيدمر صحتك وماراح يجيك من وراه الا الامراض الله يستر، رح اقرا عن الناس

اللي قاعدين يموتون باليوم مليون مره من الامراض بسبة هالدخان!! تخيل نفسك

مكانهم ؟؟ رح شف المقطع اللي ببرنامج 99 الرجال اللي جاه سرطان الحنجره !!

وش نفعك الدخان فيه ؟؟ شف صحتك وش صارت !! شف مزاجك شلون ؟؟

لاتقول ماقدر اتركه وصعب ، انا معك انه صعب وتعودت عليه لكن فيه مراكز راح

تساعدك واذا انت حاط هالشي ببالك بتقدر لحالك من دون ماتروح لهالمراكز بس

مايمنع ان الواحد يطلب المساعده.. اقرا الايه { ولا تلقوا بأيديكم الى التهلكه }

وتذكر ان ربي راح يسالك يوم القيامه..

ان شاء الله ربي يهديك وتتركه

جحه اسفه ادري اني طولت لكن الموضوع مادري وش اقول عنه صراحه

الله لايحرمنا منتس ومن مواضيعتس

unique

وعليكم السلام والرحمه

يختي انا ما ادري وش يبون صراحه اللي يدخنون
والله احس انه يضيق صدري بقوه .. احسهم ما يخافون من اي شي لانه بلى من كل ناحيه دنيويه ووبالاخره

شوفوا مضاره ان كنتوا ما تدرون

بالله هذا كله ما يهز فيكم شي ؟! واللي قاهرني ان اغلبهم يعرفون يعني نادر تلقى احد ما يدري وش مضاره !!
ومع ذا مواصلين يعني وش ينتظرون يصيرلهم عشان يتركونه !
اذا انت ما تخاف على نفسك خاف من ربك ياخي ترى التدخين يعتبر انتحار اذا ما تدرون !
واللي يغبن اكثر إذا كان ابو ويدخن .. أنت قدوه ! وش تنتظر من عيالك يسوون إذا انت كذا شلون بتنصحهم وانت على هالحال ؟!
وغير كذا انت مسؤول عنهم يعني مب على كيفك تدخن وتلعب بنفسك وعيالك ياكلونها ..
تحس انك تعيش اللي معك بقلق قسم بالله إذا سمعت مدخن يكح تحسه بيموت من قوتها واشيا كثيره بعد تقهر بس خاني التعبير م30
صدق احس اللي يدخن انسان لا مبالي وقليل ايمان شوي
عمومن الله يصلح حالهم ويشفيهم ويكره هالاشيا بقلوبهم


جحه يعطيك العافيه

غرام

سلمى جبتيها ع الجرح
بما اني احاول اتخلص من هالعاده

* وش شعورك وانت تدخن ودي ادري ؟ يعني تحس انك قوي ولا وشو؟
شعور روقآآن فظيع .. موب احساس بالقوه كثر مهوب احساس بالرآحه
. . .

* وانت تدخن ولا تشيش ما تخاف يجيك مرض من الأمراض الي يسببها التدخين / وفكرت تتركه ؟

ماوصلت لمرحله الآدمان .. اللي يسبب الآمراض ..
. . .
* صدق فية شيشة بحشيش ولا مدري وش اسمها ذيك يقولون اقوى من الشيشة

ايه فيه .. يقولك يحطون الحشيش في راس الشيشه مع الجراك والعياذ بالله
. . .
* ومتى تحس انك محتاج سيقارة ؟/ وفية بنت جربت لو تجربة التدخين ؟

وقت الفضاوه و وقت المذاكره والجلسه ع النت و ( وقت المباريات اذا كنت اتابع لحالي )
. . .

* واول مرة دخنتو بعمر كم ؟

قبل 5 سنين .. باولى ثانوي
.
.
.

