أهلاً بكُل أهل المُلحق .. ذكوراً وإناثا ..
كباراً وصغارا ..الخ
طيب عنوان حلقتنا اليوم ..
عن ..
متمرمط ..
اللي هو محسوبكم أنا ..وأنا أحدثكم خلف الشاشة ..
وللي مع المرمطة مجلدات عدة <<< اللي يبغى نسخة يقول لي عشان أصور له ..
نرجع لعنوان الموضوع ..
قلنا لكم متمرمط ..
و .. حرف عطف على مراسيل ..يعني لازم نعطف عليه ..
نجي لأحضان ..عارفينه ..صح ..أكيد ..صح ..
ونعود لمهجد الغابة والمقصود به هُنا الأسد ..
أحد ما يعرف لأسد .. أكيد كلنا مانعرفه ..من شأن هيك وعلشان كذا ...
بعرف لكم الأسد تعريف بسيط مختصر ..
الأسد : هو حيوان مهجد غابتهم ..والتهجيد هذا ما جاء إلا من قوة الناب والمخلب ...
طيب خلونا من العنوان .. وندخل بالموضع ..
كنت أنا وصاحبي مراسيل .. طالعين في نزهة غابية <<< نسبة إلى الغابة ..على وزن نزهه برية ..
الحاصل ..
وحنا في وسط الغابة .. نلف ندور مكان ننخمد فيه ..
حسينا برجة في السيارة ...
قلت أنا : مرسيلو << طبعاً أدلعه لأنه فاقد حنان أسم وليس صفة ...
قال : هاااااه ..
قلت : وجعاااااه <<<على وزن وقافية هااه ..
السيارة وش بلاها ..
قال : الظهار أن أحد البزر متعلق فيها ..
قلت : علقوك برموشك ..وش بزره أنت وخشمك .. حنا بغابة مو بحارة ..
قال : أجل فيها مس من جن ..
قالت : والله يا زين مستك بذا العقال ..
الجن حدة روضة خريم <<مسوي فاهم ..
قال : خلن ننزل نشوف العلة ..
وننزل ونحصل اللي ما يتحصل ..
الكفر أم بنشر<<يعني هو وأمه ..
وأصيح أنا : يا ليل القايلة ..وش ذا القرادة ..
مراسيل وأنا أخوك هات .. العفريتة ..خلن نفك ونربط ..
مراسيل : متمرمط ..
أنا : وش عندك ..
مراسيل : بقولك شيء بس لا تعصب ..
أنا : على أيش أعصب قل ..
مراسيل : ما معانا عفريته ..
أنا : وشلون ما معانا عفريته .. وأنا بنفسي زارفها من سيارة جارنا ..
مراسيل : أنت عارف أن الحرام ما يدوم ..
والعفريتة نسيتها بالشقة ..يوم نفك فيها علبة الصلصة ..نسيت ..
أنا : أيه .. صدق .. والله صحيح الحرام لا زم يجيب فيك العيد ..
يا لله مو مشكلة ..
خلنا نمشي قبل يحل علينا الليل وما نعرف نحل ..
وندحدر وندربي روسنا باتجاه ألا معلوم ..
أهم شيء نطلع من ذي المع معه ..
مراسيل : متمرمط تسمع اللي أنا أسمعه ..
أنا : وش تسمع ..
مراسيل : أسمع صوت أنعال – الله يعزكم - ..
أنا : خبل أنت أنعال بالغابة .. صدق أنك خبل لا وموسوس بعد ..
إلا الصوت يقرب شوي وشوي ..
وصار مع الصوت .. صوت ثاني ..
ومن بين الأشجار يطلع علينا ذاك الأسد ..
مراسيل : أوه .. أوه .. شف ذا ..وش ذا .اللي شعرة كدش ..
أخوص حيوان مطور ..
أنا : عز الله أنا رحنا لحم مفروم ومعلب .. وما ناقص غير التصدير ..
مراسيل : وش السواه .. يا مرمط ..
أنا : طنشه لا ترد .. عليه .. أحقره ..ترى الحقران يقطع الكرعان ..
ويصيح الأسد صيحة الزار ..
مراسيل : وش علته ذا أيصايح ..
أنا : ماعليك منه .. نظام صح علي وأخاف ..
يا رجال أرخمه .. لا يهمك .. خله يصايح لين ينبح صوته . ويعرف أنه نهاية الهياط مجموعة فاي ..
مراسيل : أقول والله الظاهر أنت ما وراك إلا الدجه .. والنهاية بنمسي بطن ذا المروح ..
أنا : وش السواه طيب ..
مراسيل : ما فيه غير الزبنه .. أو أنا نطب عليه كلنا ونسطره ..
أنا : بس لو أنحشنا .. بيطردنا وإلا يبلغ علينا .. يقول ذولا ما نحاشوا إلا شكلهم سارقين ..
تدري أنا بجي من قدام وأحوال أشغله .. وأنت حاول تسحب ذيله وتربطة بشجرة ..
مراسيل : تم .. تم ..
ونحاول نطبق الخطة المتفق عليها أربعة اربعة أثنين ..
وأجي أنا عنده ..
واقول ..
أسمع يا لحبيب ترى أمرك عجيب ..
وش تبي منا . أبعد عنا ..
حنا ناس مسالمة .. وما نحب الشر ..
وأن جانا الشر أبعندنا .. وأن رجع مره ثانية .. بعد أبعدنا مرة ثانية ..
وجالس أخبط عليه من هالمنوال .. لين يشوف مراسيل شغله ..
وضبطت الخطة وصارت ميه ميه ..
وربطنا ذيله بشجرة ..
وصار كأنه حته منها .. لا يروح قدام ولا يرجع ورى ..
عزالله أن ربطك يا مراسيل رهيب ..
مراسيل : هاه وش نسوي فيه .. نذبحه ..
أنا : لا لا .. يا أخي العفو عند المقدرة ..
وأن غلط علينا يعني نغلط عليه بعد حنا ..
مراسيل : طيب براسي بس افقع عينه ..
تكفى قل تم ..
أنا : تم بس عين وحدة لا تكثر ..
ويصفقه مراسيل ذيك الصفقة المحترمة ..
على العين اليمين .. وإذا بها تنقلب إلى هالة سوداء .تسيء الناظرين ..
ونروح نمشي ولا أبن أم حيوان يتعرض لنا .. لأنا هجدنا مهجدهم ..
وبهذا نصل لختام حلقة اليوم ..
ولا أرح أقول ما يستفاد من القصة السابقة ..لأن عيب أشرح لكم ..
فأكيد فهمت وش أقصد ..
تحياتي ..
متمرط خوي مراسيل ..
26-02-2009, 04:41 AM
متمرمط ومراسيل بين آحضان مهجد الغابة ..
العرض العادي
