عاد هنا بنشوف انواع التخبيص بالاسلوب ، مثلا ناس يبالغون بالمثاليه حتى مزح مايمزحون

وفيه ناس مالهم هم الا الذب على بالهم هذا ابطل اسلوب بالدنيا طيب ما ننكر ان الذبيبين وفي

روايه العيارين ظريفين ومملوحين واحلى شي بالدنيا لكن موب بتله عاد < خخخخخ ومو على

اي شي يعني ماتوصل انك تجرح احد او .تحطمه، وفيه ناس لما تسولف وتمزح معهم مع الايام

تتفاجأ انه صار يتمادى بشكل مو طبيعي ، تنصدم بالكلمات والالفاظ البذيئه . ماننسى ان المزح

له حدود وفيه عيال مايفرقون في مزحهم بين ولد و بنت وطبعا هالشي يفرق ، كثير منا خسر

اشخاص بالنت بسبب اسلوبه هذا .وفيه ناس اسلوبهم معتدل وهذولا ياحلوهم

و تقول يوني : من الاشياء الشينه بعد وهذي ما كانت فيني لكن للاسف صرت كذا بس بعلاقاتي

النتيه يا خوفي

تتطور بس ..

اللي هي اللقافه ترى اللقافه والنشابه الزايده يعني لا تكون لحوح تكره الناس فيك حاولوا انكم

تبتعدون عنها =(






ف ردودك في المنتدى على سبيل المثال تعكس لنا اسلوبك وشوي من شخصيتك ..

ومن هالمنطلق < يوني كيف الحال ,,

سوينآ روبرتاج مع اغلب اعضاء الملحق الحلوين من خلاله بنشوف اسلوب كل عضو ..

و ارسلنآ لهم ع الخاص هالاسئله ..

للشبآب :

1-كم بالميه شخصيتك بالنت تشبه شخصيتك بحياتك وبين اهلك ؟

2- كيف تحب ان يعاملونك غيرك ؟

3- سم لنا عضـو و عضوه تحس انهم قمه في الإسلوب السليم ؟


≈


* بنقول لك موقفين وقول لنا لو انت بهالموقف شلون بتتصرف :

1-طلبت من صديقك شغله مهمه انت ما قدرت

تسويها وقال لك صديقك ابد خلاص ازهلها انا بزينها لك ,

ويوم جاء وقتها وجيت تسأل صديقك عن هالشغله قال لك يووه نسيت , وسحب

عليك .. شلون بتتصرف معه ؟


2- دكتورك او مديرك بالوظيفه مستقعد لك ودايماً

يفرق بين معاملته لك ومعاملته لباقي الموظفين ..

شلون بتتصرف مع الموضوع ؟

≈

و للصبايـا :

1- كم بالميه شخصيتك بالنت تشبه شخصيتك بحياتك وبين اهلك ؟

2- كيف تحبين ان يعاملونك غيرك ؟

3- سمِ لنا عضـو و عضوه تحسين انهم قمه في الإسلوب السليم ؟


≈


* بنقول لك موقفين وقولي لنا لو انتي بهالموقف شلون بتتصرفين :

1- مره من المرات كنتي قاعده تحطين قلوس او كحله " أي شي خآص " جتك وحده

من زميلاتك " يعني مو مره تمون ومو قريبه منك " وقآلت لك الله عطيني بحط

منه .. شلون بتتصرفين ؟

2- دكتورتك او مديرتك بالوظيفه مستقعده لك ودايماً تفرق بين معاملتها لك

ومعاملاتها لباقي الموظفات ..

شلون بتتصرفين مع الموضوع ؟


وهنآ بنستعرض لكم ردودهم واجوبتهم








( 1 )

٧٠٪

الـ٣٠٪ ، من حق اللي برآ النت .. يكتشفهآ بنفسه .. لأنهآ بتكون طبيعية أكثر ، =)


( 2 )


بـ عفويه ،
وقت أدور على الضحكه ، ألقآهآ

وقت أحتآج أحد ، يجيني !