سلمى اعتذر ع الاضافه والصراحه .. بس موضوع مثل كذا ماله داعي الواحد يكذب ويدعي المثاليه ..
ودعواتك وارجع اعتذر للمره الثانيه

ابوكوشاك

7m.

أووووه

” معظم الأشخاص هم أشخاص آخرون, أفكارهم هي آراء آخرين, حياتهم تقليد, حتى مشاعرهم لا تتجاوز كونها اقتباسات ”

عشان كذا التدخين مرض نفسي وغالبا يكون تقليد
أو محاولة إثبات رجولة
أو محاولة تميز بطريقة غير سليمة

كل مدخن هو مريض نفسي
ويسلمو على الموضوع الجميل

اللاذع

سلمى
موضوع مهم للغايه وظاهره بدأت بالانتشار بين الشباب والبنات ولا احد يلقي لها بال من الاهل واذا القو لها بال فـ الاسلوب الوحيد لمعالجة القضيه هو الضرب والطرد وليس التحدث مع الابن او حتى البنت المدخنه
لو الابو جا لولده وقال له ياوليدي التتن اوله دلع واخره ولع وشف فلان مات من الدخان وشف فلنتان وشلون ضروسه وشف فلان وشلون حالته كان اقتنع الولد وخاصه لما يكون عظمه طري وتوه يتلقى المعلومه ويقتنع فيها
ودي اطول بالخرابيط واللي يصلح اقروه واللي مايصلح خلوه يروح بفاله
هذا وانا اخوتس ملك الشعر والشعراء الشاعر الكبير سليمان بن شريم الله يرحمه كان بالكويت يتصكع بالشوارع لا شغل ولا مشغله ومن ديوانيه لديوانيه ومن بيت لبيت ومن ملعبه لملعبه سواليف وشعر وعلومن غانمه ومره من المرات مر واحد من اصدقاه بعد صلاة العشاء هالواحد كان يشتغل ويقوم من فجر الله ويوم جا له بن شريم حياه ورحب فيه وقلطه عنده وسوى له الشاهي يوم جهز الشاهي وهو يطلع الشاعر سليمان بن شريم القوطي ويبدى يلف الزقاره يعني انه يبي يجلس ويسولف ويتتن قال خويه وكان شاعر :
ياسليمان النجوم ادبحت يم المغيب
.. .. والزقاره في يدك تو ماشبيتها
قال ملك الشعر بن شريم :
الزقاره ياولد تبري الجرح العطيب
.. .. .. لو تذوق احكامها كان ماخليتها
قال خويه :
ماشربته بالشباب اشربه وقت المشيب
.. .. الله انه ياخذ الروح مامزيتها
فقام بن شريم وشال بشته وقال والله ماعاد لي جلسه لازم امدح التتن وانا مانيب مادحه وقام من عنده
بن شريم كان مغرور ولا يقتنع بأحد ومع ذلك اعترف ان التتن مضر بالصحه ولا هوب ينمدح ابد ولا يجي منه الا المرض والبلا والشر
انا كان لي تجربه بالتدخين بس تجربة ادمان وشغل الثلاث بكتات باليوم اشي ملبورو احمر واشي ابيض واشي روثمان ايام زمان ومابقى نوع من التتن ماشربته حتى السيقار الامريكي والمعسل والجراك وكل شي .. صدقيني ياسلمى والكلام للجميع كنت لما ابي انام اكح ويتسكر نفسي من البلغم واتعب ويمكن ما انام الا انا ماسكتني العبره من التعب اللي الاقيه ومن وجع الصدر حتى سنوني احسها بدت تتنافض من شد ماجاها من النيكوتين ولكن بالنهايه احاول اتخلص منه ولازلت الى الان شفايف سود وصدر تعبان وكحه واللي يشوفني يقول مدمن تتن وانا ياغافل لك الله بس هذا عمل يديني واستاهل وعسى الله يفكني انا وكل مسلم منه
نجي لأسئلتك
* وش شعورك وانت تدخن ودي ادري ؟ يعني تحس انك قوي ولا وشو؟ < واضح اني على وشك
شعوري ايام الطفره والدلع شعور اي عربجي جالس مع اخوياه ويتتنون بعمق بعد بيالة الشاهي او كبسة الرز او حتى بعد خبزه وجبن بس يتتن لأنه عربجي ولكن بعد ماتمكن مني وحسيت بالتعب صار شعوري شعور اي اسير مسجون يتلونه بالسلاسل لعقابه الاليم يعني مع كل مزه للزقاره احس صدري وقلبي ينتل معها والكحه لا بد منه بعد كل مزه
* وانت تدخن ولا تشيش ما تخاف يجيك مرض من الأمراض الي يسببها التدخين / وفكرت تتركه ؟
ماهوب اخاف وبس الا اغلب اصدقاي الفتره الاخيره اهل دين ومشايخ وكنت بعض المرات اضطر واشبها عندهم بألحاح منهم وعطفهم علي على شان يزين مزاجي ولا اتنرفز وكانو يموتون المدخنين قدام عيني واحد واحد وانا قلبي ينزف حزن واسى وخوف واولهم ولد عمتي الله يرحمه
* صدق فية شيشة بحشيش ولا مدري وش اسمها ذيك يقولون اقوى من الشيشة
الله واعلم علمي به بالافلام المصريه بس غير تسذا مدري وبعدين الحشيش بكبره احسه يحوم التسبد الحمدللي حارمني منه والله يزيدني فيه جهل
* ومتى تحس انك محتاج سيقارة ؟
اذا ضاق صدرك \ استانست ! \ اكلت \ شربت \ ركضت \ قمت من النوم \ تحتاج لها في كل وقت لأنك اسيرها

