شكواي للي يفتهم شكواي :(

الضب الانتحاري

بسم الله الرحمن الرحيم ..


اخواني اخواتي انا جاي هنا اليوم ابشكي لكم عن معاناة عشتها لمده ثلاث سنين .. بدت معاناتي اول ما تخرجت من الثانوي وجاب لي ابوي السيارة .. كنت متوقع اني خلاص صرت كبير .. خلاص اقدر اروح للشرقيه لحالي واعيم من الله خير .. اذا قفلت اقدر اطلع ادور واحد اي واحد .. بالعربي كنت مأمل على اشياء كتيره لكن صدمت بالواقع المر .. يمكن يجي بعضكم ويسأل وراك توك تكتب الموضوع اجاوبهم واقول توني افيق من الصدمه ..


ياجماعة الخير انا ابوي عادني سواق .. موب عادني وبس لا اخينا بالله مصرح وامام الملاء ..

اجل امي تسأله وبكل رقه تقول له ورا ما تجيب لنا سواق .. تدرون وش رده فعله يا جماعه .. بكل بساطه مد الفنجال لأمي والتفت علي وقال : وهذا وشو .. هذا وشو .. انا ولد يا بني ادم موب سواق .. اقل شي جاملني وقل احد يجيب سواق وعنده ولد .. موب تقول وهذا وشو ..


.. تتوقعون ان الموضوع انتهى على كذا .. لا والف لا .. اول كنت متوقع ان الامر سهل ..

كنت متوقع ان ما فيه الا تودية اهلي لخوالي وترجيعهم وصلى الله وبارك .. لكن تفاجأت يا جماعة الخير ان فيه عقبه طلعت بوهجي .. طبعا بغض النظر عن سالفة محل واحد وبنرجع ونغض النظر عن سالفة محناب مبطين اصبر ..

كل شي كنت اقدر اتغاضى عنه وامشيه واعيش حياتي .. لكن للأسف ارجع واقول للأسف جاني مطب عرض حياتي وصحتي للخطر ..





ايه ايه هذا هو المطب .. هذا المطب يا جماعه هو جدتي .. ترا صدق اللي بالصوره جدتي موب رسمه ..بس طبعا بدون الورده المركوزه فوق ..

ياجماعة قسم بالله كنت اول دب ومربرب .. من يوم بديت اسوق وانا ناحف وذابل وصاير تسني شجره صاقعتها الشمس ولا فيه احد يسقيها ..

قسم بالله يا جماعة جدتي حالتها حاله .. انا اللي اعرفه ان العجر وقتهم كله بالبيت .. جدتي هذي حالة شاذه يا جماعه .. انا اول مرة اشوف وحده تراجع بأربع مستشفيات وفي الاخير اذا جبت لها الدواء قالت لا ما يحتاج ما فيني الا العافيه .. طيب يوم ما فيتس الا العافيه وراتس مقومتني من صباح الله ومشورتني للتأمينات والا لدله والا لمدينة الملك الطبيه .. قسم بالله يا جماعه بديت افكر اغتالها .. تخيلو يا جماعه في يوم داقه علي الساعه 7 الصبح رديت وقلت سمي ياجده وش عندتس .. وش تتوقعون قالت لي .. قالت لي وبكل برود وانا امك ترا عندي موعد اليوم الساعه 10 .. متخيلين انتم الساعه 7 مقومتني عشان تقول الساعة 10 تعال .. قسم بالله فكرت اروح احط لها سم فيران مع اني اتوقع انه ما يأثر فيها ..

ياجماعه تخيلو في يوم تدق علي تقول تعال انا بالمستشفى تعال رجعني .. اشغل وامسك زحمة خريص الين اوصل لمستشفى دله .. وفي الاخير ادق عليها اقول انا عند الباب تقول لي انا بالتأمينات ..

ياجماعه انا ماكنت ابتكلم ولا كنت ابقول شي لكن الموضوع تعدى الحد يا جماعه ..

المشكله يا جماعه حاولت اصرفها بأكثر من طريقه ما نفع .. دقت علي مره وقالت لي تعال ابيك توديني لبيت عمك .. قلت لها يا جده انا بالدرعيه الحين (( مع اني كنت مديور مع مخرج عشره )) قالت لي ما يخالف اذا خلصت تعال لي .. بالله عمركم شفتو اكثر من كذا بثاره ..