كل هذآ ، بشكل عفوي من قلب .. بدون مجآمله و نفآق


( 3 )

مونتآج البروآز ،

سينمآ الملحق ،


≈


( أول موقف )


الصدق !

بقوله شكراً .. بس بمعنى ثآني ، من النبره يفهمهآ ، =)

( ثآني موقف )

أشتكي لـ اللي أرفع منه مستوى ، وإذآ مآفيه نتيجة !

أنسحب من هالوظيفة ( بعد مآأضمن وظيفة ثآنية )

لو كآن دكتوري بـ الجآمعه ، بروح أسأله ليه !

يمكن أكون فآهم غلط ، ويمكن هو فآهم غلط

أو ممكن يكون صدق كذآ بس ، مستقعد ..

فـ وقتهآ يآ أحول لدكتور ثآني ، أو أحذف المآده





( 1 )

مـُمكـِن 70%


( 2 )

كمـآ يـُحب ان يعـآملوهـُم النـآس !


( 3 )

سلمـى

≈


( أول موقف )


طبيعي بالبـدآيه راح ازعـل ، اعـصب

وانا صراحه من النـوع الي ياخذ موقف من كل شي

فـ راح احـط × عليه من نـاحيه الاتكـآل عليه

( ثآني موقف )

للأسف مابيدي شي !

القوي ياكل الضعيف زي مايقولون

وحنـآ للاسف عايشين بنظام الغـآبه

وهو بيده مستقبلي ، مصروفي

لذا ماتوقع اني ممكن افكر بشي او احسسه اني متضايق

من شي وهو المتحكم بعد الله بمستقبلي





( 1 )

50%

( 2 )

معاملة تجمع بين صدق و صراحة و تفاهم و إخلاص و ثقة وعدم بثارة

( 3 )

عضو / أسطوره عضوة / سلمى

≈


( أول موقف )

أعطيهـــا

( ثآني موقف )

أحاول افهم منها سبب التفرقه إذا شكيت أن فيه سوء فهم أو اتفاهم مع مسؤوله أكبر منها مرتبة إذا كان

الوضع ما يتحمل السكوت أو اسكت واحاول اتجنبها بقدر ما فيني عشان اريح راسي





( 1 )

اعطيها 80 بالمية وربما أكثر / طبعاً بإستثناء جرئتي القبيحة في بعض الحالات

( 2 )

ودي بأفضل من معاملتي لهم لإني مقصرة بكل شي

( 3 )

سلمى / فرزاتشي / بقايا الهدايا / فصفص << لو تخلون لها المجال بتقول كل الأعضاء

≈


( أول موقف )

لوما نمون سوى ولاهيب حولي أكيد إني بزبد لها واقول عذراً عزيزتي وش يثبت لي إن برطمك نظيف زي برطمي

معليش صديقاتي ونمون مره اوكي ، خواتي اوكي ، إن خربت مره بنت عمي لكن زميلة من بعيد لبعيد تهبا

( ثآني موقف )

الله لايوّلي الفار على ملك

ابقابل الإسائة بالإحسان ،، والحقران له دور يعني لو بزعل وادور رضاها وانا ماجا مني قصور أكيد اباخذ

المسألة مسألة نقص في عقلي ومجاراهـ لعقلها الصغير

وسأحتسب الأجر بكل الأحوال






( 1 )

80 %

( 2 )

ماأحب المجآملات أبد أبد , أحب الشخص يعاملني بقدر معرفتي فيه

قريب مره مره أحبه يآخذ رآحته معي بقوه لأني أعرف هو وشو

أما شخص علاقتي فيه سطحيه أحبه يعاملني عادي وبدون ميانه


( 3 )

ماأقدر أحكم على أحد لأني للحين ماعرفتهم زين , وتوني مُبتدأه

≈


( أول موقف )

بعطيهآ الجلوس بكل وسآعة صدر وبإبتسآمه

مايهم هي مين بس ماأردهآ لو وشو ,, إذآ والله قرفآنه منهآ أرمي الجلوس بدون ماتدري


( ثآني موقف )

أسكت وما أطلبها شي وأطنش إستقعاداتهآ , يآتجي المعامله الزينه منهآ هي

أو كثر الله خيرهآ .. وحسابها عند رب العالمين لو هي ظالمتني





( 1 )

نفسها شخصيتي.