الف شكر وكل بساتين الورد الجوري لقلبتس خيتو سلمى

سلمى

A S 6 O R H

وعليكم السلام ورحمة الله وبركاته
شلونتس انتي يا خاله .. وبعدين ما اللومتس ع هـ الجو اللي انتي فيه زين انها وقفت ع الزقاره .. الله يستر لا تدقين علي وتقولين سطير افتح باب الاستراحه وخل العامل يصلح لي راس تفاحتين .. سلمى احس ان حيلي مهدود بقوة .. وشسمه ما نمت زين ( مصيول اقنور يا ابن الـ منيب قايل ) وراجع من سفر " متعة " واقصد المتعة انه وشسمه سفره ع الطاير جت بدون ترتيب لها رحت و جيت .. مهوب احدن يشطح باله بعيد ( وشو جسره ) يعني خلاصت كلامي اني للحين ما خشيت بـ الموضوع وبرد وانا ماا راح اعطي الموضوع حجمه


شعور اللي يدخن يا طويلة العمر وانا اتكلم عن اللي خلاص تمكن منه الدخان مهوب اللي توه طايح فيه .. شعورهـ ان الدم عنده يطلب مادة النيكوتين وجسمه يحتاج لـ الدخان وتشوفينه متنرفز ومزاجه متقلب وعصبي شوي <-- اما شوي .
يعني احتمال لو تأخر ولا دخن وانا اتكلم عن تأخر يعني بـ الساعات الكثيرة او بـ اليوم او اليومين .. تشوفين حالته صعبه ويمكن يدينه تنتفض ع خفيف وفيها رجفه تبي الدخان .. يعني بـ الحاله هذي ارميه عليه بكت الدخان .. وانتي عاد شوفي وقتها وش راح يكون شعوره ؟! شعورة زي اي مواطن سعودي وصله خبر ان بعد الدقيقة لخامسه مكالماتك ببلاش ( ايقونتن مع التحية لـ الحضرمي يوسف ) اكيد شعوره بـ الراحه وهو يمز الزقاارة والروقان والبال يهدى شوي لـ ان قد سوو دراسه ان اللي يدخن اول ما يمز الزقاره يحتاج لـ وقت بسيط مره واحتمال انه بـ الثواني وع طول يوصل النيكوتين لجسمه .