انا ماكنت ناوي اتكلم ولا كنت ناوي افتح الموضوع لكن بعد اللي صار امس لازم اتكلم ..

ياجماعة الموقف بكل اختصار ..

انا كنت بالاستراحه .. الساعه 12 بالليل .. دقت علي جدتي وبكل بجاحه قالت لي تعال ارجع من الاستراحه عشان توديني .. طبعا انتم تشوفون الموقف عادي .. لكن تدرون وش اللي يرفع الضغط ويقلب الكبد .. ويجيب السكر وتصلب الشرايين والبهاق وكل الامراض المزمنه والغير مزمنه ..
ان عمي اللي هو ولدها جالس عندها ووش عذرها .. تقول مستحيه اقول له .. يابنت الكلب تستحين من ولدتس << قفلت .. ولدتس يا مال الحمى الدرقيه ولدتس .. تستحين تقولين له ودني وهو جالس جنبتس ولا تستحين تقولين لي تعال من الاستراحه رجعني للبيت ..

هه شوفو .. الساعه وحده وداقه علي تقول ابي خضار .. احد يبي خضار هالوقت .. والله لو انتس تحششين بخس يا جده ما مسكت معتس خضار الساعه وحده ..

يالله يا جماعه عن اذنكم .. ابروح اجيب لها خضار .. وش تناظرون .. ايه ابروح اجيب لهل المعفطه خضار .. مير تصدقون قسم بالله ودي في يوم انطلها بمغسله واقول له بالله كوي مستعجل الله يرحم والديك ..

برب برب لا تدق الحين وتصير تبي لحم مفروم


<<< يقول بنفسه يا رب خذها خلنا نرتاح

ريمي

ماركه إتاويه

A N A S

تؤبـر تسبدي

مشكلة مشـآوير الاهل عـآدي هذا آخوي مكروف وولد عمي وولد خـآلي ولا قالو شي << بيقولون لس يعني
واذا تبي الحل مالك الا تعرس ساعتها بيستحون منك << آدور لك عروصه

واذا من ناحية اهلك يقولون عنك سوآق وش هالحساسيه هذي عآدي آخوي اساسا معيي اننا نجيب سواق يقول انا سواق بداله آشوى آنه رآعي سحبـآت

بس آنك تدعي على جدتك حرآآم على قولة الي فوق ترآآ دعوآآتهم كلن يتشفـقهآ ومآيحس بالشي الا الي فآقدهـ
كلما وديتها قلها بشرط درزن دعوآآت

وبعدين آخ ضب ليش حآط الجنس : آآنثى ؟

إلا أقول عندك شي بكره بعد الترآويح ودي آروح للسوق

سلمى

Second Dive

موافق عليها

جدتك اسمها منيره ؟!
اذا اسمها منيره فأنا اجزم ان الاسم فيه بلا بعض المرات اني ادعي ان خالتي اللي هي ام خالاتي مهب جدتي قسم بالله ذيك فيها بثاره انا اول مره اشوف وحده تجي من شقرا عشان تجي لم البطحا وترجع مره ثانيه الحمد لله انها خذرفت قبل لا اكبر ... بس ترا ابوك عادي احمد ربكك ان ابوك مهب ابو علي والله لو انت وين لو مسكت معه يروح للمزرعه وانت معه والله ان تروح ورجلك فوق رقبتك ولا يدق عليك يقول جب لي الجريده والله لو انك رايح تبرع بالدم تجيب يعني تجيب

myth

.

حالتك تحزن
يعني جدتك صحيح لآزم تحترمهآ , بس من جد أنغثيت يوم عمك جالس عندهآ وأنت توديهآ
مآبي أزيدك بس أنا أنصحك " تهج " جد هج
الله يخليك لأهلك يارب .. أنت بالجنه إن شاءالله

لستُ عبيطاً

بصراحة أنا من ايام جالس اقراا في هذا الموقع الموقر .. وانا ماسجل في موقع الا لحاجة ملحة سواء للرد على بعض المواضيع أو للإنتفاع بأحد المنافع التي تتطلب التسجيل ..

بصراحة يا أخ الضب الانتحاري حاولت وأنا أقرأ موضوعك أن التمس لك العذر .. فقلت شكل الولد يبغى ينكت ويصير خفيف دم على حساب جدته .. وبرضو قلت في نفسي اذا كان أخونا الضب صادق فهي مصيبة بصراحه وياليتها جت على استخفاف الدم ..