( 2 )

مثل معاملتي لهم .


( 3 )

كثييييييير من الاعضاء والعضوات قمه بالاسلوب والأدب والإحترام ماودي اسمي عشان مانسى احد منهم



≈



( أول موقف )


اكيد بعطيها ولو اني كراهه بس صعبه وش اقول


( ثآني موقف )

بكلمها اول بشوف وش السبب اللي يخليها تعاملني بهالطريقه بعدها اذا ماحسيت

ان معاملتها تغيرت أشتكي عليها واكلم مسئولها .




( 1 )

86 %

( 2 )

باحترام طبعا


( 3 )

كثيرين والله ماودي اقول احد وانسى احد

لكن اذا مصرين على التسميه

هذا اقرب اسم (v e r s a c e)


≈


( أول موقف )

على حسب علاقتي معه .. ان كاني امون عليه ابقعد اهزأه اسبوع


لكن بالنسبه لي ماعرف اعتمد على احد بالاشياء الخاصه فيني ابدا !


وان اعتمدت على احد لازم كل شوي ادق واشوف وش صار <-- بثر



( ثآني موقف )

اذا دكتور مالي الا اصبر نهاية الترم وانزل الماده عند دكتور ثاني

اما الوظيفة اتحمل وش اسوي عاد





( 1 )

70 % اتوقـع .. حسب وجهة نظري إلي يقول إن شخصيّـتي بالنـت

هي هي إلي بالواقـع .. اعتبـره خالف الصـواب كل واحـد منـا

لـه جانـب في شخصيّـته .. ما يقـدر يطلعـه في عالم النـت

( 2 )

كلّ حسـب معاملتـي لـه .. !


( 3 )

آهـات .. فلــه

≈


( أول موقف )

فيـه فرق بيـن إلي نسـى .. و إلي تنـاسـى !

إلي نسـى .. أبعـذره .. وش بيـدي ؟

امّـا إلي تناسـى .. بيكـون تعاملـي معـه جـاف لفتـره

واخـلي تأنيـب الضميـر .. يلعـب دوره


( ثآني موقف )

ابتصرّف بحكمـه طبعـا .. والحكمـه تقتضـي بإني ما أحـط راسـي

بـراس واحـد مانيـب قـدّه .. او له صلاحيّـات علي !

لكـن الغـالـب إنـي راح احـاول اكسـبـه !

وإن ما قـدرت .. ماراح اتمـرّد .. !

لكـن ابعصيـه .. ( بالقانـون ) !





( 1 )

برأيي الشخصي , اعتقد انه قليل اللي شخصيته في الحقيقه

تشبه شخصيته بالنت .. وهذا شفناه لما نجتمع خارج النت

مع اعضاء المنتدى , سواء منتدى الملحق او اي منتدى ثاني


وما استطيع اني اقيم شخصيتي ونسبة تشابهها .. لكن

بحاول اخمن تخمين لعل وعسى يكون صحيح اعتقد 50 بالمية


( 2 )

بمثل الاحترام اللي أعاملهم فيه


( 3 )

كثير الصراحه .. لكن من باب عدم ظلمهم بسمي ثلاث

اشخاص اعرفهم خارج وداخل النت .. شليويح بيك ,

مصيول بن جورج , بكيراوي .


ومن العضوات .. العضوه مدري


≈



( أول موقف )

راح يكون ردي كلمه اوكلمتين

زي مشكورعلى فزعتك , ماقصرت والله , تعبناك معنا

واكيد بعدها ما راح اطلب منه اي طلب .. ولو حتى هو طلب

مني طلب مره ثانية ماراح اسوي زيه .. لكن بحاول اني

اعتذر منه باني ما اقدر اسويها باي طريقه ,مثلا انا مشغول

ومن هالحكي .