اكيد اي واحد يدخن يعرف اضرار الشي هذا واكيد انه يبي يترك الشي هذا لكن المسئلة دخلت بـ الادمان والحاجه النفسيه والجسديه يطلب منك التدخين ولا محد يبي يدخن صدقيني مع هـ الااضرار .. لكن اوله دلع وآخره ولع ع قولت ابو ناصر ( اللاذع ) يعني ااول الامر تلقين اللي يدخن يقول ما يضر زقارة بـ طلعه .. ما يضر زقارة وانا مع العيال .. اي عادي ما راح اكنها عشان ما تدخل جوات جسمي .. وشوي شوي .. تشوفين الولد متمرس بـ التدخين وتشوفين الكنه عنده مهيب تعووق مع العلم ان اللي اول مره يدخن تلقينه يبي يتعلم شلون يدخن الدخان لصدره بمحاولات كثيره ويقعد يكحكح ويكن شوي والباقي كله يطلع .. بس الوقت كفيل انه يخليك متمرس .


بعدين شيشة اقوى بـ الحشيش حسيتك يا مهبولة تجلسين مع صعايدة كثيره .. هذا يسمونه ملغم وانا اخوتس .. يعني يجيب الشيشة اللي هي القزازة والماصورة حقتها واللي معاها والراس حق المعسل .. ويحط معسل النوع اللي هو يبي بس دام الدعوه تلغيم .. فـ اكيد يبي ياخذ شي جامد .. تفاحتين او باشا او زغلول وادعس يا بطل .. يحط شوي معسل وشوي حشيش معاها .. ويشيش عادي زي اي واحد يشيش ويصير جوه بطل .. ويصير محشش زي اللي بـ النكت .. وفيه شي اسمه " بنقو " هذا بمصر زي اللوز تلقينه .. اضرب بنقو .. اديلو حجر بنقو .. يعني الصعايده روسهم جامده ولا يسطلهم الا الفول و الشاهي الاسود ع الصبح ويصير افدغ .. وآخر الليل يجي دور البنقو .


متى تحس انك محتاج سيقارة اجل .. تحس انك تبيها بكل وقت .. وفيه اوقات تنجين تدورينها دواره .. زي مثلا ع هـ الجو وشبت الضو قدامك وبريق شاهي خادر وحلاه زياده .. والبيالة جمبتس وتقولين للي عنده الشاهي صب لي .. وقتها لا شعورين يدتس تدخل في جيبك وتطلعين الدخان .. وفيه وقت برضو بطران اقولتس متى عشان تسوينها <-- انت جايين تخرب العالم .
تخيلي انتس طالعتن لـ مزرعه او استراحه وعليتس لبس صيفي والجو هه فيه نسمة هواء بارده شوي .. واهم شي بعد العشاء اللي تقولين وهـ يا ذيك الكبسة ماا بعدها شي .. تلقينها مندي من شغلكم انتم وتعبتي وانتي مشغلتن السمر ومسقطتن الذبيحه بـ البرميل وبعدها الرز وبعد ما تخلصين من هـ الشغل كله وتتعشين .. تقومين تغسلين اكيد .. وبعدها روحي لم مكان مفتوح يعني مثل الدكه وحطي رجل فوق الصبه ومعتس بيالة شاهي يحبها قلبتس وتطلعي الزقيرة ويعيشي جوتس <-- ملاحظين ان الشاهي بكل مكان .
بس اذا بغيتي الجد الدخان اللي مدمن عليه يبيه بكل وقت .. بعد ما يقوم من النوم ويفرش اسنانه .. ويركب موتره يروح للدوام تلقينه يطق الزقااره .. اقرب وقت يطلع فيه من دوامه يروح ياخذ له زقارة ويرجع .. اذا متضايق .. اذا انبسط وانهبل .. اذا اكتئب .. اذا طقته الغلقة تلقينه يدخن بشراهه .. يعني ما ازود ع ابو ناصر بشي بكل وقت يحتاجها <-- اجل يومنك ما تزود وشوله تبربر عليهم .
سلمى .. انصحتس بـ الشيشة تراهاا تسوى الدخان وسنينه