طيب واذا جدتك غثيثه ياخي تجي تغسل شراعها قدام ناس أغراب ليه ؟!!!!!

مبسوط يعني والاعضاء جالسين يضحكون على جدتك ويمكن كمان يضحكون عليك لأنك دلخ ماوقرت جدتك !!!

معروف عن كل شيبان العالم أنهم لما يكبرون يصيرون متطلبين ياخي .. وبعدين الله لايحوج احد لك مادام راح تشرشحه من ورا ظهره .. هذي جدتك تعطيك كف ، بوقس اي شي تتحمله وانت ساكت ..

وبعدين نجي للعبارة الجبانة اللي كتبتها آخر الموضوع ولونتها باللون الأبيض .. بالله هذي دعوة واحد عنده عقل ؟؟؟؟؟!!!!!

بصراحه انت انسان جبان اذا صحت قصتك اللي قلتها .. واذا متضايق من خدمة جدتك روح اشتكي عندها ، عند امك ، عند مدير مدرستك اي شييييي بدل ماتجي تغسل شراعها قدام اللي يسوى واللي مايسوى .. غيرك يتمنى اجداده يرجعون للحياة بس عشان يبرون فيهم وكل هذا من حبهم لأبائهم وامهاتهم .. وناس سبحان الله ترفس النعمة ..

الزبدة أتمنى موضوعك يكون مجرد استخفاف دم فاشل ..

وكنت أتمنى اشوف رد عاقل وناصح بس مادري هو جبن برضو والا استمتاع بالموضوع !!!

الضب الانتحاري

يستريحون :

هلا وغلا يا طويلة العمر .. يا بنت الحلال الموضوع دعابه بس ما يصلح للتكيه .. فقلت انزله هنا بحكم انها مشكلة اسريه

الله يعطيها طول العمر .. بس تدرين وش المشكله .. الله يهديها مدري من اللي لاعب عليها وقايل لها انتي وزيرة خارجيه لها سنتين طالعه ببيت لحالها تقول عشان يجوني الناس ومايستحون منكم .. بيني وبينك بديت اشك انها متزوجه مسيار ..

..

ذا كينق :

ياخي منهو ذا خالد الاحمد .. قسم بالله ياخي الساحه الفنيه كل يوم يطلع لك فنانين جدد .. المشكله ما ادري من وين يجيبون اغانيهم ..

اجل تبي بنادوره .. وش عندها هدى بنت ابو بشير ياخي اسمها طماط <<<

..

تؤبر تسبدي :

اقتباس:

واذا من ناحية اهلك يقولون عنك سوآق وش هالحساسيه هذي عآدي آخوي اساسا معيي اننا نجيب سواق يقول انا سواق بداله آشوى آنه رآعي سحبـآت

يابنت الحلال هي ان كان المسألة مايخالف .. بس اقل شي ما يقول لي هذا وشو . قسم بالله حسيت اني لقيط

اقتباس:

بس آنك تدعي على جدتك حرآآم على قولة الي فوق ترآآ دعوآآتهم كلن يتشفـقهآ ومآيحس بالشي الا الي فآقدهـ كلما وديتها قلها بشرط درزن دعوآآت

ياطويله العمر الموضوع ومافيه مزح واستهبال .. ملينا من الروتين والاحترام ..

..

سلمى :

ياطويلة العمر انتي تدرين وش تسوي .. هي تعرف اني اذا دقت علي منيب راد .. عشان كذا تدق من رقم ام ابراهيم والا ام حمد وان كانها تبيني ضروري دقت على ابوي وقالت له دق على الضب

اقتباس:

مثبت لحين حل مشكلة ضب

عز الله ما انفك التثبيت

..

اقتباس:

ولقد أتيت بذنب عظيم !! أخبرني ياصغير , ذلك الثقب المتمركز برأسك هل له أن يستقبل مطرقة هابطة ؟ إن كان قولك رفضاً , سأرغمك قولاً لتفصح عن خطة اغتيال جدتك فأنفذها بدلاً عنك ! ولكن الهدف سيختلف , لن تعرف من هو ! لأن الثقب سيٌخل من توازنك حتى تفكر , حينها سيموت ذلك الأبله وهو جاهل

هاه ؟؟

...