( ثآني موقف )

بحاول اتحاشاه ولا ادخل معه باي مصادمات , بحيث اني

اخذ منه اللي ابي ولايأثر علي , واتذكر عندنا هالترم

مهندس المعمل كان ما يسأل الا طالب واحد ولا يمدح الا

طالب واحد , لانه ببساطه من نفس عايلته وقبيلته ,

ومتأكدين انه معطيه الدرجه الكامله بالعملي , وطلعت

الحمدلله باقل الخساير , ببساطه زي المثل المصري " اذا

صار لك حاقة عند الكلب اأوله ياسيدي "




* فله ترا تسونآمي تحبك < !

( 1 )

انا بالنت وبرا النت واحد =)

بشكل ماتتخيلينه .. تقريباً 100 % .. الحمدلله مااحب الاقنعة

ومشكلتي الأساسية هي ( المزاجية ) بعيد الشر عنكووا

( 2 )

ياخيتو .. الدين المعاملة

احب الناس تعاملني برقيّ وبلطف .. واقدرّ الحكي الحلو والاسلوب الي يفتح النفس ^_^

أحب اخذ واعطي واناقش .. واحب احكي مع الناس الي اكبر من عمري بكثير

أحب الناس الي تسمعني وتهتم و توجهني وتعلمني وتفيدني

احب الناس تعاملني مثل ما يعاملون الطفلة الشقية الصغيرة

واكيد "عامل الناس كما تحب أن تعامل"

هالمقولة استفدت منها دروس كثيرة


( 3 )


بصراحة شفت أعضاء قمة كثير .. الملحق كلهم قمة وأنا ما أجامل =)

≈


( أول موقف )

نجاح المرء في حسن معاملة الاخرين

من الاتيكيت والأدب واللباقة والإحترام اني بعطيها إياه

وممكن بدون لاتقولي شخصيا ابي منك الغرض الفلاني

يعني لو حكت وقالت بنات من معها الغرض الفلاني راح اعطيها

انا مره افرح اذا بعطي الناس شغله يحتاجوها

حلو ان الواحد يحس بحب الناس له ويساعدهم بأي شغلة مهما كانت بسيطة وصغيرة

وكمان شي جدا جدا جميل تتركين عنك إنطباع حلوو =)

( ثآني موقف )


الحمدلله رب العالمين ماقد استقعد لي أحد

بلعكس الله يهديني..كانوا مره مره معطيني وجه الأبلات والدكتورات والدكاتره كمان ..

لكن الي صدق استقعد لنا كمجموعات دكتور يشرف علينا ببحث التخرج

الله يهديه يارب ويرجعه لمصر ويفك البنات من شره

لكنه بالأخير بعد كل التعب والجهد الي بذلناه

اعطانا ممتاز الله يعافيه

وصار لي وللبنات مواقف كثيرة كثيرة معاه

وذكرى حلوه وتضحك .. تصدقوا انه وحشني

حتى بالأخير من كثر مااستقعد للعالم .. تهكر على جهازه

واخترقوا ايميله ههههههههه

وجلسنا نحكي مع الهكر وحااله يالله ههههه

كنا مضيفين الدكتور عشان بحث التخرج ونرسله واجباتنا

وكان يعطينا ملاحظات عليها وتصحيحات

واذكر مره بالمحاضرة قالنا الي عاوزا تحكي معايا بأيت موضوع

ع الماسنقر تعتبريني زي أخوها وتحكي لي

هههههه شايب قد ابهاتنا يقول أخونا

الله يهديه كان مره مره يضحكنا

آه من هالدكتور والمواقف الي عشناها معاه لو مايجي من التخرج الا أيامه تكفي

دكتور يخوف مره وتوحفه صراحة .. مفروض يصلحوا له تمثال عندنا


و إن شاء الله لاتوظفت الله لايحطني عند احد يستقعد لي =)