* الدخان او الشيشة كلهم مضرات .. بس الشيشة تقدر تقول انك تقدر تغيب عنها يوم يومين تصبر نفسك .. اوكي اانت تبيها بس تقدر تستغني عنها شوي شوي اللين ما تتركها يعني الشيشة مو ادمان مثل الدخان .. ممكن راس الشيشة بـ الدراسات اثبتت انه عن بكت دخان او بكتين .. بس ارجع واقول الشيشة مو ادمانها مثل الدخان .. وكل الثنتين ماا فيهم خير .


موضوعك مثبت ., ومعليش ما عطيت الموضوع حقه من النقاش يا مرتادين الاسرة ااعذروني دايم اشطح .. وعلى طاري هـ الموضوع .. برب بروح اشيش <-- .

أبــ Jo$eph ــو

--> تاكيين في ابو هيثم متابعين ميلان و برشا ، وقدامه 6 ارقيلات تفاحتين فاخر ،

الدخان ما اعرفه الحمد لله ، بس المعسل عشقي الابدي ، لو يحصل لي اعرس على أرقيله ما قلت لا ، واكره ما لي اني اشم ريحة الدخان ، او احد يدخن عندي وانا اعسل ، يضرب جوي ! مثل ما تكره واحد له اسبوعين ما تروش وحاط عطر حاااار ، كل شوي تهب عليك نسمه غير شكل ،

الفراغ ، والاشخاص اللي حوله هم اللي يفرضون عليه هذا الشي ، لا تقولون الواحد لازم يكون له شخصيته ! خذو مثال من الواقع : اجتمعتو انت والشباب تبي تتابعون مباراة مثلاً ، صعب انكم تجتمعون في بيت واحدٍ منكم ، شاهي وعشا وما الى ذلك ، واهلك موب فاضين لك انت وربعك بيكون عندهم التزامات اهم ، اكيد تبي تروحون لأحد هـ المقاهي ، واللي معك يا يدخنون والا يشيشون والا يعسلون ، تبي تجلس انت مصفط يديك ! غصب عنك تبي تجاريهم وتبي تدخن والا تطلب لك راس ، ومثل ما قال ابو ناصر: اوله دلع واخره ولع ، بحكم اني لست مدخن ، وانما اعسل ، بـ ارد على الموضوع من هذي الناحيه :

اقتباس:

* وش شعورك وانت تعسل ودي ادري ؟ يعني تحس انك قوي ولا وشو؟ < واضح اني على وشك

قد جربتي تغرقين ؟ مثل شعور الغرقان اذا تنفس ! اذا صرت لي مثلا يوم ما عسلت و جيت لها بعد وجبه دسمه ، تبدا اطرافي تخدر ، ولا ودي احد يكلمني لين يرجع لي وعيي ، وبعض الاحيان يجي لي مزاج ما ابي احد عندي ، بس صدقيني ! ما تحلى الا اذا صارت جلسه سوالف ، يروح الوقت وانت ما تدرين ،

اقتباس:

* وانت تدخن ولا تشيش ما تخاف يجيك مرض من الأمراض الي يسببها التدخين / وفكرت تتركه ؟

