موضوع صميم يا سلمى .. بصراحه ابوي تقاعد لمدة سنتين بعدين رجع للدوام
خلال السنتين هذي عانينا الأمرين اولا صار مدمن شي اسمه الصناعيه
يعني عادي نتلاقا انا واخوي فيذاك وفي الاخير نكتشف ان ابوي مرسلنا نجيب نفس الغرض
اصبح يتنقد بشكل كبير مافيه شي عاجبه .. هه وش ذا السكسوكه الحمد لله والشكر جيل مخيس
وش ذا اللبس يعني غير عن هذي المواقف فيه شخص انا اكرهه وهو خالي ابوي مدري ليه يحبه
ومناسبه انسان ثقيل دم لأبعد درجه وعياله 6 كلهم بثرين على ابوهم ابوي يستانس على ذبات عياله
ويقتبس منهم ودايم يقول ليه ما تصير زي عيال خالك هزاع من زين هالخال اصلا انا كارهه من يوم
ما تسواني بالملعقه وانا صغير بالاضافه التعديلات الي بالبيت كل ما قالوا هلي نبي نسافر قال ماعندي
ماتشوفوني ابني .. لين اشوى بعد كم شهر مل من قومة الصبح وفتح له مكتب عقار وطقطق فيه شوي اذكر مره زعل علينا يوم قلنا له وش عنده بن موسى وقفلت معه وما عاد راح المكتب ورجع لعادته القديمه بعد سنه من الطقطقه والورش والصناعيه والمزاجيه الغريبه يعني يبي قطعه من الصناعيه طيب موجوده نفس القطعه في ساكو يقول لااااااااا ابي من الصناعيه الاصلي يباع فيذاك والمشكله اني اجيب له من ساكو ويقعد يمطط بالقطعه ويقول هه شفت الاصلي وشلون هههه بطبيعة الحال كل فتره يطيح بشي مره طاح بالنخل وكل شوي
راقي له نخله ولا جايب له مزارع يلقح ومدري وش يزين بعدين ترك النخل وطاح بالبل بعدها شرى لابتوب
وطاح باليوتيوب ولورنس والحمد لله جاه عرض من نفس الشركه الي كان يشتغل فيها ورجع للدوام
ولكن ترسبت بعض التصرفات الي اكتسبها خلال الفتره الماضيه السنتين يعني يعني ما يحس انه رايح الصناعيه الا الظهر اذا طق نظارته الكبيره حقت حسين فهمي وقعد يتفلسف على ابو يمن وانا في امريكا وانا في امريكا هههه وش دراه ابو يمن عن امريكا الحين حياة ابوي تنظمت يصحى الصباح يلبس النظاره ويقرا الجريده ويفطر بالحديقه يروح الدوام يرجع ينوم ساعه لين صلاة العصر يطلع يقضي اشغاله يعني رجع لروتينه القديم لكن ببعض الترسبات المزعجه طبعا فيه صفه قديمه لكن استفحلت خلال التقاعد الا وهي اعادة الذبه بكل مجلس يعني العيد ما قبل الماضي قايل نكته .. بكل عيد لازم يقولها والي يقهرك كلن يضحك