وياحلوتي اذا الناس بتستقعد لبعض .. فيها اثنين يا فائز يا خسران

او راح يستقعدوا لبعض ..لين يصيروا زي الفرزدق وجرير

ومافيه نهاية الا بنهاية أحد منهم

ولازم الواحد يفكر ليه هالشخص استقعد له اصلا؟

يعني يدرس جوانب فيه شخصيا وممكن يعدلها ويصححها

اما اذا كان استقعاد كيذا من ربي ! وظلم! فهذي والله المشكلة

والأهم من هذا كله إنك تكوني ذكية وتكسبينه لجانبك باساليب جذابة

"والأمرُ أيسرُ مما أنتَ مُضمرُهُ "

فالأحسن انك تعيشين حياتك صح وتعرفين كف تتعاملين مع الناس صح

ومشيّ مشيّ وعيشي حياتك بسلام

وياحبيبتي صدقيني .. الناس ماتمشي إلا بالاسلوب الحلو والكلام الطيّب ^_^

وهذا يعتبر نجاح لك انتي في شخصيتك وهو فن لكن مين الي شاطر فيه ؟ ; )

والواحد بس لازم يتذكر كيف كان اسلوب الرسول عليه الصلاة والسلام واسلوب الصحابة والمسلمين





( 1 )

90 %

( 2 )


بالضبط مثل ما اعاملهم ,, يعني انا طيبه وحبوبه معك خليك مثلي .. اذا حاولت الف وادور معك

ذيك الساعه من حقك تصيرين العن مني


( 3 )

عضو // بقآيا الهدآيا وفرزاتشي

عضوه // انشوده المطر


≈


( أول موقف )

بعطيها اكيد ,, بس ماراح استعمله بعد كذا يعني لو عجبها اذا حطته بقول يفداك واخليها تآخذه

حتى لو كآن غالي علي .. افضل من اني ارميه بعدها


( ثآني موقف )

اكسر عينها وما اخليها تقدر تمسك علي زله ,, بقوم بوآجبي ع آكمل وجه ويمكن بزياده .

. والكلمه الطيبه حلوه بعد يعني بتعامل معها بـ احلى الآخلاق لين تخجل من نفسها وتعرف

ان انا رغم اني اصغر منها بالعمر قدرت اكسب احترامها





( 1 )

85 %


( 2 )

زي معآملتي لهم ..


{ عآمل آلنآس بمثل آن تحب آن يعآملوك به }

( 3 )


آليوزرآت كثيره .. مثل / آستآذي . شليويح , وفرزآتشي , آم غمآزآت , سلمى , ... آلخ


≈


( أول موقف )

آذآ هو عزيز وغآلي .. بتغفر له مكآنته عندي ..

وآذآ مآ آمون عليه مره .. آبآخذ منه موقف


( ثآني موقف )

{ آذآ كآن لك حآجه عند آلكلب .. قله يآ سيدي }





( 2 )

اكيد اي احد يحب انه يعامل بالمثل

وانا احب يعاملوني بالمثل او على الاقل يقدرون اي تعب اسويه عشانه ولو بالكلام فقط



≈


( أول موقف )

بعطيها

وممكن اذا خلصت منه ورجعت للبيت امسحه بمنديل

او اعطيه الشغاله او اني ثنك تكت ايزي


( ثآني موقف )

والله ما ادري بصراحه ممكن اقولك كلام واذا حصلي الموقف فعلاً تختلف ردت فعلي بس عموماً بدور

احد افضفض او بروح اكلم الدكتوره نفسها على حسب !!

عذرا ماجاوبت على كل الاسأله ..





( 1 )

80 %

( 2 )

ع حسب آلشخص يعني ممكن رسميه و ممكن لا آلوضع يكون عآدي بس بحدود


( 3 )

بقآيآ آلهدآيآ


≈



( أول موقف )


بقول لآ لآن آكيد آللي طلبني يمون وآنآ آمون



( ثآني موقف )

آطنش





( 1 )


أنا شخصيا أحسها غير..