الحين كل شي يخوف ! حتى المويه اللي اشربها اخاف منها ! يعني الخوف وارد في كل الحالات .. الحين كل الناس مطلعه على اخطار التدخين والمعسل والشيشه ، بس لا حياة لمن تنادي ، هذا شي يمشي في عروقهم ، الا ذوي العزيمه القويه ، اعرف واحد يددخن له عشرين سنه ! وقطعه في يومه ، ولا طب فمه بعدها ابد ، وانا عن نفسي حاولت مره وحده ، وتركتها لمدة شهرين او حولها ، و رجعني لها الشيطان ، والى الان ما فكرت اتركها مره ثانيه ، الله يحفظنا من كل شر.. الدخان موب مثل المعسل والشيشه ، صح الثنتين الاخيرات اقوى ، بس ريحتهم موب عفنه مثل الدخان ، ولا تسبب لك صداع وعصبيه لو تبطي عنها ، لأن الدخان فيه مادة الـ تار tar( القطران ) اللي موجوده في الاسفلت اللي نمشي عليه و يفقدها المعسل والشيشه ، وهي اللي يسبب فقدها الصداع ، بس كمية النيكوتين فيهن اضعاف اضعاف اللي في الدخان ، عشان كذا أكتفي براس او راسين في اليوم ، على عكس المدخنين اللي ما يكفيهم بكت في اليوم ! ( ما تلاحظون اني اتكلم عن محاسنها اكثر من مساوئها خخخ) ،

اقتباس:

* صدق فية شيشة بحشيش ولا مدري وش اسمها ذيك يقولون اقوى من الشيشة

اسألي الاسطوره ويوسف ، لهم باع طويل في هذا المجال ، بحكم خبرتهم واطلاعهم على مختلف الثقافات خارج الحدود --> يبعد الشبهه عن نفسه خخخخ ،

اقتباس:

* ومتى تحس انك محتاج للمعسل ؟/ وفية بنت جربت لو تجربة التدخين ؟

كل شي في وقته حلو ، المعسل ما يبي له واحد جوعان ! لو تآخذه على جوع بتتعب تبي تحس كنك تولّد ، انا واحد احب انظم وقتي ، شي للنوم وشي للدراسه وشي لصلة الرحم وشي للدشره خخخ ، حاليا استعملها بعد الجامعه يعني وقت الظهر بعد الغدا يلزمني راس ، وبعد العشا ، اما الخميس والجمعه أزيد عليها على حسب الفراغ والمتطلبات من طلعات وكذا ، بس زياده على الثلاثه احاول اني اتجنبه بكل ما اوتيت من قوه ، وبعض الاحيان يمر يوم ما اخذها !

اقتباس:

* واول مرة دخنتو بعمر كم ؟

كنت في اولى ثانوي ، يعني تقريبا ً قبل 6 سنوات ، اخوي بطّل يعسل وخلى الارقيله عنده ( شكله كان ناوي يرجع لها بس راحت عليه ، وانا اخذتها ) ، يعني شغلة توارث من جيل الى جيل ، وكان الجو مهيأ من ملحق و مشب للجمر وخصوصيه بحيث انك تضمن ما احد يطب عليك في ذاك الوقت ويصيدك بالجرم المشهود خخخ ، واذا دخلت البيت يشمون ريحتها فيني بس امشيها على انها عطر ! مع انهم عرفو اني شسمه بس ما بيدهم حيله !


1) المعسل يختلف عن الشيشه ، بعض الناس يطلقون مصطلح الشيشه على المعسل ، ويطلقون الجراك على الشيشه ، و لكل وحده منها عملائها وطعمها ،


2) لا احد يفكر انه يجرب يدخن ويعسل ! لأن مركز التذوق في مخه يبي يضرب فيوزه ولا لها وكيل معتمد و متوفر لحد الان ..