موافق عليها :

اقتباس:

جدتك اسمها منيره ؟! اذا اسمها منيره فأنا اجزم ان الاسم فيه بلا بعض المرات اني ادعي ان خالتي اللي هي ام خالاتي مهب جدتي قسم بالله ذيك فيها بثاره انا اول مره اشوف وحده تجي من شقرا عشان تجي لم البطحا وترجع مره ثانيه الحمد لله انها خذرفت قبل لا اكبر

لا اسمها حصه ..

اقتباس:

بس ترا ابوك عادي احمد ربكك ان ابوك مهب ابو علي والله لو انت وين لو مسكت معه يروح للمزرعه وانت معه والله ان تروح ورجلك فوق رقبتك ولا يدق عليك يقول جب لي الجريده والله لو انك رايح تبرع بالدم تجيب يعني تجيب

يا ابن الحلال انت داري انه مرجعني من شقرا عشان اطفي الدينمو واكرب صامولة المكيف الصحراوي .؟

سلمانشستر

يا رجال غلاها من غلا الشيبان .. شكلك مستحي تغسل شراع ابوك فحطيتها بالعجوز

انا جدتي أم أمي عايشة بديرة ثانية

مره جتنا وتقول انها كل يوم تدعي لي علشان سالفة صارت وانا ناسيها والله

تقول انها مقعدتني اجيب لها حليب ولبن وقتها برد وعجاج ورحت بدون ما أقول لا

صحيح اني ما أسويها بس شكل القرين هاك اليوم صاير ارحم مني ومقعدني اروح اجيب لها

لا الصدز الصدز .. الشيبانين لازم يتم مراعاتهم .. بكره تتزوج وتجيب للمدام وأنت تضحك

فأكسب أجر العجيز واغنم منها حسنات دامها حية

بس فيه نقطة ما أعجبتني

أنا ابي أعلق عليها على اساس انك حاط الموضوع بهالقسم

تلعن جدتك وتدربي رأسك تبي الناس يقولون انهوو الولدو الموضحيكو

أنا معاك إن الحريم ماينعطن وجه .. لكن اطرح السالفة زين

اما جدتك فحقها عليك وغصب عنك .. فسو امورها وخلص اشغالها بطيب نفس

تراها تنفعك بالأجر أكثر من خوياك وفرفرتك بالشوارع

على فكرة ترى وقسم ما أسوي حالي مثالي في أمور مسلمات مابهن مراوات

والعجايز والشيبان حلاوة البيت والحياة المؤقتة

بس تخيل يوم انها تلف الفلوس بطرف شيلتها من تحت

آآه بس يا كحيلان

غرام

الأم ام ولو علت والبنت بنت ولو دنت
..
جدتك بحسبه امك وحفيدتك بحسبه بنتك معلوم نفر ؟

اتحداك

[^^^

صح عليكِ يآحلوه




QUOTE=Second Dive;418110]

ولقد أتيت بذنب عظيم !!
أخبرني ياصغير , ذلك الثقب المتمركز برأسك هل له أن يستقبل مطرقة هابطة ؟
إن كان قولك رفضاً , سأرغمك قولاً لتفصح عن خطة اغتيال جدتك فأنفذها بدلاً عنك !
ولكن الهدف سيختلف , لن تعرف من هو !
لأن الثقب سيٌخل من توازنك حتى تفكر , حينها سيموت ذلك الأبله وهو جاهل ![/QUOTE]



رائع .. مثقف بالحو1ر
آسعدني ردك


نجي لقصتك ~
مآلها حل لآنك آخذت الحين ذنبهآ وانتآ ماتدري !


وآذ1 مآخدمتو جدتكم وآمكم وطلعتوهم / من تخدمون ؟!

الحب اللي كان

هههههههههههههههههههههههههههههههههههههههههههههههههه هههههههههههه
ياخي انت خبل ... انت انسان مقلع ... انت بالعربي منعفط ..
ياخي جدتك هذي ملكعه الحل الوحيد انك تتلكع عليها زي براد ابو اربع
يعني طلعها مع كم ودخلها مع الكم الثاني .. خلك ذيب ..
واعرف وش تقول ووش تصرف ...
لاتصير كمخـه لاقالت لك شيء علطول تقوم ..
صح انها جدتك بس بيني وبينك العجز احيانا يصير بهم بثاره مهيب طبيعيه
والي ماجرب مايدري .. لكن شف جرب اللكاعه ..
وجرب اسأليب ملتويه اخرى ..
الله يعينك ..
بس والله ضحكة ضحك ع ذا العصريه ..
الله يوسع صدرك بالعافيه