لكن كثير يقولون لي انها متقاربة..

فصعبه أنا اللي اقيم..بس خليني أقول 70



( 2 )


"غيرك" كلمة عامة..وكل انسان "غير" أبغى منه معانلة مختلفة..

يعني المعاملة اللي اطلبها من أمي وعائلتي بشكل عام..

غير اللي اطلبها من صديقاتي..وأكيد الدكتورات في الجامعة بعد غير..

بس بشكل عام الواحد يبي يتعامل باحترام..سواء احترام عقليتي أو مشاعري..

لكن الناس القريبين مني بطلب منهم العاطفة..والصراحة..


( 3 )

والله كثير..

وكل شخص يعجبني فيه أسلوب معين..

يعني في البساطة وخفة الدم (موافق عليها)

وفي الحوار (سلمى)

ويعجبني (فرزاتشي) لما يفاجئني بخلطة بين الجد وخفة الدم


≈


( أول موقف )

بنحرج أكيد شوي..لكن بعطيها على طول

( ثآني موقف )

هو طقاق وهواش أكيد منب متطاقة..

لأني بشكل عام مسالمة وماحب وجع الراس..

فبهدوء بروح لها..وأبدا أقارن بين اللي أقدمه وبين اللي يقدمه غيري..

وبين النتايج اللي حصلوا عليها وبين نتايجي ..وأخليها هي وضميرها..






( 1 )

مآتشبه لها أبـد أنا بالنت نآس تشوفني شـ هالطفاقه وهاللسان بالواقع هآديـ9 جدا

صح تكون لي طلعات مدري شتبي بس ابقى هاديه

( 2 )

مثل مآأعاملهم أنا أبي لاإبتسمت لهم تبسمون لي أبي لا بغيت لهم الخير يتمنونه لي ..


( 3 )

تقبلون إجآبـ9 ( كل نفس بهالملحق ) ؟!


≈


( أول موقف )

ابعطيها وأقولها خليه حقك خخخ .. نآدرا مآتصير معاي لأن شكلي ترا مآيعطيك إني متعاونـ9 ابد


( ثآني موقف )

تسمعين بالحقران !

آخر مآأشوف هي والي تبيه تسويه مو أسقوي عليها ولاهو تحدي بس دام مالي لزمـ9 فيها اتحاشاها..





( 1 )

امممم ممكن 50% والاختلافات تقتضيهاا طبيعة شخصيتك بالنت وشخصيتك بالواقع ""

( 2 )

عامل الناس كما تحب ان يعاملوك : )


( 3 )

......


≈


( أول موقف )

يؤ صدق ورطه "

اممم يمكن اعطيها اياااه واذا رجعته ذبيته بالزباله ياسفابه >


( ثآني موقف )

اتوقع بسكت ,,اذا تفرقتها ماراح تضرني ,,

بس اذاا راح تسبب لي ضرر ياويلها بحاول امسك عليهاا موقف يستاهل

اني اتكلم مع المسؤل عنهااا >





شكراُ لكل اللي تفاعلوا معنا وردوا علينا

بجد يعطيكم العآفيه ..



وبـس

ندري كثرنا عليكم بقرقنا بس جد حسينا ان فيه كثير مننا

محتاجين لهالموضوع ..

وقبل لا نخليكم

نبيكم تشوفون هآلكتابين مره مهمين ومفيدين :


* كتآب " اخلاق الرسول عليه الصلاه والسلام " :



* كتاب كيف تكسب الاصدقاء .. وتؤثر في الناس " للكاتب دايل كارينجي :






يآربي عجبكم موضوعنا المتواضع

وترا ما نسمح لـ اي احد من غير اللجنه انه يقيم الموضوع طيب <

قروبنا اللي عجزت احفظ اسمه =)

( شـدها ومـدها )