3) المعسل هو نفسه التمباك اللي يستعملونه الهنود ، بس انه يصدر الى مصر والبحرين والدول الشاطره والأموره هذي ، ومن هناك تضاف له النكهات و المحسنات بحيث انها تناسب المستهلك العربي ،



سلمى بارك فيك الرب على هذا الموضوع اللي اتمنى يساعد المصابين على انهم يصحون من غفلتهم ، و يزيد مسافة السالمين منها ، بعدين انت ينخاف منك اذا تقلب مزاجك ! اجل زقاره ! ، بس الحمد لله شي اهون من شي ! زين ما قلتي بجرب اطير مثل سوبرمان ،

راجع اذا دعت الحاجه ..

V

بسـم اللـه

أولا أحب اشكـرك على طرحك المتميّـز وانا من متابعيـنك يا سلمـى

.
.

الدُخـان دائـما ما يكـون وسيـله لغـرض مـا !
إمـا لإثبـات شـي , أو عقـاب للذات أو في أحيـان كثيـره فضـول !
الحمـد لله مالي تجربـه سابقـه لكـن اخوي إلي يصغـرني اكتشـفـت إنه مدخّـن
طبـعـا لمّـا اكتشفـت هالشـي حسّـيـت بخيـبـة أمـل !!
لأنـي انا إلي مربيـه .. يعنـي ابـوي موكّـل مهمّـة تربيـتـه وتعليـمه
لمّـا علـمت بالخـبـر فكّـرت إني أهـرب وأعطـي خبـر للوالـد وبكـذا انهي دوري
لكـن حبّـيت إني أكمّـل ما بديـتـه !
طبعـا الوالـد مدخّـن سابـق .. وأخوي إلي يكبـرني مدخـن أيـضا
مسكـت اخـوي يـوم ووريـته عمليّـة قلـب مفتـوح .. وقعـدت اشرح له العمليّـه
وكيـف تقـص الأضـلاع إلى آخـره .. ومـا علمّـتـه إنـي أدري إنّـه مدخّـن
طبعـا خـاف وقتـهـا .. لكن خوفـه كان لدقائـق ولمّـا يطلـع مع زمـلاه
ينسـى ويتنـاول الزقاره من زميـله !
الصاحب الصاحب .. يعنـي إلي يبنيـه الوالد أو الوالديـن إن صح التعبيـر
يهدمـه الصاحـب في دقايـق !!
.
.

- الإعـلام حسبـي الله عليـه , جعـل المدخّـن مثـيـر والمدخّـنـه مثيـره !
-طبعـا صحيـح جميـعـنا ( نستسيـغ ) الرجـل المدخّـن
لكـن عندمـا تدخّـن المرأه ( لا نستسيغـهـا ) !
-لـم يكتـف الشعـراء الحديثـون بالخمـر لسكـرة الهـوى
بل أضافوا إليـها الدخـان وأشيـاء اخـرى !
-فـي امريـكا الدخـان لا يبـاع إلا لمن هـم فوق الـ 18 !
وفي بلاد الحرميـن لا يبـاع إلا لمن دون الـ 18 هه !
.
.

شـُكـرا عزيـزتـي

المنقهره

^
^
أجل تستسيغ الولد بس البنت ماتستسيغها !! يلعن ام المجتمع الذكوري اللي محوم كبدي قسم بالله لو علي أن اجيب جوازي وأحرقه بس الشكوى لله
نوخش بموضوعتس سلمى

معليش .. أخالفتس الرأي
منول الناس عادي عندهم يزوجون بنتهم واحد يدخن والا يشيش .. بس اللحين مااظنه والله
حتى احياناً نعيي على واحد كان مدخن (سابق) نعرف انه اذا ضاق صدره طق له زقاره ولا عليه من أطلق شنب انا مرت عم امي اللي تقرب لـ مشكلتي حلوة كانت تدخن منول بس تركته عقب ماجاها سرطان الله يشفيها وصارت ماتتكلم الا بجهاز وكييذا والباقين يدخنون بس سكيتي بس سبحان الله تبين شفايف الواحد اللي يدخن تصير شوي غامقه


سلمى موضوعتس قميل

سلمى